„ვეძა“ მომჟავო მინერალური წყალია —  ის კახეთში, აღმოსავლეთ კავკასიონის სამხრეთ ფერდობზე მოიპოვება და მაღალი მინერალიზაციით გამოირჩევა.

„კომერსანტი“ დეტალებისთვის ვეძას დამფუძნებელს ირაკლი მირზიკაშვილს დაუკავშირდა, მისი განმარტებით „ვეძას“ სხვა მინერალური წყლებისგან მაღალი კონცენტრაცია და განსაკუთრებული თვისებები გამოარჩევს.

„ „ვეძას“ წყალი მინერალების მრავალფეროვნებით, მაღალი კონცენტრაციით და  განსაკუთრებით სასარგებლო თვისებებით ხასიათდება. იოდის, ნატრიუმის, კალციუმისა და სხვა სასარგებლო მინერალების მაღალი შემცველობა კი  „ვეძას“ ჩვეულებრივი მინერალური წყლისგან გამოარჩევს.“ -  აღნიშნავს ირაკლი მირზიკაშვილი

„ვეძის“ წყლის სერიული წარმოება 2020 წლიდან დაიწყო და მისი ქართული ბაზრისთვის მიწოდება 2021 წლიდან იწყება. მირზიკაშვილის განმარტებით, იმის გამო, რომ ბუნებრივი რესურსის რაოდენობა შეზღუდულია, წყალი ლიმიტირებული რაოდენობით იწარმოება და ამ ეტაპზე მხოლოდ 0,750 მლ-იანი შეფუთვა აქვთ. მირზიკაშვილის თქმით, ეს საუკეთესო რაოდენობაა რაც შეიძლება ადამიანმა დღის განმავლობაში მიიღოს.

წყალი „ვეძა“ ამ ეტაპზე მხოლოდ კახეთის რეგიონში რამდენიმე ადგილას იყიდება, თუმცა ირაკლი მრზიკაშვილი აღნიშნავს, რომ  მალე თბილისსა და საქართველოს სხვადასხვა რეგიონშიც გაიყიდება.

„ამჟამად ყველა მსხვილ მაღაზიათა ქსელთან გვაქვს ტექნიკურ საკითხებზე მოლაპარაკება და უახლოეს კვირებში ჯერ თბილისში, ხოლო შემდგომ საქართველოს ყველა ქალაქსა და რეგიონში არსებულ სავაჭრო ქსელში გამოჩნდება. პირველ ეტაპზე, მარტის მეორე ნახევრიდან მომხმარებელი ჰიპერმარკეტ „კარფურსა“ და ნიკორა XL-ში შეძლებს შეძენას.

2021 წელს ქართული ბაზრის ათვისებას დავუთმობთ. გამომდინარე იქიდან, რომ „ვეძა“ თავისთავად შეზღუდული რესურსია, ქართული ბაზრის ათვისების შემდეგ სავარაუდოდ ექსპორტს ფიზიკურად ვერ მოვემსახურებით.“ -  აღნიშნავს ირაკლი მირზიკაშვილი.

მირზიკაშვილმა“კომერსანტთან“ მინერალური წყლების ქართულ ბაზარზე  არსებულ კონკურენციაზეც ისაუბრა და განმარტა, რომ მიუხედავად  კონკურენტული ბაზრისა, კვლევები აჩვენებს, რომ მოთხოვნა იმაზე სწრაფად იზრდება, ვიდრე მიწოდება ან არსებული მინერალური წყალი. შესაბამისად „ვეძას“ წყალი მომხმარებელს  უფრო მრავალფეროვანი არჩევანის  შესაძლებობას მისცემს.

„ვეძას“ საწარმო კახეთში, ყვარელში მდებარეობს და ის მირზიკაშვილების ოჯახის პირდი სახსრებით აშენდა, ირაკლი მირზიკაშვილი აღნიშნავს, რომ ოჯახს ბიზნესის დაწყებისას არანაირი სახელმწიფო პროგრამით და გრანტით არ უსარგებლია.

 „ვეძას“ ბოთლის დიზაინზე ახალგაზრდა დიზაინერმა დათო თაბორიძემ იმუშავა. კომპანიაში დაახლოებით 15 ადამიანია დასაქმებული

რაც შეეხება სამომავლო გეგმებს, მირზიკაშვილის განმარტებით პირველ რიგში, კომპანიის მიზანი „ვეძის“ არსებული რესურსის ქართული ბაზრისთვის სრულად მიწოდებაა, ხოლო გრძელ ვადაში არაგაზირებული წყლისა და სხვადასხვა სასარგებლო მინერალური სასმელის წარმოება იგეგმება.

თაკო კვაჭანტირაძე