„ადრე იყო ასეთი რუბრიკა - „ესენი ვინ არიან?“ - ანუ პოლიტიკოსებში 3-4 გვარის გარდა არავინ არავის არაფერს ეუბნება მიუხედავად იმისა, რომ შეიძლება ისინი ათეულობით წლების მანძილზე პოლიტიკოსებად იწოდებოდნენ, - ასე აფასებს პოლიტიკური ექსპერტი გია ხუხაშვილი „ქართული ოცნების“ მიერ დღეს წარდგენილი კანდიდატების სიას.
მმართველმა გუნდმა დღეს 2020 წლის საპარლამენტო არჩევნების კამპანია წამოიწყო და საქართველოს მასშტაბით მაჟორიტარი დეპუტატობის კანდიდატები წარადგინა. კოჯორში “ბიოლის” კომპლექსში ღონისძიების გამხსნელი სიტყვა ქართული ოცნების თავმჯდომარემ ბიძინა ივანიშვილმა წარმოთქვა. მაჟორიტარები ქართულმა ოცნებამ 30-ვე ერთმანდატიან მაჟორიტარულ ოლქში წარადგინა, აქედან 8 თბილისში, 22 კი რეგიონებში.
გია ხუხაშვილი მმართველი გუნდის უცვლელ პრინციპებსა და მორჩილების უცვლელ პოლიტიკაზე საუბრობს და აღნიშნავს, რომ ორიენტირი წელსაც არა პოლიტიკურ აქტივობასა და მომავლის ხედვაზეა აღებული, არამედ ბიძინა ივანიშვილის რესურსებსა და ავტორიტეტზე.
„არაფერი იცვლება მიუხედავად იმისა, რომ მაჟორიტარი დეპუტატების კანდიდატების რაოდენობა შემცირდა. კანდიდატების რაოდენობის შემცირება კარგია, ისტორიული მონაპოვარია იმიტომ, რომ საკმაოდ მანკიერი სახე აქვს უკვე მიღებული. მაგრამ მათი „ფედერაციის“ ალგორითმი არ იცვლება, ისევ მორჩილებაზეა აგებული და არა იმ კრიტერიუმებზე, რასაც აქტიური პოლიტიკური მოღვაწეობა, მომავალზე ორიენტირებულობა და პროფესიონალიზმი ჰქვია. ეს სისტემა აგებულია მორჩილებაზე, გარკვეულ რესურსებზე და წარმოდგენილია ადამიანები, რომლებიც პარტიიდან პარტიაში გადადიოდნენ მთელი ცხოვრება. რეალურად „ოცნება“ ისეა სტრუქტურირებული, რომ იქ ყველგან კენჭს იყრის ბიძინა ივანიშვილის რესურსები და გახარიას ავტორიტეტი, ეს გაამრავლეთ 30-ზე და ეგ არის. აქ პიროვნებები არაფერს არ წყვეტენ.
არცერთ კანდიდატს კონკრეტულად არ განვიხილავ, მაგრამ დავით სერგეენკო შედარებით უკეთესად გამოიყურება, თუმცა სასაცილოა, რომ სერგეენკოს როდესმე რომელიმე განზომილებაში საკუთარი რესურსებით რამე პოლიტიკური შედეგის მოტანა შეუძლია. ის გაუგებრობაში იყო პოლიტიკაში ყოფნისას, წვალობდა და ბოლო ბოლო დაიხსნა თავი, მაგრამ როგორც ჩანს ვერ,“ - განმარტა გია ხუხაშვილმა.
განხორციელებული საკონსტიტუციო ცვლილების მიხედვით, დედაქალაქში 8 მაჟორიტარული ოლქი შეიქმნება და შესაბამისად, პოლიტიკური პარტიები 8 მაჟორიტარ კანდიდატს დაასახელენ.2020 წელს საპარლამენტო არჩევნები 120/30 საარჩევნო სისტემით ჩატარდება, საიდანაც 30 მაჟორიტარული წესით არჩეული დეპუტატი იქნება, 120 კი პროპორციული სისტემით.
საქართველოში საპარლამენტო არჩევნები 31 ოქტომბერს ჩატარდება.
მარიამ მორგოშია