კუზანოვის პლასტიკური ქირურგიის კლინიკები და ოფისები რამდენიმე ქვეყანაში უკვე წარმოდგენილია. თუმცა მალე კლინიკის ოფისი კანადაშიც გაიხსნება. ამჟამად ძალიან დიდი მოთხოვნაა პლასტიკურ ქირურგიაზე ისრაელსა და საბერძნეთში, შესაბამისად კუზანოვის კლინიკები, ამ კუთხით საკმაო დატვირთვით მუშაობენ. როგორც „კომერსანტს“ კუზანოვის კლინიკის დირექტორმა ავთანდილ ტუღუშმა განუმარტა ისრაელში პლასტიკური ქირურგია უკვე აუცილებლობისა და ტრენდის სახეს იძენს, თუმცა ძალიან ძვირადღირებულია, ამიტომ  აქ სწორედ ისრაელიდან ქართული მომსახურების მისაღებად კლინიკის ოფისების მეშვეობით ჩამოდიან.

„ამჟამად კუზანოვის კლინიკების ოფისები ისრაელსა და საბერძნეთშია. ოფისების გახსნა იგეგმებოდა მინსკში, ვენაში და  ტორონტოში, თუმცა პანდემიის გამო ჯერჯერობით თავი შევიკავეთ.

ზოგადად, ისეთ ქვეყნებს ვაქცევთ ყურადღებას, სადაც სადაც პლასტიკური ქირურგია ძვრადღირებულია. ისრაელში ძალიან ძვირი ღირს პლასტიკური ქირურგია. ამ დროს, ისრაელსა და საქართველოს შორის მიმოსვლა პანდემიამდე იყო უფრო იოლი, თითქმის ყოველდღე დაფრინავდა თვითმფრინავი. თან კარგად იციან საქართველო, ტურისტული თვალსაზრისით. ბევრი ებრაელი ქართველი არის წასული ისრაელში და საქართველოზე იციან, რომ კარგი სპეციალისტები გვყავს, აქედან გამომდინარე ფასიც და ყველაფერი მოქმედებს. თუ ცხვირის ოპერაცია ჩვენთან 1500 ევრო ღირს, იქ ღირს 7 და 8 ათასი ევრო.  აქედან გამომდინარე ისინი ჩამოდიან და ორ კურდღელს კლავენ, თან საქართველოს ეცნობიან ტურისტულად, თან პლასტიკურ ოპერაციას იკეთებენ. ისრაელში პლასტიკური ქირურგია უფრო მოთხოვნადია და მოდაშიც კია, არ მალავენ რომ პლასტიკურ ქირურგიას იკეთებენ.

ჩვენ ვხედავთ პაციენტები საიდან ჩამოდიან უფრო მეტად, რატომ ჩამოდიან აქ , ვატარებთ პრეზენტაციებს, ვატარებთ კონსულტაციებს და იმის მიხედვით ანალიზს ვაკეთებთ, ღირს თუ არა იქ ოფისის გახსნა. საბერძნეთში კი არა მარტო ოფისია, არამედ კლინიკაც, სადაც ვაკეთებთ ოპერაციებს,“ - განმარტავს ავთანდილ ტუღუში.