საქართველოს მთავრობის მიერ შექმნილი ახალი სსიპ კურორტების განვითარების სააგენტო, რომელიც ეკონომიკის სამინისტროს დაქვემდებარებაში იქნება, რამდენიმე დღეში უნდა ამუშავდეს. სააგენტოს სანდრო ონოფრიშვილი უხელმძღვანელებს, რომელიც სამთო საკითხებში ეკონომიკის მინისტრის მრჩევლის პოზიციას იკავებდა.
რატომ გახდა საჭირო დამატებით, ახალი ბიუროკრატიული რგოლის შექმნა? მით უმეტეს, არსებობს მთის კურორტების მართვის კომპანია (სახელი კი შეეცვალა მაგრამ არსი დარჩა), ასევე ტურიზმის განვითარების სააგენტო, აჭარის კურორტების განვითარების სააგენტო სხვა ამავე ტიპის უწყებები.
მთავრობა ამ სააგენტოზე დიდ იმედებს ამყარებს, ამბობენ რომ „ეს იქნება მცირე მობილური ჯგუფი, რომელიც სხვადასხვა უწყების კოორდინაციას იმგვარად განახორციელებს, რომ მოხდეს პოტენციალის შესწავლა, კურორტების სივრცითი დაგეგმვა, რადგან ქაოტური განაშენიანება, ინვესტიციების დატაცება და ბევრი სხვა რამ არ მივიღოთ. საინვესტიციო პაკეტების იმგვარად ჩამოყალიბება უნდა მოხდეს, რომ კერძო სექტორმა მოახერხოს ამ კურორტებში ეფექტიანად ინვესტირება“ (ეს განაცხადა ეკონომიკის მინისტრმა ლევან დავითაშვილმა).
რამდენად მცირე იქნება და როგორი ბიუჯეტით ახალი სააგენტო, ეს უცნობია, მაგრამ წინა არაერთი მაგალითი მიგვითითებს, რომ არ მცირე იქნება, არც დაბალბიუჯეტიანი და არც იმდენად ეფექტური, რომ რამდენიმე, შინაარსით ერთნაირი, უწყების შექმნა გამართლებული იყოს.
მთავრობისგან განსხვავებით, მსგავსი სსიპ-ების ეფექტიანობის არ სჯერათ დარგის სპეციალისტებს და მსგავს გადაწყვეტილებას უფრო თანხების გაუმჭვირვალედ გადინების საშუალებად მიიჩნევენ. ტურიზმის ეროვნული ადმინისტრაციის ყოფილი ხელმძღვანელი მაია სიდამონიძე „კომერსანტთან“ ამბობს, რომ ახალი ორგანიზაცია ტურიზმის ადმინისტრაციის დუბლიკაციაა.
„ახალი სსიპ კურორტების განვითარების სააგენტო ტურიზმის ადმინისტრაციის დუბლიკატია და ის მხოლოდ არამაზნობრივ ხარჯს გაზრდის, მნიშვნელოვანი დატვირთვა მას ვერ ექნება.
ტურიზმის ადმინისტრაციის მოვალეობას ისედაც წარმოადგენს კურორტების განვითარებაზე ზრუნვა, გარდა ამისა არსებობს მთის კურორტების განვითარებისთვის ცალკე უწყებაც. შესაბამისად, ახალი სსიპ-ის შექმნა, მით უმეტეს დღევანდელ რთულ ვითარებაში, როდესაც რეალური ტურიზმის კუთხით არც ისე სახარბიელო მდგომარეობაა, აბსოლუტურად არამიზნობრივი ხარჯია. ზოგადად წინააღმდეგი ვარ ახალი სტრუქტურული ორგანიზაციების შექმნის, როცა პირიქით, უკვე არსებულ ორგანიზაციებში დანახარჯების შემცირება არის საჭირო“, — ამბობს სიდამონიძე.
მთავრობის 20 ივნისს დადგენილების მიხედვითთ, სააგენტოს უფლებამოსილება განისაზღვრება დებულებით, რომელსაც ეკონომიკისა და მდგრადი განვითარების მინისტრი დაამტკიცებს; მინისტრი დანიშნავს და გაათავისუფლებს ასევე სააგენტოს დირექტორსაც. ახალი სააგენტოს დებულება ეკონომიკის მინისტრმა 2022 წლის 15 ივლისამდე უნდა დაამტკიცოს. 15 ივლისიდან დაიწყებს მუშაობას ახალი სააგენტოც.
„საქართველოში იდენტიფიცირებული და შესწავლილია 300-ზე მეტი კურორტი, ან საკურორტო ადგილი და მოქმედი მხოლოდ 100-ზე მეტია, რომელთაც სწორი განვითარება სჭირდებოდა. თითოეული ამ კურორტის განვითარებისთვის კონკრეტული ადამიანების ჯგუფი გვჭირდებოდა, რომელსაც გარკვეული ლეგიტიმაცია ექნებოდა, რომ სწორად განვითარდეს ეს კურორტები. ცალკე შექმნილი სსიპ ამ მხრივ მეტი ლეგიტიმაციის არის. პრემიერის ხელმძღვანელობით ამ პოტენციალის მაქსიმალურად გამოყენების მიზნით, მნიშვნელოვანი პრიორიტეტი გვაქვს დასახული“, — აცხადებს ლევან დავითაშვილი
ნინო თამაზაშვილი