2020 წელს „KTW ჯგუფი“ დეველოპერულ ბიზნესში შესვლას გეგმავდა, თუმცა, კოვიდ 19- მა კომპანიის გეგმები შეცვალა. ეკო-სოფლის პროექტის განხორციელება, რომელიც კახეთში ღვინის სოფელის აშენებას გულისხმობდა, დროებით შეჩერდა. როგორც „კომერსანტს“ “კახური ტრადიციული მეღვინეობის“ დამფუძნებელმა ზურაბ ჩხაიძემ განუცხადა,კომპანია ეკონომიკის სამინისტროსგან ელოდება გადაწყვეტილებას მიწების შესყიდვასთან დაკავშირებით. მისივე ინფორმაციით, წელს მიწის გარკვეულ ნაწილზე „KTW ჯგუფმა“ ვენახი უკვე გააშენა, ხოლო ნაწილი უკვე საკუთრებაში აქვთ და მის დამუშავებას შემოდგომაზე აუცილებლად გააგრძელებენ.
„როგორც მოგეხსენებათ ეს პროექტი არის ქართული, მე ვიტყოდი მსოფლიო ეკონომიკის ორგანული ნაწილი. ის შეფერხდა, მაგრამ ეს დროებითია. რაც შეეხება კონკრეტული განვითარების გეგმას, ჩვენ გვაქვს კომუნიკაცია ეკონომიკის სამინისტროსთან. ვფიქრობ, მალე იქნება გადაწყვეტილება მიღებული იმის შესახებ, რომ ამ მიწაზე საჭიროა მსგავსი ინვესტიციების განხორციელება. თუ ამის დამტკიცებაა საჭირო, ჩვენ მზად ვართ ეს უფრო მაღალ და პროფესიონალურ დონეზე წარმოვადგინოთ.
ამ ეტაპზე მიმდინარეობს კერძო მესაკუთრეებთან კომუნიკაცია. ვენახი ეკო-სოფელს გაუსწრებს წინ, ვინაიდან მას სამი წელი სჭირდება, რომ თავი დაიმაგროს და შედეგი მოიტანოს. ამასობაში გააქტიურდება სამშენებლო საქმიანობა. კონკრეტულად რომ ვთქვათ, ჩვენ ველოდებით დროულ გადაწყვეტილებას მიწების შესყიდვასთან დაკავშირებით“, - განმარტავს ზურაბ ჩხაიძე.
შეგახსენებთ, „კახური ტრადიციული მეღვინეობა“ ღვინის და სპირტიანი სასმელების მწარმოებელი ერთი-ერთი უმსხვილესი კომპანიაა საქართველოში და კავკასიის რეგიონში. კომპანია 2001 წელს დაფუძნდა, „KTW“ აწარმოებს ღვინოს, ბრენდს, შუშხუნა ღვინოს და ჭაჭას ტრადიციული ქართული ტექნოლოგიებით. 16 წლის განმავლობაში, „KTW“ ღვინის ექსპორტს მსოფლიოს 20–ზე მეტ ქვეყანაში ახორციელებს.კომპანიის წარმოების უმრავლესობა მისივე ვენახის ყურძნისგან მოდის. კომპანიის ვენახები ამჟამად 600 ჰექტარზე მთელი საქართველოს გარშემოა განლაგებული. ამჟამად „KTW“ 50-ზე მეტ ძირძველ ყურძნის ჯიშთან მუშაობს.
ბაჩო ადამია