„კახური ტრადიციული მეღვინეობის“(KTW ჯგუფი)  შვილობილი კომპანია KTW Development-ი ფიროსმანის ქუჩაზე ახალ, მრავალფუნქციური კომპლექსის აშენებას გეგმავს. 15 მილიონი ლარის ინვესტიციით პროექტის განხორციელება სექტემბერში დაიწყება და 15 თვეში დაასრულებს.

როგორც KTW-ს დამფუძნებელი და გენერალური დირექტორი ზურაბ ჩხაიძე „კომერსანტთან“ განმარტავს, ესაა პროექტი, რომელიც ხელს შეუწყობს ფიროსმანის ქუჩის ტურისტული მიმზიდველობის გაზრდას და მომავალში შესაძლოა ეს ადგილი „განახლებული ფიროსმანიც“ კი გახდეს.

„ჩვენთვის საინტერესო იყო ფიროსმანის ქუჩის ისტორიული დატვირთვა და ძველი თბილისის ის ხიბლი, რამაც შეიძლება ტურისტულად მიმზიდველი გახადოს ეს უბანი. ამიტომ გადავწყვტეთ, რომ ფიროსმანის ქუჩის განვითარებაში  მონაწილეობა მიგვეღო. ამჟამად მრავალფუნქციური კომპლექსის ტერიტორია ცარიელი ადგილია და ფაქტობრივად სანაგვედაა ქცეული. სამომავლოდ კი ეს იქნება ერთერთი მიმზიდველი ადგილი ვიზიტორებისთვის და პოტენციური მაცხოვრებლებისთვის. ეს იქნება თანამედროვე ტენოლოგიებით აღჭურვილი საცხოვრებელი და კომერციული დანიშნულების კომპლექსი, რომელშიც გათვლილია ორდონიანი საპარკინგე ადგილი და ეკოლოგიურად სუფთა მასალისგან დამზადებული საცხოვრებელი სივრცე. ეს ტერიტორია საინტერესოა და განვითარების პერსპექტივა აქვს, როგორც ტურისტული ასევე, ბიზნესის კუთხითაც. ადგილზე ვგეგმავთ კაფე/რესტორნებისა და საერთო გამოყენების სივრცეების შექმნას, რომელიც პროექტს ყველასათვის მიმზიდველს გახდის. თუ იქნება დაინტერესება ამ კონკრეტულ პროექტზე, სამომავლოდ ფიროსმანის უბნის განვითარებაზეც ვიზრუნებთ - განმარტავს ზურაბ ჩხაიძე.

კომპლექსი შედგება 4 ძირითადი ბლოკისგან, რომლის საცხოვრებელი სივრცის ბუნებრივი ვენტილირება იქნება შესაძლებელი და ზედა სართულებზე იქნება გამწვანებული სივრცე. პროექტი მოწონებულია თბილისის მერიის არქიტექტურული სამსახურის მიერ.

მარიამ მორგოშია