ერთი თვე გავიდა მას შედეგ რაც, კორონავირუსის გავრცელების საფრთხის გამო, საქართველოში არსებული კლუბები დაიხურა.საკლუბო სექტორმა მიიღო გადაწყვეტილება, რომ საჯარო შეკრებების დრო არაა და საკლუბო ღამეები გარკვეული დროით გააუქმოს. „კომერსანტი“ დაინტერესდა რა მასშტაბის დარტყმა მიაყენა კორონავირუსმა სექტორს და შეინარჩუნა თუ არა ბიზნესმა დასაქმებული ადამიანები. საკითხზე კლუბის „მტკვარზე“ ერთ-ერთი დამფუძნებლის ქეთა გაბუნია საუბრობს.

„მდგომარეობა რა თქმა უნდა ძალიან მძიმეა, როგორც ყველა სხვა სახელოვნებო სფეროსთვის, რომელიც ღონისძიებაზე და გამომუშავებაზეა დამოკიდებული. ჯერჯერობით ჩვენი მომავალი ბუნდოვანია, ჰაერში ვართ გამოკიდებულები. რთულ სიტუაციაში ვართ აბსოლუტურად ყველა, ტექნიკური თანამშრომლებით დაწყებული მუსიკოსებით დამთავრებული“, - ამბობს ქეთა გაბუნია.

როგორც ქეთა გაბუნია აცხადებს, ზარალი რომელიც ბიზნესს მიადგება ძალინ დიდი იქნება. მისი თქმით, კლუბი „მტკვარზე“ თვეში დაახლოებით 150 000 ლარი კარგავს. გაბუნიას განმარტებით ეს არის ის თანხა, რომლითაც კლუბში დასაქმებული ძალიან ბევრი ადამიანი ცხოვრობდა. მიუხედავად იმისა, რომ ერთი თვე გავიდა მას შედეგ რაც, ქვეყანაში საკლუბო ღამეები გაუქმდა, ქეთა გაბუნიას განცხადებით სექტორს არავინ შეხმიანებია. კლუბის დამფუძნებელს იმედი აქვს, რომ სახელმწიფო სახელოვნებო სივრცეებს ყურადღებას მიაქცევს და ამ მიმართულებით დაიწყებენ მუშაობას, რადგან მისი თქმით, ძალიან ბევრი ადამიანი დარჩა უმუშევარი.

„კლუბებმა, ფესტივალებმა და სხვადასხვა ღონიძიებების პრომოუტერებმა, ჩვენ სამუშაო ჯგუფი შევქმენით, სადაც ერთმანეთს აზრებს ვუცვლით ხოლმე, პრინციპში არც ერთ ჩვენგანს არავინ დაკავშირებია, ერთ-ერთ კლუბს შეეხმიანა სერგი გვარჯალაძე გასულ კვირას და ჰკითხა რით შეეძლო დახმარება.  ამის შემდეგ არანაირი კომუნიკაცია არ ჰქონიათ. სახელმწიფოს რა შეუძლია გააკეთოს ჩვენს დასახმარებლად, კონკრეტული არავის არაფერი უთქვამს. ერთი რაც არის, საშემოსავლო და მოგების გადასახადი არის შეჩერებული, მაგრამ რა მოგების გადასახადზეა ლაპარაკი, გაჩერებულია ყველაფერი. რატომ არ გამოდიან ხაზზე ვერ ვხვდები, როგორც ამბობენ მართავენ ამ კრიზისს, მაგრამ კრიზისის მართვა თუ არის აკრძალვები, აკრძალულ ადგილებში დასაქმებული ხალხის უზრუნველყოფა რაღაცნაირად უნდა მოახერხონ, თუმცა ამას არ აკეთებენ. ჩვენ გვინდა, შევეხმიანოთ ჩამოყალიბებული წინადადებებით და საკითხებით ახლა სწორედ ამაზე ვმუშაობთ, ვცდილობთ რომ ერთიან კონსესუსამდე მივიდეთ“, - განმარტავს ქეთა გაბუნია.

 სანამ სახელმწიფო ჩაერთვება პროცესში, პრობლემების მოგვარებას კლუბ „მტკვარზე“-ს მენეჯმენტი სესხის დახმარებით ცდილობს. ქეთა გაბუნია ამბობს, რომ საბანკო სექტორი ბიზნესს სხვადასხვა ტიპის დახმარებას სთავაზობს.

„თანამშრომლებს მარტის თვის ხელფასი გადავუხადეთ. იქედან გამომდინარე, რომ ბიზნესს სესხის გადახდის პროცესში ვიყავით არ გვქონდა იმის ფუფუნება, რომ თანხა ანგარიშზე შეგვენახა. ზუსტად ამ მიზნით მივმართეთ ბანკს, რომ თანამშრომელთა ხელფასები გადავიხადოთ, თუნდაც შემცირებული. მიუხედავად იმისა, რომ სესხების გაცემის პროცესი გაჩერებულია, ცდილობენ დაგვეხმარონ, კარგად ხვდებიან რა მდგომარეობაში ვართ. ამიტომ ველოდებით რომ ბანკი დაგვიდგება მხარში და ამით მოვახერხებთ იმას, რომ ეს ადამიანები სრულიად შემოსავლის გარეშე არ დარჩნენ“, - განაცხადა ქეთა გაბუნიამ.

ბაჩო ადამია