ყველას ახსოვს საყიდლებზე შეკრებილი ხალხით გადატვირთული რიგები ლილოს ბაზრობის ტერიტორიაზე. ბევრისთვის ეს ადგილი კრონავირუსის გავრცელების ერთერთი ყველაზე სარისკო ზონაა, მაგრამ ბაზრობის დირექტორის გიორგი კვარაცხელიას თქმით, ბოლო პერიოდში ვაჭრობის შემცირების გამო, ხალხი თავისუფლად გადაადგილდება. მისივე თქმით, ადგილზე მომუშავე ობიექტებისთვის კრიზისული პერიოდი ჯერ კიდევ წინ არის.

„მაქსიმალურად ვცდილობთ ყველაფრის კონტროლს და გამოგვდის კიდეც. ყველას პირბადე უკეთია, ტარდება თერმოსკრინინგი და ნორმალურ ვითარებაში ვმუშაობთ. ალბათ გახსოვთ ის სივიწროვე და რიგები ბაზრობის ტერიტორიაზე, თუმცა დღეს ძალიან დიდი კლებაა ვაჭრობაში და ხალხი თავისუფლად მოძრაობს. თანაც, ჩვენ ღია სივრცე გვაქვს და პირბადე საკმარისია თავდაცვისთვის.

ახლა პატრული გვეხმარება და თან ხალხი შეშინებულია. ზოგი შეურაცხყოფად იღებს როცა პირბადის გაკეთებაზე შენიშვნას ვაძლევთ, ამიტომ როცა საჭიროა სანქციებიც იწერება,“ - ამბობს გიორგი კვარაცხელია.

რაც შეეხება ბაზრობის ბიზნესს, გიორგი კვარაცხელია მიიჩნევს, რომ კრიზისი მეწარმეებისთვის ჯერ კიდევ წინაა, რადგანაც პროდუქციას დისტანციურად იძენენ და გარკვეული ხარვეზები იქმნება, ამიტომაც აუცილებელია ფრენების დროული აღდგენა.

„კლება არის, მაგრამ კრიზისი ალბათ მერე იწყება, აქამდე გაძლების პერიოდი იყო. სავარაუდოდ კლება არის 25-30 პროცენტი, ეს დიდი შემცირებაა. ეს არა მხოლოდ პანდემიის გამო ხდება, არამედ საზოგადოების ფინანასური მდგომარეობის გამო, ასევე ბიზნესები ვერ მუშაობენ დღეს და შემოსავალი არ აქვთ.,“ - განმარტავს სავაჭრო სივრცის დირექტორი.

ონლაინ გაყიდვების აღმასვლის პერიოდი ლილოს ერთგულ მომხმარებელს ხელს არ უშლის, თუმცა  კვარაცხელია მიიჩნევს, რომ ხალხმა არაერთხელ გამოსცადა იმედგაცრუება ონლაინ პლატფორმებზე და ახლა კვლავ ხარისხის საკუთარი თვალითა და ხელით შეგრძნება ურჩევნიათ.

„ონლაინ-გაყიდვებს გარკვეული პერიოდი იყენებდნენ, როცა უფრო მეტად შიშის ფაქტორი არსებობდა, მაგრამ ჩემი ინფორმაციით დღეს ეს მაჩვენებელი შემცირებულია. რაღაცა ნაწილი დარჩა კვლავ ამ პლატფორმებზე და ეს მათი არჩევანია.

ინტრნეტით საქონლის შეძენას თავისი მინუსი აქვს -  ზომა, ფერი, ხელის შეხება, ხარისხი. იმედგაცრუებულები არიან და პრობლემებიც მეტი წარმოიშვება, შემსაბამისად როცა უსაფრთხო ვაჭრობაა ირჩევენ სავაჭრო ბაზრობას.

კრიზისში ვგულისხმობ, რომ იმპორტირებული საქონელი დისტანციურად ჩამოაქვთ და ასე მუშაობა გაუჭირდებათ, თუ ფრენები არ აღდგება. ბევრს საქონელში დეფიციტი აქვს,  ბევრ მეწარმეს გაურთულდა ვაჭრობა. ახლა იმედი აქვთ, რომ ჩავლენ და საქონელს თავად წამოიღებენ. პრობლემა ესაა, თორემ პანდემიას შევეგუეთ და ასეთი შიშის თვალებით აღარ იყურება ხალხი,“ - ამბობს გიორგი კვარაცხელია.

ლილოს ბაზრობის ტერიტორიაზე ფართომასშტაბიანი სკრინინგი 24 ივლისიდან დაიწყო.

მარიამ მორგოშია