საქართველოში კრიპტოვალუტის შესახებ კანონპროექტის განხილვა მიმდინარეობს. რეგულაცია არა კრიპტოვალუტის მაინინგს, არამედ ბაზრის შუამავლებს, კრიპტოვალუტის სავაჭრო პლატფორმებს, ბროკერებს და ბირჟებს შეეხება. ეროვნულმა ბანკის მიერ უკვე შემუშავდა ვირტუალური აქტივის მომსახურების პროვაიდერების საქმიანობის მარეგულირებელი სამართლებრივი ჩარჩოს პირველადი ვერსია.

Cryptal.com-ს დამფუძნებელი იოსებ ბოლქვაძე „კომერსანტთან“ ამბობს, რომ აღნიშნული რეგულაციების მიღების შემდეგ ქვეყანაში ინვესტიციებიც გაიზრდება და ბაზარიც უფრო კონკურენტუნარიანი გახდება.

„ეროვნული ბანკი გეგმავს კრიპტო ვალუტების რეგულაციას, რაც კარგი ნაბიჯია, რადგან საქართველო ერთ-ერთი პირველი ქვეყანა გახდება, სადაც კრიპტო აღიარებული იქნება, ჰაერში არ იქნება გამოკიდებული და ადგილობრივი კანონმდებლობა კრიპტო ტრანსაქციებს დაარეგულირებს.

ამ კანონმდებლობის და რეგულაციების არსებობის ფონზე, ბევრი უცხოური კომპანიისთვის, რომელიც კრიპტო აქტივების სერვისით არის დაკავებული, მიმზიდველი გახდება ჩვენი ქვეყანა და ინდუსტრია. აქ კომპანიის რეგისტრაციას, შესაბამისი ლიცენზიის აღებას და საქმიანობას განხორციელებას შეძლებენ, შესაბამისად გაიზრდება ინვესტიცია და ბაზარიც უფრო კონკურენტული გახდება“, — ამბობს იოსებ ბოლქვაძე.

როგორ ეროვნულ ბანკში აცხადებენ, საქართველოში კრიპტო ბაზრის რეგულირების კანონპროექტი მუშავდება და ახალი რეგულაციები სავარაუდოდ წელს შევა ძალაში. კანონპროექტი რამდენიმე სფეროს დაარეგულირებს, მათ შორის, მომხმარებელთა უფლებების დაცვას და კრიპტოვალუტით ვაჭრობას.

საწყის ეტაპზე ზედამხედველობა მოიაზრებს ვირტუალური აქტივის მომსახურების პროვაიდერების რეგისტრაციას, Fit and Proper შემოწმებასა და ფულის გათეთრებისა და ტერორიზმის დაფინანსების აღკვეთის ხელშეწყობის მიზნით ზედამხედველობას. აღსანიშნავია, რომ საკანონმდებლო ცვლილებები ითვალისწინებს გარდამავალ პერიოდს: ვირტუალური აქტივის მომსახურების პროვაიდერებს მიეცემათ დრო ორგანიზაციის საქმიანობის კანონმდებლობასთან შესაბამისობაში მოყვანის მიზნით. ქვეყნის ცენტრალურ ბანკში ამბობენ, რომ გამომდინარე იქედან, რომ ვირტუალურ აქტივებთან დაკავშირებული მომსახურება მომატებულ ML/TF რისკებთან არის დაკავშირებული, მათი ბუნებიდან გამომდინარე (ანონიმურობის მაღალ ხარისხი, ტრანზაქციების სისწრაფე, ტრანზაქციების მიკვლევის სირთულე და სხვ.) და მათი მომსახურების გამოყენება შეიძლება ხელსაყრელი იყოს დანაშაულებრივი საქმიანობისთვის, ეროვნული ბანკი აქტიურად მუშაობს შესაბამის საზედამხედველო ჩარჩოზე.

კემბრიჯის ალტერნატიული ფინანსების ცენტრის (CCAF) მიერ გამოქვეყნებული უკანასკნელი კვლევების თანახმად, საქართველო კრიპტოვალუტის მაინინგზე დახარჯული ელექტროენერგიის მოცულობით მსოფლიოში მეორე ადგილზე გავიდა. ვირტუალური ვალუტის გამომუშავებას კი ქვეყანაში 60 მეგავატი ელექტროენერგია ხმარდებოდა.