ციფრული ვალუტების მომხრეებს უყვართ ვირტუალური ფულისადმი ცნობილი ადამიანების, სპორტის და შოუ ბიზნესის წარმომადგენლების ინტერესზე საუბარი, თუმცა, ჯიუტად არ იმჩნევენ, რამდენად გაუმარტივა კრიპტოვალუტამ ცხოვრება ჰაკერებს და გამომძალველებს.

ამ თემას გამოცემა project-syndicate.org ვრცელ მასალას უძღვნის და წერს, რომ მაგალითად, აშშ-ის ერთ-ერთ უმსხვილეს ნავთობსადენზე განხორციელებული კიბერთავდასხმის ორგანიზატორებმა გამოსასყიდის სახით 5 მლნ. დოლარი მიიღეს და თანხა სწორედ ბიტკოინებში იყო გადახდილი.

ეს უკვე არა ერთეული შემთხვევა, არამედ ტენდენციაა - ანონიმური კრიპტოვალუტები გადასახადების დაფარვის, ფულის გათეთრების, ტერაქტების ორგანიზებისთვის და სხვა საშიში დანაშაულისთვის იდეალური იარაღი გახდა.

აზრი, თითქოს კრიპტოვალუტა დაგროვების უწყინარი საშუალებაა - წარმოუდგენლად მიამიტურია. საცალო ვაჭრობის ობიექტები, როგორც წესი, ვირტუალურ ფულს, ტრანზაქციებზე მაღალი დანახარჯების გამო, თითქმის არ იყენებენ, მაგრამ ნებისმიერი ადამიანისთვის, რომელსაც ფულის მოძრაობის კონტროლის თავიდან აცილება, უკანონო შემოსავლების გათეთრება, საერთაშორისო სანქციებისგან თავის დაღწევა, ან სხვა უამრავი დანაშაულის ჩადენა სურს - კრიპტოვალუტაზე უკეთეს მოკავშირეს ვერ იპოვის.

ადრე თუ გვიან, მთავრობებს ვირტუალური ფულის ბრუნვის უფრო მკაცრი რეგულირება მოუწევთ. დღეს ეს პროცესი დაძრულია და წესით ამან კრიპტოვალუტაზე მოთხოვნა უნდა შეამციროს, მაგრამ ასე არ ხდება. მაშ რატომ ძვირდება კრიპტოვალუტა? პასუხს ნაწილობრივ იძლევა ეკონომიკური თეორია, რომლის თანახმადაც, ნულოვანი საპროცენტო განაკვეთების პირობებში ბაზარზე გიგანტური საპნის ბუშტები ჩნდება. ეს არის აქტივი, რომელსაც ფაქტიურად არანაირი ღირებულება არ გააჩნია, თუმცა, ამ ბაზარზე იმდენი მსხვილი ინსტიტუციური ინვესტორი შევიდა, რომ პოლიტიკოსებს კრიპტოვალუტების რეგულირება ძალიან გაუჭირდებათ.

სტატიის ავტორის აზრით, დროში რაც უფრო მეტად გაიწელება ციფრული ფულის კონტროლზე აყვანის პროცესი, მით უფრო გართულდება ამის გაკეთება მომავალში. ჩინეთის და სამხრეთ კორეის მთავრობებმა კრიპტოვალუტყებზე შეტევა უკვე დაიწყეს, თუმცა გაურკვეველია, რამდენად სერიოზულია მათი განწყობა ამ კუთხით.

ამერიკაში ფინანსური ლობი ციფრული ფულის რაიმე ტიპის რეგულირების მცდელობებს ჯერ-ჯერობით წარმატებით აკავებს.

ბაიდენის ადმინისტრაცია 10 000 დოლარზე მეტი მოცულობის ტრანზაქციებზე სავალდებულო ანგარიშგების შემოღებას გეგმავს, თუმცა, ეს საკმარისი არაა - კრიტპოვალუტების გაკონტროლებისთვის გაცილებით მეტი საერთაშორისო კოორდინირებაა საჭირო, როგორც მინიმუმ, განვითარებულ ქვეყნებში.

ბიტკოინი გლობალური არალეგალური ეკონომიკის მამოძრავებელი ძალა გახდა, და მისი კონტროლზე აყვანისთვის  ძლიერ და მდიდარ ქვეყნებსაც კი ათწლეულები დასჭირდებათ. ვირტუალური ფულისთვის ეს სიკვდილ-სიცოცხლის საკითხია - მისი მთავარი, და თითქმის ერთადერთი აშკარა უპირატესობა ხომ სწორედ ანონიმურობა და უკონტროლობაა - როგორც კი ის ოფიციალური რეგულირების ჩარჩოებში მოექცევა, მასზე მოთხოვნა დრამატულად შემცირდება.

არავინ არ უპირისპირდება ბლოკჩეინის ტექნოლოგიას, რომელიც კრიპტოვალუტების საფუძველს წარმოადგენს და მას ადამიანების ყოფის გაუმჯობესების უზარმაზარი პოტენციალი გააჩნია.

გარკვეულწილად, კრიპტოინდუსტრია ენერგეტიკაში პროგრესსაც ხელს უწყობს  - ვირტუალური ფულის მოპოვებას იმდენი ელექტროენერგია სჭირდება, რომ ნაწილობრივ ამის გამო მსოფლიოში ალტერნატიულ ენერგეტიკაში ახალი ტექნოლოგიები იქმნება.

კრიპტოინვესტორებისთვის სამწუხაროდ, ჰაკერების და გამომძალველების აქტიურობა  შესაძლოა ის გარდამტეხი  მომენტი გახდეს, როდესაც რეგულატორები, ბოლოს და ბოლოს, ზომების მიღებას დაიწყებენ.

ძალიან ბევრი შედარებით მცირე, მსოფლიოში არცთუ ისე ცნობილი კომპანია გახდა ვირტუალური გამოძალვის მსხვერპლი და ეს სერიოზული პრობლემაა. მთავრობებს იმ ძალებთან შერკინება მოუწევთ, რომლებმაც კრიპტოვალუტის სახით არალეგალური შემოსავლის მიღების იდეალური საშუალება მიიღეს.

რეგულატორებმა უნდა გამოიღვიძონ, სანამ გვიანია არა.

წყარო: project-syndicate.org