“კრედო ბანკმა“ ეროვნულ ბანკს „ფინკა ბანკის“ აქციების 100%-იანი წილის შესყიდვის ნებართვისთვის მიმართა. აღნიშნულთან დაკავშირებით სებ-ი განცხადებას ავრცელებს და აღნიშნავს რომ კონკურენციის შესაძლო დარევასთან დაკავშირებით საკითხს შეისწავლის და გადაწყვეტილებას ვებგვერდზე გამოაქვეყნებს.

კონკურენციის შესახებ საქართველოს კანონსა და „ეროვნული ბანკის შესახებ ორგანულ კანონში 2020 წელს განხორციელებული ცვლილებებით დაზუსტდა ეროვნული ბანკის უფლებამოსილებები კონკურენციის პოლიტიკის განხორციელების პროცესში. ამავე ცვლილებებით განისაზღვრა ეროვნული ბანკის ვალდებულება  2021 წლის პირველ ივნისამდე შეემუშავებინა კონკურენციის პოლიტიკა მის რეგულირებას დაქვემდებარებული სუბიექტებისათვის. შედეგად, ეროვნულმა ბანკმა დაამტკიცა აქტები, რაც უფრო გამჭვირვალეს გახდის ეროვნული ბანკის მიერ კონკურენციასთან დაკავშირებით მიღებულ გადაწყვეტილებებს. კერძოდ, ეროვნული ბანკი იწყებს კონცენტრაციაზე (როცა ერთი რეგულირებული პირის მიერ ხდება მეორე რეგულირებული პირის შეძენა) მიღებული განაცხადების, ასევე ასეთი ტრანზაქციების კონკურენტულ გარემოსთან თავსებადობაზე ან კონკურენციის შესაძლო დარღვევასთან დაკავშირებული გადაწყვეტილებების (ინფორმაციის კონფიდენციალურობის დაცვით) ეროვნული ბანკის ოფიციალურ ვებგვერდზე გამოქვეყნებას.

ამჯერად საქართველოს ეროვნულმა ბანკმა, სს კრედო ბანკის მომართვის   საფუძველზე, დაიწყო ადმინისტრაციული წარმოება სს კრედო ბანკის მიერ სს ფინკა ბანკი საქართველოს აქციების 100%-ის შეძენის ტრანზაქციის (კონცენტრაციის) კონკურენტულ გარემოსთან შეფასების შესახებ.

დაინტერესებულ პირებს ვთხოვთ დაგეგმილი ტრანზაქციის კონკურენტულ გარემოსთან თავსებადობის შესახებ მოსაზრებები წარმოადგინონ 2021 წლის 28 ივნისის ჩათვლით შემდეგ ელ-ფოსტაზე: concentration@nbg.gov.ge

აქვე გაცნობებთ, რომ ეროვნული ბანკის მიერ კონცენტრაციის კონკურენტულ გარემოსთან თავსებადობის თაობაზე გადაწყვეტილება გამოქვეყნდება ეროვნული ბანკის ვებგვერდზე გადაწყვეტილების მიღებიდან 7 დღის ვადაში. - აღნიშნულია ეროვნული ბანკის მიერ გავრცელებულ განცხადებაში.