საერთაშორისო  დონორი ორგანიზაციების  მიერ ინფრასტრუქტურულ პროექტებზე გამოყოფილი თანხების ათვისება ვერ ხდება

საერთაშორისო დონორი ორგანიზაციების მიერ ინფრასტრუქტურულ პროექტებზე გამოყოფილი თანხების ათვისება ვერ ხდება

access_time2019-03-27 10:00:54

„ინფრასტრუქტურული პროექტებისთვის საერთაშორისო ორგანიზაციების მიერ გამოყოფილი თანხების აუთვისებლობა ძალიან ცუდად იმოქმედებს ქვეყნის რეპუტაციაზე, ეკონომიკაზე, მოსახლეობაზე და ბიუჯეტზე,“ - ასე აფასებენ დარგის სპეციალისტები 2018 წელს დონორების მიერ დაფინანსებულ 14 პროექტზე მიღებული თანხების აუთვისებლობას.  


საქართველოში კაპიტალური პროექტების უმეტესობა საგარეო საკრედიტო რესურსით ფინანსდება. მსხვილი საინვესტიციო პროექტების დამფინანსებლები უმეტესად საერთაშორისო ორგანიზაციები არიან, ისეთები როგორიცაა მაგალითად EBRD, World Bank, EIB და ა.შ.


 უმეტეს შემთხვევაში, 2018 წელს მათ მიერ გამოყოფილი თანხების ათვისება საკმაოდ დაბალია, 14 პროექტის შემთხვევაში კი კრედიტორებისგან მოზიდული თანხების ათვისება საერთოდ არ მომხდარა. ამის შესახებ ინფორმაცია Forbs Georgia-მ გაავრცელა.


აღსანიშნავია, რომ  აღნიშნული თანხების დროული და დაგეგმილი ათვისება განსაკუთრებით მნიშვნელოვანია იმ კრედიტების შემთხვევაში, რომელიც ითვალისწინებს ვალდებულების გადასახადის (Commitment Fee) გადახდას კრედიტის აუთვისებელ ნაწილზე. ასევე, საქართველოს საგარეო სახელმწიფო ვალის 70%  სწორედ საერთაშორისო ორგანიზაციებზე მოდის. მათ შორის, საქართველოს ყველაზე მეტი ვალი - 4.9 მილიარდი ლარი მსოფლიო ბანკის მიმართ აქვს.


ამ ყველაფრის ფონზე „კომერსანტმა“ ექსპერტებს შემდეგი კითხვით მიმართა  როგორ აისახება ქვეყნის იმიჯზე ის ფაქტი, რომ წლიდან წლამდე ვერ ხდება  საერთაშორისო ორგანიზაციების მიერ დაფინანსებული პროექტების განხორციელება?


დარგის სპეციალისტები თანხმდებიან, რომ მსგავსი ფაქტი ქვეყნის რეპუტაციისთვისაც ცუდია და შიდა ეკონომიკურ მოვლენებზეც უარყოფითად აისახება. ირაკლი მაკალათია და ზვიად ხორგუაშვილი რამდენიმე მნიშვნელოვან ფაქტორს გამოყოფენ:


ირაკლი მაკალათია:



„როდესაც კრედიტორები ხედავენ, რომ ქვეყანა თანხას ვერ ხარჯავს და დაფინანსებულ ინფრასტრუქტურულ პროექტს ვერ ახორციელებს, ცხადია დიდი რისკია  ეს ცუდად აისახოს შემდგომ ტრანზაქციებსა და გადმორიცხვებზე. ასევე ყველა ეს პროექტი იდეაში ემსახურება საზოგადოებრივ კეთილმოწყობას და გამოდის, რომ მოსახლეობა დაზარალდა. მესამე ფაქტორია, როდესაც გარკვეული კრედიტები ვერ აითვისება, ხშირად ქვეყანას ჯარიმა ეკისრება. კიდევ ერთი, როდესაც ხდება დიდი ოდენობით ფულის მიწოდება წლის ბოლოს, ეს გარემოება უარყოფითად აისახება სავალუტო ბაზარზეც. ესე იგი, ყველა შემთხვევაში ცუდ მოვლენასთან გვაქვს საქმე - ცუდია იმიჯისთვის, ეკონომიკისთვის, მოსახლეობისთვის და ბიუჯეტისთვის“.


ირაკლი მაკალათიას  მოსაზრებას იზიარებს ფინანსისტი ზვიად ხორგუაშვილიც:



„ეს პროცესი ქვეყნის რეპუტაციაზე ცალსახად უარყოფითად აისახება, რადგან მთავრობა ნაკისრ ვალდებულებას ვერ ასრულებს. შედეგად ქვეყნები, რომლებიც საქართველოს მიზნობრივ ვალებს აძლევენ, სკეპტიკურად შემოგვხედავენ. მეორე ამბავია ის, რომ ხელისუფლებას აშკარად სერიოზული პრობლემები აქვს ინფრასტრუქტურული პროექტების ათვისებასთან დაკავშირებით. მაგალითად, რაც მთავრობამ 2018 წლის 11 თვეში დახარჯა, ის უნდა აეთვისებინა მხოლოდ ერთ თვეში. ესე იგი, ინფრასტრუქტურული პროექტები ძალიან, ძალიან ცუდად იყო დაგეგმილი და ვერ შესრულდა“.


ირაკლი მაკალათიას მსგავსად ხორგუაშვილი პრობლემებს ხედავს სამომავლო პერსპექტივაშიც:


„როდესაც მომავალშიც მოგვინდება მსგავსი ტიპის სესხის აღება, არსებული მძიმე გამოცდილების გამო სავარაუდოდ სანდოობა დაიკლებს და კრედიტორებიც არამომგებიან პირობებს შემოგვთავაზებენ“.


ფინანსისთი ზვიად ხორგუაშვილი ამ მოცემულობაში ერთადერთ დადებით ეფექტს მაინც ხედავს. ეს საგარეო ვალის შემცირებაა.


„ზოგადად რთული ვითარება გვაქვს საგარეო ვალთან მიმართებაში, რადგან მოკლე დროში მთავრობამ ზედმეტად ბევრი ისესხა. ამიტომ, ამ სიტუაციაში მისი არაკომპეტენტურობა დადებითად აისახა უშუალოდ საგარეო ვალზე. ეს არის ერთადერთი დადებითი ამბავი, რაც ამ მოვლენას უკავშირდება. სხვა შემთხვევაში კი დიახ, ეკონომიკისთვისაც, იმიჯისთვისაც და მოსახლეობისთვისაც ძალიან ცუდი ფაქტია“,- აღნიშნავს ზვიად ხორგუაშვილი.


დონორი ორგანიზაციების მიერ დაფინანსებული 14 პროექტი, რომლის დაფინანსებაზე მიღებული თანხები ხელისუფლებამ ვერ აითვისა, შემდეგია:  


მდინარე დებედაზე ხიდის მშენებლობა (EBRD)

2018 წლის გეგმა - 4,200,000 ლარი

12 თვის ფაქტობრივი შესრულება - 0%


თბილისი-სენაკი-ლესელიძის საავტომობილო გზის ძირულა არგვეთას მონაკვეთის რეკონსტრუქცია-მშენებლობა (JICA)

2018 წლის გეგმა - 52,450,000 ლარი

12 თვის ფაქტობრივი შესრულება - 0%


თბილისი-წითელი ხიდის (აზერბაიჯანის რესპუბლიკის საზღვარი) საავტომობილო გზის კმ22-კმ57 რუსთავი-წითელი ხიდის მონაკვეთის მშენებლობა (EIB)

2018 წლის გეგმა - 17,350,000 ლარი

12 თვის ფაქტობრივი შესრულება - 0%


ალგეთი-სადახლოს საავტომობილო გზის მშენებლობა-მოდერნიზაცია (EIB)

2018 წლის გეგმა - 17,350,000 ლარი

12 თვის ფაქტობრივი შესრულება - 0%


მცხეთა-სტეფანწმინდა-ლარსის საავტომობილო გზის ქვეშეთი-კობის მონაკვეთზე საავტომობილო გზის და გვირაბის მშენებლობა (ADB)


2018 წლის გეგმა - 43,175,000 ლარი

12 თვის ფაქტობრივი შესრულება - 0%


საქართველოს სატრანსპორტო კომუნიკაცია (EIB)

2018 წლის გეგმა - 7,600,000 ლარი

12 თვის ფაქტობრივი შესრულება - 0%


თბილისი-ბაკურციხე-ლაგოდეხის საავტომობილო გზის კმ20-კმ50 ლოჭინი-საგარეჯოს მონაკვეთის მშენებლობა (EIB)

2018 წლის გეგმა - 16,400,000 ლარი

12 თვის ფაქტობრივი შესრულება - 0%


საქართველოს მუნიციპალური ინფრასტრუქტურის განახლების პროექტი (EIB)

2018 წლის გეგმა - 800,000 ლარი

12 თვის ფაქტობრივი გეგმა - 0%


ჭიათურის საბაგირო გზების რეკონსტრუქცია-რეაბილიტაციის პროექტი (Government of France)

2018 წლის გეგმა - 1,000,000 ლარი

12 თვის ფაქტობრივი გეგმა - 0%


ქობულეთის წყალარინების პროექტი (EBRD, ORET)

2018 წლის გეგმა - 2,500,000 ლარი

12 თვის ფაქტობრივი გეგმა - 0%


ქვემო ქართლის ნარჩენების მართვის პროექტი (EBRD, SIDA)

2018 წლის გეგმა - 550,000 ლარი

12 თვის ფაქტობრივი შესრულება - 0%


აგროკრედიტი (EIB)

2018 წლის გეგმა - 10,000,000 ლარი

12 თვის ფაქტობრივი შესრულება - 0%


თბილისის საჯარო სკოლების რეაბილიტაცია და ენერგო ეფექტურობის გაზრდის პროექტი (E5P, CEB)

2018 წლის გეგმა - 10,000,000 ლარი

12 თვის ფაქტობრივი შესრულება - 0%


აჭარის მყარი ნარჩენების პროექტი (EBRD)

2018 წლის გეგმა - 4,000,000 ლარი

12 თვის ფაქტობრივი გეგმა - 0%

(წყარო: Forbs Georgia)





სალომე ლემონჯავა 





StopCoV ფონდში ჩარიცხული თანხა 23 793 096 ლარიდან 124 543 899 ლარამდე გაიზარდა

StopCoV ფონდში ჩარიცხული თანხა 23 793 096 ლარიდან 124 543 899 ლარამდე გაიზარდა
access_time2020-04-09 00:50:17
StopCoV ფონდში ჩარიცხული თანხის მაჩვენებელი 124 543 899 ლარამდე გაიზარდა. მონაცემები საქართველოს მთავრობის...

თბილისის სახელმწიფო უნივერსიტეტის სტუდენტებს „გრანთ თორნთონის“ სტიპენდია გადაეცათ

თბილისის სახელმწიფო უნივერსიტეტის სტუდენტებს „გრანთ თორნთონის“ სტიპენდია გადაეცათ
access_time2020-04-08 21:20:49
ივანე ჯავახიშვილის სახელობის თბილისის სახელმწიფო უნივერსიტეტის  3 სტუდენტი კომპანია „გრანთ თორნთონის“ სტიპენდიანტი გახდა.  ეკონომიკისა და ბიზნესის ფაკულტეტის სტუდენტები თამარ ათოშვილი, ანა ბუხრაშვილი და ელენე ცეცხლაძე სპეციალურ სტიპენდიას 2019-2020 სასწავლო წლის გაზაფხულის სემესტრში მიიღებენ.   როგორც „გრანთ თორნთონის“ მმართველმა პარტიორმა ვახტანგ ცაბაძემ განაცხადა,  კომერციული სექტორის ჩართულობა და სტიპენდიების დაწესება სახელმწიფო უნივერსიტეტებში,...

ლიბერთი ბანკის მმართველ გუნდში ცვლილებებია

ლიბერთი ბანკის მმართველ გუნდში ცვლილებებია
access_time2020-04-08 19:50:52
თბილისი, 8 აპრილი, 2020 - დღეს, ლიბერთი ბანკის მმართველ გუნდს, გენერალური დირექტორის მოადგილის, ფინანსური დირექტორის პოზიციაზე, დავით წიკლაური შეუერთდა. დღემდე, ამ პოზიციას ლევან ლეკიშვილი იკავებდა.   დავით წიკლაურს საბანკო სექტორში მუშაობის მრავალწლიანი გამოცდილება აქვს, როგორც საქართველოში ასევე საქართველოს საზღვრებს გარეთ. მას არაერთი პოზიცია ეკავა ქვეყნის წამყვან ბანკებში თიბისი ბანკის გენერალური დირექტორის მოადგილის, კორპორაციული საბანკო საქმიანობის მიმართულებით...

მსოფლიოს მსხვილი რესტორნების ქსელები კრიზისის გადასალახად პროდუქტების მაღაზიებად იქცნენ

მსოფლიოს მსხვილი რესტორნების ქსელები კრიზისის გადასალახად პროდუქტების მაღაზიებად იქცნენ
access_time2020-04-08 20:00:05
კორონავირუსის პანდემიამ რესტორნების ბიზნესს უმძიმესი დარტყმა მიაყენა. ყველაზე მაღალშემოსავლიანი დაწესებულებები უპრეცედენტო ვარდნის წინაშე აღმოჩნდენ, რამაც თანამშრომლების შემცირება გამოიწვია. გადარჩენის ინსტიქტმა რესტორნები აიძულა შემოსავლის ტემპის შესანარჩუნებლად ახალი გზები მოეძებნათ. ზოგი პროდუქტების მაღაზიად იქცა და ზოგი ფერმერების დახლის ფუნქციას ითავსებს,  სადაც მომხმარებელს ახალ პროდუქტის შეძენა და მისი სახლში მომზადება...

8 აპრილი - ქართული ლარი, თურქული ლირა და სომხური დრამი გაუფასურდა

8 აპრილი - ქართული ლარი, თურქული ლირა და სომხური დრამი გაუფასურდა
access_time2020-04-08 19:00:07
კორონავირუსის უარყოფითი ეფექტი რეგიონში ყველაზე მკვეთრად ქართული ლარის კურსზე აისახა, მარტის დასაწყისიდან ლარის მნიშვნელოვანი გაუფასურება დაიწყო და წლის დასაწყისთან შედარებით, დაახლოებით 22%-ით გაუფასურდა. Bloomberg-ის სავაჭრო სისტემაშიც ბოლო პერიოდის განმავლობაში ლარი ძირითადად მკვეთრად უფასურდებოდა, რეგიონის ვალუტის კურსები კი ან მცირედით და ეტაპობრივად უფასურდება, ან მყარდება. ეროვნული ბანკის მიერ გამოქვეყნებული 8 აპრილის ვაჭრობის შედეგად, ქართული ლარის კურსი მცირედით...


მსგავსი სიახლეები

up