ეპიდემიოლოგიური ვითარების დასტაბილურებას ხელისუფლება ამ დრომდე ვერ ახერხებს. საქართველოში ბოლო 28 დღის განმავლობაში კორონავირუსის 121,757 შემთხვევა გამოვლინდა, ხოლო 1,507 ადამიანი გარდაიცვალა. Worldometers -ის სტატისტიკური მონაცემების მიხედვით, მილიონ მოსახლეზე COVID-19-ით სიკვდილიანობით საქართველო მსოფლიოში მე-11 ადგილზეა, მაშინ როცა მეზობელი აზერბაიჯანი 98-ე ადგილს იკავებს, თურქეთი 88-ს ხოლო სომხეთი მე-19-ს.
„კომერსანტი“ დაინტერესდა, რატომ ვერ მართავს საქართველოს მთავრობა კორონავირუსით გამოწვეულ პანდემიას და ვინ არის პასუხისმგებელი ქვეყანაში შექმნილ რთულ ეპიდემიოლოგიურ მდგომარეობაზე. საკითხზე მედიაჰოლდინგთან მედიცინის მეცნიერებათა დოქტორი, ჯანდაცვის სპეციალისტი თენგიზ ვერულავა საუბრობს. იგი ამბობს, რომ გარდაცვალების მაღალი მაჩვენებელი საქართველოში იმუნიზაციის დაბალმა ტემპმა და პირველადი ჯანდაცვის განუვითარებლობამ განაპირობა. მისი თქმით, თუ შექმნილი კრიტიკული მდგომარეობა გაგრძელდა, ქვეყანა კატასტროფის წინაშე დადგება.
„პირველ რიგში გარდაცვალების მაღალი მაჩვენებელი განპირობებულია იმით, რომ აუცრელი ინფიცირებულების რაოდენობა ქვეყანაში ძალიან მაღალია. მეორე საკითხი არის ის, რომ საქართველოში პირველადი ჯანდაცვის სისტემა არ არის კარგად განვითარებული. კორონავირუსი ესაა დაავადება, რომლის მართვაც ხდება პირველადი ჯანდაცვის დონეზე. ასეთ დროს მთავარია პროფილაქტიკა, რაც ოჯახის ექიმის დონეზე წყდება და არა სტაციონარში. რეალურად რეაგირება უფრო გვიან ხდება.
აღსანიშნავია, რომ ქვეყანაში განათლების დონე ძალიან დაბალია და ამას ნათლად პიზას კვლევები აჩვენებს. ეს ადამიანებში ვაქცინაციის კუთხითაც აისახება. სამწუხაროდ ანტივაქსერული განწყობა არის არა მარტო მოსახლეობაში, არამედ სამედიცინო პერსონალშიც. როცა საქმე ჯანმრთელობას და ეპიდემიას ეხება, მე ვფიქრობ ვაქცინაცია სავალდებულო უნდა იყოს. ყველასთვის თუ არა რაღაც კონტინგენტისთვის მაინც, მაგალითად სამედიცინო პერსონალისთვის, მასწავლებლებისთვის, სტუდენტებისთვის და ა.შ. სტრატეგიული კომუნიკაცია ვაქცინაციის წასახალისებლად არ იყო ისეთი, როგორიც საჭიროა“, -განაცხადა თენგიზ ვერულავამ.
ჯანდაცვის სპეციალისტი ამბობს, რომ რთულ ეპიდემიოლოგიურ სიტუაციას, რთული პოლიტიკური მდგომარეობა დაემთხვა. თენგიზ ვერულავას თქმით, თავყრილობები ვირუსის გადაცემას კიდევ უფრო აძლიერებს. მეცნიერებათა დოქტორის განცხადებით, ქვეყანაში შექმნილ რთულ ეპიდემიოლოგიურ მდგომარეობაზე პასუხისმგებლობა კონკრეტულ ადამიანზე არ ვრცელდება. მისი განმარტებით, საზოგადოების დაუდევრობით და მთავრობის არაკომპეტენტური გადაწყვეტილებებით საქართველო მნიშვნელოვანი გამოწვევის წინაშე დადგა.
„ქვეყანაში შექმნილი ვითარება ერთი ადამიანის პასუხისმგებლობა არ არის. აქ თითოეული ადამიანის პასუხისმგებლობის საკითხი დგას, მათ შორის საზოგადოების, რომელიც საკუთარ ჯანმრთელობას სერიოზულად არ ეკიდება. ცხადია დგას სახელმწიფოს პასუხისმგებლობაც, რომელიც ხელს არ უწყობს სისტემურ გარდაქმნებს. თუმცა, მარტო სახელმწიფოს ბრალეულობა არ იკვეთება - მთავრობამ ვაქცინა შემოიტანა ჩვენ კი გარკვეული რაოდენობა გაგვიფუჭდა. პრობლემა არ გვაქვს გაცნობიერებული და ამ დრომდე შეთქმულების თეორიის და ჭორაობების დონეზე ვართ დარჩენილები. მეზობელ თურქეთში მოსახლეობის დაახლოებით 70 %-ია აცრილი, ცხადია განათლების დონე არ ყვავის, სწორედ ამიტომ პროცესში სახელმწიფო ჩაერია“, - აცხადებს თენგიზ ვერულავა.
მსოფლიოში COVID-19-ით სიკვდილიანობის მაჩვენებელი (Worldometers -ის სტატისტიკური მონაცემები მილიონ მოსახლეზე)
პერუ
ბულგარეთი
ბოსნია და ჰერცეგოვინა
ჩრდილოეთ მაკედონია
მონტენეგრო
უნგრეთი
ჩეხეთი
გიბრალტარი
ბრაზილია
რუმინეთი
საქართველო
სან-მარინო
არგენტინა
სლოვაკეთი
კოლუმბია