კოვიდით გარდაცვალებულთა დღიურმა რაოდენობამ 6 სექტემბრის შემდეგ პირველად 60-ს გადააჭარბა. თუ სექტემბრის ბოლოს ინფიცირებულთა დღიური რაოდენობა 1500-2000-ის ფარგლებში მერყეობდა გასულ კვირას 4000-ს გადააჭარბა, მიმდინარე კვირაში კი ერთხელ 6000-ზე მეტი შემთხვევაც დაფიქსირდა.
სიკვდილიანობა როგორც წესი პიკს ინფიცირებულთა რაოდენობის ზრდიდან ორ კვირაში აღწევს, რის გამოც უახლოესი მომავალი არადამაიმედებელია. პესიმიპისტურ პროგნოზს ჩავარდნილი ვაქცინაციაც აძლიერებს. 5 ნოემბერს მხოლოდ 4063 ადამიანი აიცრა, მაშინ როცა ვირუსი დამატებით 5340 ადამიანს დაუდასტურდა. 6 ნოემბრის მონაცემებით სულ 949 ათასი ადამიანია აცრილი, ანუ მთლიანი მოსახლეობის 25.6%. სიკვდილიანობის მნიშვნელოვნად შესამცირებლად კი მოსახლეობის მინიმუმ 60%-ის აცრაა საჭირო.
საქართველოში კოვიდით ინფიცირების პირველი შემთხვევა 2020 წლის 26 თებერვალს დაფიქსირდა. პირველი პაციენტი კი 4 აპრილს გარდაიცვალა. პირველ ტალღას საგანგებო მდგომარეობა და უმკაცრესი შეზღუდვები მოჰყვა. რამაც ეკონომიკის 6.2%-იანი ვარდნა გამოიწვია. ეპიდვითარება სექტემბერში გაუარესდა, 9 ნოემბერს კომენდანტის საათი ხელმეორედ გამოცხადდა და მხოლოდ 2021 წლის 1-ელ ივლისს მოიხსნა.
2020 წლის 31 დეკემბრის მდგომარეობით ინფიცირებულთა რაოდენობა 228 ათასს შეადგენდა. გასულ წელს კოვიდით 2505 ადამიანი გარდაიცვალა. წელს 10 თვესა და 5 დღეში კი ინფიცირებულთა რაოდენობა 515 ათასით გაიზარდა, საიდანაც 7795 გარდაიცვალა. განსაკუთრებით მძიმე აგვისტო აღმოჩნდა რა დროსაც კოვიდს 1588 ადამიანი ემსხვერპლა, 1538 ადამიანი დაიღუპა სექტემბერშიც. სექტემბრის პირველ რიცხვებში გარდაცვალების დღიური მაჩვენებელი 80-ს აჭარბებდა და შემდეგ შემცირდა. მძიმე ლოქდაუნი აღარ, მაგრამ 14 აგვისტოდან 13 სექტემბრამდე, მობილობის შემცირების მიზნით, საზოგადოებრივი ტრანსპორტი გაჩერებული იყო. მეორე ტურის შემდეგ გავრცელდა ხმა, რომ 4 ნოემბრიდან ტრანსპორტი ისევ გაჩერდებოდა, რაც ტყუილი აღმოჩნდა.
პირბადისგან განსხვავებით ვაქცინა ნებაყოფლობითად რჩება, იძულების წესი მხოლოდ ბიზნესის მცირე ნაწილმა გამოიყენა. პრეზიდენტმა 3 ნოემბრის ბრიფინგზე საპატრიარქოს ვაქცინის კურთხევისკენ მთავრობას კი კოვიდპასპორტების ამოქმედებასა და რისკჯგუფების იძულებით ვაქცინაციისკენ მოუწოდა.
9.3 მლნ-იან ისრაელში 5 ნოემბერს კოვიდით სულ 3 ადამიანი გარდაიცვალა, 47 მლნ-იან ესპანეთში 15 ადამიანი, 10 მლნ-იან პორტუგალიაში 4, ასევე 10 მლნ-იან საამიროებში 0 და 3.7 მლნ-იან საქართველოში 60. ისრაელში სრულად მოსახლეობის 65%-ა აცრილი, მინიმუმ 1 დოზით - 71%, ესპანეთში აცრილთა წილი მოსახლეობის 80%-ს შეადგენს, პორტუგალიაში 87%-ს აჭარბებს, საამიროებში კი სადაც აცრა 3 წლის ასაკიდან ნებადართულია, მინიმუმ 1 დოზით უკვე მოსახლეობის 97%-ა აცრილი, მათ შორის ორივე დოზით 87%, რაც შეეხება საქართველოს, საქართველოში მინიმუმ 1 დოზით 28.4% და ორივე დოზით 25.6%.