გარკვეული დროიდან კორონავირუსის პანდემია ზანზიბარში არავითარ როლს არ თამაშობს და ეს კუნძულოვან სახელმწიფოში მილიონობით ტურისტს იზიდავს.

ადამიანების ოცნება - ზღვაზე დასვენება სიმშვიდეში, კორონავირუსზე ფიქრის გარეშე - ზანზიბარში უკვე რეალობად იქცა.

ქვეყნის პრეზიდენტმა ჯონ მაგუფულის 2020 წლის ივნისში ეპიდემიის დასრულების შესახებ განაცხადა.

„ჩვენ ვლოცულობდით და ვმარხულობდით. ღმერთმა ჩვენ კორონავირუსისგან გვიხსნა“  - განაცხადა მან.

კუნძულოვანი სამოთხე კორონავირუსისგან თავისუფალია, პირველ რიგში იმიტომ, რომ აი უკვე რამდენიმე თვეა ქვეყანაში კოვიდ-ტესტები არ კეთდება. ტურისტები აქ ყოველგვარი შეზღუდვების გარეშე შემოდიან. ერთად-ერთი, რაც კორონავირუსის პრევენციის მიზნით კეთდება, არის სიცხის გაზომვა აეროპორტში.

საკმარისია, უცხოელს არ ჰქონდეს 37-ზე მაღალი ტემპერატურა და ის ყოველგვარი პრობლემების გარეშე ზანზიბარის პლიაჟებზე დასვენებას შეძლებს.

არის თუ არა ზანზიბარი მართლაც თავისუფალი ვირუსისგან? ეს საკამათო საკითხია, თუნდაც იმიტომ, რომ მეზობელ კენიაში, რომელთანაც საზღვრები ღიაა, დაინფიცირებულია 100 000-ზე მეტი ადამიანი და ეს მხოლოდ ოფიციალურად.

დამსვენებლების ინფორმაციით, ზანზიბარი დღეს სრულიად პარალელური სამყაროა - პირბადეებს არავინ ატარებს, საფეხბურთო მატჩები და წვეულებები ჩვეულებრივად ტარდება, რესტორნებიც გადავსებულია.

ასეთმა ზედაპირულმა დამოკიდებულებამ კოვიდის მიმართ აღაშფოთა საკონსულტაციო კომპანია Skytrax, რომელმაც ზანზიბარის აეროპორტი შეისწავლა.

„ჩვენ შოკირებულები ვართ ჯანდაცვის და უსაფრთხოების დაბალი სტანდარტებით აეროპორტში. ბოლო 8 თვის მანძილზე ჩვენ მსოფლიოს სხვადასხვა ქვეყნებში ბევრი აეროპორტი შევამოწმეთ. თუმცა, კოვიდის პრევენციის კუთხით, ზანზიბარის აეროპორტი ყველაზე უარესია. პანდემიასთან დაკავშირებული უსაფრთხოების პროტოკოლები იქ არათუ არ სრულდება, არამდე საერთოდ არ არსებობს“ - განცხადა კომპანიის გენერალურმა დირექტორმა ედვარდ პლეისტიდმა.

არავითარი რეგულაციები არ არსებობს  - ჰიგიენის დაცვა, დისტანცირება, პირბადეების ტარება, ამ საკითხებთან დაკავშირებით არანაირი მითითებები არ არის. ასევე შეუძლებელია სურვილის შემთხვევაში აეროპორტში პირბადის შეძენა.

აეროპორტში მხოლოდ რამდენიმე დისპენსერია მადეზინფიცირებელი სითხით, სულ ესაა უსაფრთხოების ზომები.

პრობლემას ისიც წარმოადგენს, რომ მგზავრთა დიდი რაოდენობის გამო აეროპორტში დისტანციის დაცვაც შეუძლებელია.

ზანზიბარს ტურისტები სხვადასხვა ქვეყნებიდან მიაწყდნენ, თუმცა, ყველაზე აქტიურად - რუსეთიდან და უკრაინიდან. ყოველდღიურად ამ ორი ქვეყნიდან ზანზიბარში 5 ჩარტერული რეისი სრულდება.

2020 წლის დეკემბერში და 2021 წლის იანვარში ტურისტების რაოდენობამ 2019 წლის ჯამურ მაჩვენებელს უკვე გადააჭარბა. და ეს მაშინ, როდესაც მთელი წელი ჯერ კიდევ წინაა.

წყარო: fr.de