ზემო იმერეთი-რაჭის დამაკავშირებელი გზის მშენებლობა დათქმულ ვადებში არ დასრულდება. ინფრასტრუქტურული პროექტი,რომელსაც თბილისიდან ონამდე მანძილი დაახლოებით 75 კმ-ით, ხოლო მგზავრობის დრო თითქმის 2 საათით უნდა შეემცირებინა 2022 წლამდე გადავადდა. „კომერსანტის“ კითხვაზე რატომ ვერ მოხერხდა დათქმულ ვადებში ინფრასტრუქტურული პროექტის დასრულება, საქართველოს საავტომობილო გზების დეპარტამენტში აცხადებენ, რომ მიზეზი ახალი კორონავირუსია.
მაშინ როდესაც საქართველოს მთავრობის წევრები აცხადებენენ, რომ პანდემიის დროს არც ერთი ინფრასტრუქტურული პროექტი არ გაჩერებულა, ირკვევა რომ ზემო იმერეთი-რაჭის დამაკავშირებელი გზის მშენებლობა გაჩერებული იყო.
სახელმწიფო უწყებაში საკითხზე დამატებით განმარტებებს არ აკეთებენ. „კომერსანტის“ მიერ საქართველოს საავტომობილო გზების დეპარტამენტიდან გამოთხოვილი საჯარო ინფორმაციით მხოლოდ პროექტის ვადები ხდება ცნობილი:
„საჩხერე - ქვემოხევი - უზუმთა - შქმერი - ზუდალის კმ 5.537-კმ 10.556 მონაკვეთის (ლოტი II) სარეაბილიტაციო სამუშოების დასრულების ვადად ხელშეკრულების მიხედვით განსაზღვრული იყო 2020 წლის 21 ივნისის ჩათვლით პერიოდი. თუმცა, სამუშაოების მიმდინარეობის პროცესში გამოვლენილი სხვადასხვა გაუთვალისწინებელი სამუშაოების, მნიშვნელოვნად გაზრდილი შესასრულებელი სამუშაოების მოცულობებისა და ახალი კორონავირუსის გავრცელებით გამოწვეული იძულებითი შეჩერების გამო, კონტრაქტორს სამუშაოების დასრულების ვადა გაუგრძელდა 2020 წლის 30 ნოემბრის ჩათვლით;
საჩხერე-ქვემოხევი-უზუნთა-შქმერი-ზუდალის მონაკვეთის კმ10.548-კმ20.548 მშენებლობაზე (ლოტი III) გაფორმებული ხელშეკრულების გათვალისწინებით, სამუშაოების დასრულების ვადად განსაზღვრულია სამუშაოების დაწყების შესახებ შემსყიდველის წერილობითი დავალების გაცემიდან 24 თვე (2021 წლის 25 სექტემბერი).
ამ მონაკვეთზე სამუშაოებს შპს ფერი ასრულებს. ხელშეკრულების ღირებულება 20 583 370 ლარია.
საჩხერე-ქვემოხევი-უზუნთა-შქმერი-ზუდალის მონაკვეთის კმ22.548-კმ29.393 მშენებლობაზე (ლოტი IV) გაფორმებული ხელშეკრულების გათვალისწინებით, სამუშაოების დასრულების ვადად განსაზღვრულია 2021 წლის 4 ივნისის ჩათვლით პერიოდი;
ამ მონაკვეთზეც სამუშაოებს შპს ფერი ასრულებს. ხელშეკრულების ღირებულება 17 426 924 ლარია.
საჩხერე-ქვემო ხევი-უზუნთა-შქმერი-ზუდალის მონაკვეთის კმ 29.5 - კმ 40.9 მშენებლობაზე (ლოტიV) გაფორმებული ხელშეკრულების გათვალისწინებით, სამუშაოების დასრულების ვადად განსაზღვრულია 2021 წლის 15 ივლისის ჩათვლით პერიოდი;
ამ მონაკვეთზე სამუშაოებს შპს New Road ასრულებს. ხელშეკრულების ღირებულება 18 688 888 ლარია.
საჩხერე - ქვემოხევი - უზუმთას საავტომობილო გზის შქმერი-ზუდალის კმ 40.9 -კმ 48.6 მონაკვეთის (ლოტი VI) სარეაბილიტაციო სამუშოების დასრულების ვადად ხელშეკრულების მიხედვით განსაზღვრული იყო 2020 წლის 18 ივნისის ჩათვლით პერიოდი. თუმცა, სამუშაოების მიმდინარეობის პროცესში გამოვლენილი სხვადასხვა გაუთვალისწინებელი სამშაოების, მნიშვნელოვნად გაზრდილი შესასრულებელი სამუშაოების მოცულობებისა და ახალი კორონავირუსის გავრცელებით გამოწვეული იძულებითი შეჩერების გამო, კონტრაქტორს სამუშაოების დასრულების ვადა გაუგრძელდა 2020 წლის 30 ნოემბრის ჩათვლით.
ამ მონაკვეთზეც სამუშაოებს შპს New Road ასრულებს. ხელშეკრულების ღირებულება 20 888 888 ლარია“, - ნათქვამია საავტომობილო გზების დეპარტამენტიდან გამოთხოვილი ინფორმაციაში.
ბაჩო ადამია