ტურიზმის სფეროს სპეციალისტები კოსმოტურიზმს დიდ მომავალს უწინასწარმეტყველებენ. ბანკ UBS-ის პროგნოზით, 2030 წლისთვის კოსმოსური ტურიზმის ბაზრის მოცულობა წელიწადში 3 მლრდ. დოლარს შეადგენს, ტურისტებს კი მრავალფეროვანი მომსახურება ელის. კოსმოსში სამოგზაუროდ წასულები შეძლებენ დედამიწის და კოსმოსის საზღვრამდე გაფრენას, მთვარის ირგვლივ მოგზაურობას და სხვა ინოვაციურ ტურისტულ პაკეტებს.
მიმდინარე წლის 16 სექტემბერს ილონ მასკის კომპანიის, SpaceX-ი, კუთვნილმა კოსმოსურმა ხომალდმა CrewDragon-მა შეასრულა პირველი რეისი მხოლოდ კოსმოსური ტურისტებისთვის. ხომალდი, რომლითაც 14 ადამიანი მოგზაურობდა, კოსმოსში 3 დღის მანძილზე იმყოფებოდა, მისი მოძრაობის მაქსიმალური სიმაღლე 584 კილომეტრი იყო, რაც გაცილებით მეტია, ვიდრე საერთაშორისო კოსმოსური სადგურის ადგილმდებარეობა (420 კმ.), მეტიც, ეს ცოტა უფრო მაღლაა, ვიდრე განლაგებულია ტელესკოპი „ჰაბლი“ (540 კმ.). 19 სექტემბერს Crew Dragon ფლორიდის სანაპიროზე დაეშვა და ამით ახალი, კოსმოსური ტურიზმის, ერა დაიწყო.
ცნობისთის, 16-19 სექტემბერს კოსმოსური მოგზაურობა სამოქალაქო პირების კოსმოსში მოგზაურობის პირველი შემთხვევა არაა. 2001 წელს დედამიწის ისტორიაში პირველი კოსმოტურისტი გახდა ამერიკელი მილიონერიდენის ტიტო, რომელმაც ამ სიამოვნებაში 20 მლნ. დოლარი გადაიხადა. მოგვიანებით, საერთაშორისო კოსმოსურ სადგურს კიდევ 6 ადამიანი ესტუმრა. თუმცა, ეს სრულფასოვან კოსმოსურ ტურიზმად ვერ ჩაითვლება. ყველა ამ შემთხვევაში სამოქალაქო პირები მონაწილეობდნენ ჩვეულებრივ, პროფესიულ კოსმოსურ ფრენებში, სადაც ასტრონავტები თავიანთი საქმით იყვნენ დაკავებულები.
პირველი კერძო კომპანია, რომელმაც ტურისტული ხომალდი Unity შექმნა, იყო რიჩარდ ბრენსონის Virgin Galactic, რომელიც 80 კილომეტრის სიმაღლეს უკვე ასცდა. აშშ-ის სამხედრო-საჰაერო სტანდარტებით სწორედ 80 კილომეტრის სიმაღლე ითვლება კოსმოსის საწყის წერტილად, თუმცა, საერთაშორისო საავიაციო სააგენტოს პარამეტრებით, კოსმოსი 100 კილომეტრში იწყება. მაგრამ რიგითი ადამიანი ვერანაირ სხვაობას ვერ დაინახავს. 80 კმ-ის, ისევე როგორც 100 კილომეტრის სიმაღლეზე, ჩანს შავი ცა, კაშკაშა ვარსკვლავები და დედამიწის ოვალური კონტურები. ეს სანახაობა რამდენიმე წუთი გრძელდება, რის შემდეგაც ხომალდი დედამიწის ატმოსფეროში ბრუნდება. ამის შემდეგ კომპანიის რაკეტა Unity-მ დედამიწის ორბიტაზე რამდენიმე საცდელი ფრენა შეასრულა. თუმცა, Virgin Galactic-მა კოსმოსში ჯერ მხოლოდ ერთი მგზავრი აიყვანა. ეს იყოს თავად რიჩარდ ბრენსონი, ხოლო სრულფასოვანი ტურისტული რეისები ჯერ-ჯერობით სამომავლო პერსპექტივად რჩება. რაც შეეხება, კოსმოსში მოგზაურობის ღირებულებას, ეს საკმაოდ ძვირი სიამოვნებაა. დღეს, როდესაც ტურისტული ფრენები ჯერ არ დაწყებულა, ბილეთი 250 000 დოლარი ღირს. ბრენსონის თქმით კი, მომავალში ფასი გაიზრდება.
კოსმოსური ტურიზმის დარგში დიდი გეგმები აქვს ასევე კომპანია Blue Origin-ს, რომელიც Amazon-ის დამაარსებელმა ჯეფ ბეზოსმა შექმნა. ამ კომპანიის სუბორბიტალური ხომალდი New Shepard 100 კმ. სიმაღლეზე დაფრინავს, ანუ, კოსმოსის საერთაშორისოდ აღიარებულ საზღვარს კვეთს. პირველი პილოტირებადი ფრენა 2021 წლის 20 ივლის სგანხორციელდა. მასში მონაწილეობდნენ თავად ბეზოსი, მისი ძმა მარკი და 2 უცხო პირი. ესეც უფრო საცდელ იფრენა იყო, ვიდრე ტურისტული. ამ კომპანიის ტურისტული რეისების დაწყების შემთხვევაში, სავარაუდოდ, ბილეთი New Shepard -ზე 100 000 დოლარი ეღირება.
SpaceX-მა შეასრულა პირველი, სრულად ტურისტული რეისი და ეს ახალი მიმართულების, კოსმოსურიტურიზმის, პირველი ნაბიჯი იყო.
ავტორი : თენგიზ აბლოთია
წყარო: forbes.ru