ვირლანდია - იგივე, სახედრების ფერმა თბილისთან ახლოს, გარდაბნის მუნიციპალიტეტის სოფელ გამარჯვებასთან მდებარეობს. ფერმაში ბაზრისთვის საკმაოდ იშვიათი - ვირის რძე იწარმოება, რომელიც ხალხურ და თანამედროვე მედიცინაში სამკურნალო თვისებების მქონე პროდუქტადაა აღიარებული.
5 წლის წინ, ფერმის თანადამფუძნებელმა, თორნიკე ტეფნაძემ პროდუქტის უნიკალური თვისებების შესწავლის შემდეგ, გადაწყვიტა შეექმნა ფერმა, რომელიც ვირის რძეს სამკურნალო დანიშნულებით აწარმოებდა. როგორც ფერმის დამფუძნებელი განმარტავს, ვირის რძის მთავარი გამორჩეული თვისებაა ის, რომ ყველაზე ახლოსაა თვისობრივად დედის რძესთან.
„უცხოური პრაქტიკის გაცნობისა და ვირის რძის სამკურნალო თვისებების გაცნობასთან ერთად შევისწავლეთ ცალკეული შემთხვევები ხალხურ მედიცინაშიც. დავამყარეთ კონტაქტები უცხოურ ფერმებთან, შევისწავლეთ იმუნოლოგების, პედიატრების და სამედიცინო ექსპერტების კვლევები. საქართველოში ვირის რძე უცხო პროდუქტია. პირველ რიგში, მთავარი გამორჩეული თვისება არის ის, რომ შესაძლებლობით ყველაზე ახლოს დგას დედის რძესთან და ამას გამოკვლევებიც ადასტურებს. გარდა ამისა, შეიცავს ანტიალერგიულ , ანტიმიკრობულ თვისებებს, D ვიტამინს. ვირის რძე ბავშვებისთვის განსაკუთრებით სასარგებლო პროდუქტია, რადგან მათში უფრო ხშირია რესპირატორული დაავადებები და სასუნთქი გზების ინფექციები“-აცხადებს ტეფნაძე.
ვირის რძის ღირებულება ერთი ლიტრი 60 ლარია. როგორც თორნიკე ტეფნაძე განმარტავს, ამ ღირებულების მთავარი განმსაზღვრელი არის ის, რომ ვირისგან რძე რთული მოსაპოვებელია და მცირე რაოდენობით ხდება.
ერთ-ერთი მთავარი სიახლე, რაც „ვირლანდიას“ სამომავლო გეგმებში შედის არის ვირის რძისგან კოსმეტიკური საშუალებების დასამზადება. ამ ეტაპზე ვირის რძისგან ფერმაში ხელნაკეთი საპნები მზადდება, რომლის ღირებულება 14 ლარია.
„სახედრის რძეს დიდი პოტენციალი და თვისებები აქვს თავის მოვლის კოსმეტიკურ საშუალებებისთვის. ვირის რძის ბაზაზე მზადდება საპნები, კრემები. ჩვენც დავიწყეთ ხელნაკეთი საპნების წარმოება, რომელიც ბევრ სხვა ბუნებრივ ნივთიერებებსაც შეიცავს და ძალიან მალე გაიყიდება ქართულ ბაზარზე. ვირის რძის ბაზაზე შექმნილი საპნები გაიყიდება ძალიან მალე. ეს ხელით მზადდება, ბუნებრივი ინგრედიენტებით“-აცხადებს ტეფნაძე.
„ვირლანდიას“ ფერმაში დასაქმებულია 6 ადამიანი. თავდაპირველი ინვესტიციის ნაწილი იდეამ პროგრამა „აწარმოე საქართველოში-ს“ ფარგლებში მიიღო.
მარიამ მორგოშია