კორონავირუსის გამო დროებით დაპაუზებულმა უძრავი ქონების ბაზარმა მუშაობა აქტიურად განაგრძო.  ბაზარზე  მოთხოვნა გაზრდილია  როგორც კომერციულ და საცხოვრებელ ფართებზე, ასევე სასოფლო-სამეურნეო მიწებზეც.უძრავი ქონების ბაზარზე კორონავირუსით გამოწვეულ ახალ ტენდენციებზე „კომერსანტთან“ უძრავი ქონების სააგენტო Kibe.ge-ს დირექტორმა ნელი გოგუაძემ ისაუბრა.

მისი ინფორმაციით,ბოლო რამდენიმე დღეა  ბაზარი გააქტიურდა და მოთხოვნა გაიზარდა როგორც არასასოფლო სამეურნეო მიწებზე, ასევე  საწარმოო მიწებსა და უძრავ ქონებაზე.  „ეს სასიხარულო ამბავია,  რადგან ადამიანები დაინტერესებულები არიან შეიძინონ მიწა და სასოფლო-სამეურნეო პროდუქტები თავად მოიყვანონ. ეს ტენდენცია კორონავირუსის შემდეგ უფრო შესამჩნევი გახდა.ვერ ვიტყვი, რომ მოთხოვნამ ყოველგვარ მოლოდინს გადააჭარბა, თუმცა, ბაზარი რომ გააქტიურებას იწყებს, ეს ნათლად ჩანს.გააქტიურდა ის ხალხი, რომლებსაც უნდოდათ  საცხოვრებელი ბინის შეძენა და კორონავირუსის გამო დროებით შეაჩერეს შესყიდვა.“-განაცახადა ნეგი გოგუაძემ.

კომპანია „რემაქსის“ ხელმძღვანელი მარიამ ასათიანი მიიჩნევს, რომ ერთთვიან გაჩერებას ბაზრის დინამიკა არ შეუცვლია. უფრო მეტიც, მომატებულია უძრავი ქონების ფასი და გაზრდილია მოთხოვნა.

„ვაგრძელებთ მუშაობას დისტანციურად. ბაზრის კვლევამ აჩვენა, რომ  საცხოვრებელ ფართებზე ფასი გაზრდილია, თუმცა, ჩემი კომპანიის ჭრილში ვერც ამაზე ვისაუბრებ. ჯერ მაინც ადრეა იმისთვის, რომ ბაზარს ჰქონდეს რეაქცია და კორონავირუსის გავლენა კლების მიმართულებით დაეტყოს. აღსანიშნავია ის ფაქტიც, რომ ბანკებმა 3 თვით შეაჩერეს პროცენტების გადახდა. ამან კი ტრანზაქციების რაოდენობა შეამცირა, თუ იდება ისიც მომავალი გარიგების პირობით. ბაზარი  კრიზისიდან გამოსვლის ნაბიჯებს ელოდება, თუმცა, მე ვფიქრობ, რომ ფასის კლება ძალიან შესამჩნევი არ იქნება.“-განაცხადა მარიამ ასათიანმა.

“რემაქსის“ დირექტორი  რამდენიმე სეგმენტსაც განიხილავს, სადაც კომპანიას აქტიური მუშაობა უწევს.

„კორონავირუსმა განაპირობა ის, რომ გააქტიურდა საოფისე ფართების ძიება, რადგან არის გარკვეული პირობები როგორი სახით უნდა განაგრძონ და როგორ ოფისებში მუშაობა სხვადასხვა კომპანიებმა. ზოგს კი იჯარა ჰქონდა შეჩერებული და ახლა ბაზარს გადახედეს, ხომ არ შეუძლიათ უფრო მისაღებ ფასად მოიძიონ ფართი.ასევე ვმონაწილეობთ ტენდერებში, როგორც საერთაშორისო ორგანიზაცია. გაზრდილია მოთხოვნა  სასოფლო-სამეურნეო მიწებზე და სააგარაკო ნაკვეთებზე. ასევე დიდი ინტერესია ქალაქგარეთ სახლების დაქირავებაზეც.“-აღნიშნა მარიამ ასათიანმა.

ნათია ლომიძე