კორონავირუსით გამოწვეული პანდემიის გამო ქორწილები, დაბადების დღეები და წვეულებები კვლავ იკრძალება, აქედან გამომდინარე ქვეყნაში დიდი ღონისძიებები არ ტარდება, რამაც „ქეითერინგ“ კომპანიებს, რომლებიც ძირითადად ფურშეტებზე მუშაობდნენ, დიდი დარტყმა მიაყენა.

როგორც „ქეითერინგ ჯგუფი საქართველოს“ დამფუძნებელი ლადო ქველაძე „კომერსანტთან“ აცხადებს, რომ ქვეყანაში შექმნილი რთული ეპიდემიოლოგიური მდგომარეობის გამო კომპანიამ მუშაობა შეწყვიტა.

„პანდემია ჩვენ მუშაობაზე ძალიან უხეშად აისახა, შეზღუდვების მერე საერთოდ არანაირი ღონისძიება აღარ გვქონია, რაც შეეხება თანამშრომლებს სისტემატურად არავინ გვყოლია დასაქმებული. სამომავლოდ თუ რამე შეიცვლება ვერ გეტყვით, ასე განსაზღვრა ძალიან რთულია, დახმარებაც არ მიგვიღია არ გვეკუთნოდა“. - აღნიშნავს ლადო ქველაძე.

ქეითერინგ კომპანია ETG GROUP-ის დამფუძნებელმა გიორგი საღინაძემ „კომერსანტთან“ შემცირებულ დატვირთვაზე ისაუბრა და აღნიშნა, რომ წინა წელთან შედარებით მხოლდო 10-15% იანი დატვირთვით მუშაობს.

„გიორგი გახარიას განცხადება შეკრებების კვლავ აკრძალვასთან დაკავშირებით ჩვენთვის პირდაპირი დარტყმა იყო. ვფუნქციონირებთ, მაგრამ შეიძლება ითქვას, რომ სულს ვღაფავთ, ძალიან ცოტა შეკვეთა გვაქვს, წინა წელთან შედარებით დატვირთვა 10-15%-ია. ამ ეტაპზე ვმუშაობთ დაბადების დღეებისთვის და მცირე წვეულებებსთის. კერძო სექტორი და ტრეინინგ სექტორი აღარ არსებობს, მხოლოდ მათთვის, ვინც დაბადების დღეებს სახლში იხდის საკვები მიგვაქვს ადგილზე, იქაც სულ ათი კაცია. სამომავლო გეგმებზე ვერ ვისაუბრებ, იქედან გამომდინარე რომ არ ვიცით რა მოხდება“, - აღნიშნავს გიორგი საღინაძე.

თაკო კვაჭანტირაძე