პანდემიის გამო შეცვლილი გეგმები და გაზრდილი მოთხოვნა ონლაინ გაყიდვებზე - როგორია აქსესუარების ქართული ბრენდის Gepherrini-ის სამომავლო გეგმები, კომპანიის დამფუძნებელი ილია გეფერიძე კომერსანტის დილაში საუბრობს. მისი თქმით,  ოთხ საერთაშორისო გამოფენაში მონაწილეობის მიღება გადაიდო, თუმცა ჩინეთში პოტენციურ მყიდველებთან მოლაპარაკებების შედეგად, რამდენიმე თვეში ჩინეთის ბაზარზე გაყიდვები განახლდება.

ჩვენი პროდუქცია არ არის პირველადი მოხმარების, თუმცა გაგვიხუთმაგდა ონლაინ გაყიდვები. ჩვენი ახალი ონლაინ მაღაზიაც ჩაეშვა და პანდემიის პერიოდმა გვაჩვენა,რომ ეს მიმართულება უნდა იყოს ერთ-ერთი მთავარი სტრატეგიული მიმართულება. გავაფორმეთ ხელშეკრულება ერთ-ერთი სააგენტოსთან ,რომელიც მოგვიმზადებს სოციალური მედიის სტრატეგიას და უახლოეს ერთ თვეში დავიწყებთ აქტიურად სოციალურ მედიაში კამპანიას.,- აღნიშნავს ილია გეფერიძე. მისი თქმით, ფილიალების დახურვასთან დაკავშირებული გადაწყვეტილება დამოკიდებულია პოსტ პანდემიურ მდგომარეობაზე.

რთულია მოცემულ მომენტში რაიმეს პროგნოზიება, უახლოესი სამი თვე უნდა დაველოდოთ, რომ ბაზარმა გვიკარნახოს რა მიმართულებით წავიდეთ. ერთ-ერთი აუცილებლად იქნება ონლაინ მაღაზიების განვითარება. ფიზიკურ მაღაზიებს,რაც შეეხება, არ ვაპირებთ დაკეტვას და თუ რამე არ შეიცვლება, გზები არ გაიხსნება და ტურისტები არ ჩამოვლენ, მოგვიწევს ამ მიმართულებით ნაბიჯების გადადგმაც.

ჩვენი გუნდი აქტიურად ადევნებს თვალს მსოფლიო მოდის ტენდეციებს, ვითვალისწინებთ მათ რჩევებს და ჩვენს ხასიათსაც ვაჩვენებთ მომხმარებელს. ეს სინთეზი კი გვაძლევს შესაძლებლობას, რომ ჩვენი ადგილი მუდამ გვქონდეს ბაზარზე. არცერთ წელს 100%-ზე ნაკლები ზრდა არ გვქონია. ეს იმის მანიშნებელია,რომ კარგად მივდიოდით აქამდე და ვიმედოვნებთ, რომ გარკვეული პერიოდის მერე დავუბრუნდებით ძველ ნიშნულს. რამდენჯერმე ვიყავით ჩინეთში გამოფენაზე, ჰონკონგში ორჯერ მოვხვდით ტოპ 20 საუკეთესო ბრენდში, შანხაიში კი დიდი ინტერესი გამოიწვია ჩვენმა ბრენდმა.

აწარმოე საქართველოსთან მუდმივად გვაქვს კონსულტაციები. ჩვენ ვისარგებლეთ სულ ახალი საგრანტო პროექტით,რომელიც ძალიან წაგვადგება მოცემულ მომენტში. ფაქტობრივად, გამოგვეცალა სახსრები და გამოცოცხლება გვჭირდებოდა. საფეიქრო სფერო ისეთია,თუ გამოფენებში მონაწილეობა არ მიიღე, რთულია წარმატებას მიაღწიო, ჩვენი ექსპორტზე გასვლა სწორედ ამის დამსახურებაა. ახლა აქტიურად ვგეგმავთ ონლაინ გამოფენებში მონაწილეობის მიღებას,- ამბობს ილია გეფერიძე. კომერსანტის დილაში მან ასევე ისაუბრა სამომავლო გეგმებზე და ჩანთების გარდა, ბრენდის ახალი მიმართულების განვითარების პერსპექტივებზე.

აქსესუარების ქართულ ბაზარი 21 მილიონიანია, ამ 21 მილიონში არის უამრავი დიდი ბრენდი და დაყოფილია სეგმენტებად, ჩვენ 10%-ზე მეტი გვიჭირავს და ალბა 15%-მდე გავიზრდებით.  ჩვენი ბრენდი ფეხსაცმელებსაც აწარმოებს, ბაზარი 41 მილიონამდეა და ამ მიმართულებითაც ვიწყებთ აქტიურ მუშაობას.  ჩვენი მთავარი პროდუქცია არის ჩანთა და როგორც ჩანთაში მოვიპოვეთ წარმატება, ზუსტად იგივენაირად გვინდა წარმატებას მივაღწიოთ ფეხსაცმელებშიც. ბევრია სამუშაო ამ მიმართულებით და მთელი გუნდი 24 სთ ვმუშაობთ,რომ ამ მიზანს მივაღწიოთ.

ჩვენს სამომავლო გეგმებშია, ჩინეთის ბაზარზე შესვლა, პანდემიიდან გამომდინარე, ჩინეთი ყველაზე კარგ მდგომარეობაშია და ის საინტერესოა, არამარტო ჩვენთვის,არამედ მთელი მსოფლიოსთვისაც. რახან ჩვენმა პროდუქტმა დიდი ინტერესი გამოიწვია, ყველაფერს ვაკეთებთ,რომ ჩინეთის ბაზარი და ონლაინ პლატფორმებიც ავითვისოთ,- ამბობს ილია გეფერიძე.