კორონავირუსისგან დღეს გამოჯანმრთელებულ ორ პაციენტთაგან ერთი თბილისის ინფექციურ საავადმყოფოში მკურნალობდა.
როგორც კლინიკის სამედიცინო დირექტორმა, მარინა ეზუგბაიამ განაცხადა, მან კლინიკა უკვე დატოვა.
დილის შემდეგ მონაცემები არ შეცვლილა. კვლავ დადასტურებული არის 233 შემთხვევა და სამი კი, შემოტანილი დადასტურებული შემთხვევა. ერთადერთი სიახლეა, რომ 56 გამოჯანმრთელებულია, აქედან ერთი გამოჯანმრთელებული ჩვენთანაა. დილას მიღებული ტესტირების შემდეგ მას უარყოფითი ჰქონდა პასუხი და მან დატოვა ჩვენი კლინიკა.
რაც შეეხება რვა პაციენტს, რომელთა მდგომარეობაც იყო საეჭვო, როგორც ეზუგბაიამ აღნიშნა, არც ერთ მათგანს კორონავირუსი არ დაუდასტურდა.
„ყველას პასუხი უარყოფითია, არც ერთთან არ დადასტურდა, ყველა დატოვებს ჩვენს კლინიკას“, – განაცხადა ეზუგბაიამ.
მისივე თქმით, კვლავ საყურადღებოა ინფექციურ საავადმყოფოში მოთავსებული სამი პაციენტის მდგომარეობა.
„უცვლელია დღეს სიტუაცია. კვლავ სამი პაციენტი გვყავს მძიმეთა შორის უფრო მძიმედ, რომლებიც ინტენსიურ მეთვალყურეობას საჭიროებენ 24 საათის განმავლობაში. მათი მდგომარეობა დასტაბილურებული ჯერ არ არის და დღის განმავლობაში ცვალებადია, სიმძიმიდან გამომდინარე. დანარჩენების მდგომარეობა სტაბილურია და იმედია, რომ პროგრესირება თუ აღარ იქნება ისინიც უკვე გამოჯანმრთელებულები გახდებიან მალე“, – განაცხადა მარინა ეზუგბაიამ.
1tv
ინფექციური საავადმყოფო
