კურორტ „ბიოლის“ დამფუძნებელი თამაზ მჭედლიძე ახალი ტიპის ულტრაიისფერი ნიღბების წარმოებას უკვე ჩინეთში იწყებს. პირველადი წარმოების ნიღბები , რომლის შესახებაც ცოტა ხნის წინ ბიზნესმენმა „კომერსანტთან“ ისაუბრა, ახლა მხოლოდ უკრაინაში იყიდება, თუმცა პროდუქციის განახლებული და მოდერნიზებული ვარიაცია მალე საქართველოსაც ექნება.

ულტრაიისფერი ნიღბების წარმოება ველნეს კურორტ „ბიოლის“ დამფუძნებელმა თამაზ მჭედლიძემ რამდენიმე თვის წინ დაიწყო. როგორც მან „კომერსანტს“ განუცხადა, კორონავირუსის საწინააღმდეგო ულტრაიისფერი მრავალჯერადი ნიღბების წარმოება უკრაინაში დაიწყო და ქართველ მომხმარებელზეც იყო გათვლილი, თუმცა როგორც ბოლო ინტერვიუში ბიზნესმენი აღნიშნავს, საქართველოში მისი შემოტანა ვერ მოხერხდა და ამჟამად უკრაინაში იყიდება.

მანვე განმარტა, რომ ამჟამად ახალი ტიპის, გაუმჯობესებული მრავალჯერადი ნიღბების წარმოებას ჩინეთში იწყებს პარტნიორებთან ერთად, რომლის შემოტანა საქართველოშიც იქნება შესაძლებელი და მისი ფასი 40 დოლარამდე განისაზღვრება.

„ულტრაიისფერი ნიღბების წარმოება ჩვენ დავიწყეთ უკრაინაში იმიტომ, რომ ყველაზე მარტივად მივიღეთ  ნებართვა, თუმცა გამოჩნდა პრობლემა და იყიდება მხოლოდ უკრაინაში, საქართველოში წამოღება კი ვერ მოხერხდა.  

ახლა უფრო დავხვეწეთ ჩვენი პროდუქტი და თანამედროვე ნიღბების წარმოებას ვიწყებთ. მგონი წავიღებთ ჩინეთში და იქ დავიწყებთ წარმოებას, რომ პრობლემა არ იყოს საქართველოში წამოღების .  იქიდან კი მთელ მსოფლიოში შეგვეძლება ნიღბების გატანა.

ნიღბების ფასი იქნება 40 დოლარამდე და მისი განსაკუთრებულობა იმაშია, რომ აქვს  ვენტილიატორი, რომელიც გეხმარება სუნთქვაში და ყველაფრისგან დაცული ხარ.

40 დოლარიანი ნიღბები დიდი რისკის მქონე ადგილებისთვის არის გათვლილი.

ახლა პროცესში ვართ, ასევე გვინდა დინამიკის  ჩაყენება, რომ საუბრისას ხმა კარგად ისმოდეს და მაქსიმალურად მორგებული იქნება არსებულ გამოწვევებს.

უკრაინაში რასაც ვყიდით, დიდებია ,  ელემენტებზეა და ცოტა მძიმეა. იმას ყიდულობს ის ხალხი ვინც მოგზაურობს,“ - ამბობს თამაზ მჭედლიძე.

ნიღბების პირვანდელ ვერსიას, საჰაერო ლაბირინთი აქვს, სადაც ულტრაიისფერი სხივებია, თუ ადამიანი კორონავირუსს შეისუნთქავს, ნათება მის სტრუქტურას დაარღვევს და ვირუსი უარყოფითად ვეღარ იმოქმედებს ორგანიზმზე. ნიღაბი მრავალჯერადია და მისი მუშაობის დროთ  10 000 საათია განსაზღვრული. მისივე განმარტებით, პროექტში დაახლოებით 100 ათასობით დოლარის ინვესტიცია განხორციელდა. ოფიციალურ მწარმოებლად კი ქართული მხარის დაკვეთით, უკრაინული ქარხანა ითვლება.

შეგახსენებთ, მედიცინის მეცნიერებათა დოქტორმა თამაზ მჭედლიძემ შპს „მედგრუპ ჯორჯიას“ კუთვნილი სამედიცინო ველნეს კურორტ ბიოლის მშენებლობა კოჯორში 2013 წელს დაიწყო. კურორტს ხარისხიანი და ნატურალური კვების პროდუქტებით საკუთარი ფერმა და სათბური  უზრუნველყოფს.

თამაზ მჭედლიძე  რუსეთში კლინიკების ქსელი „მედის“  მფლობელიცააა.

მარიამ მორგოშია