„კორონავირუსით გამოწვეული პანდემიის შემდეგ ქალაქიდან გასვლა და კერძო სახლების ფლობა უფრო სასურველი გახდა“ - ამის შესახებ კომპანია რემაქსის ხელმძღვანელმა მარიამ ასათიანმა „კომერსანტს“ განუცხადა.
კორონავირუსის პანდემიის შემდეგ მოთხოვნა ასევე ისეთი ტიპის მიწებზე გაიზარდა, სადაც უბნური განვითარება მოიაზრება, როგორც ასათიანი აღნიშნავს ადამიანები ცენტრიდან გასვლაზე და არა ურბანულ განვითარებაზე, არამედ ურბანულ ადგილას უბნის განვითარებაზე დაფიქრდნენ.
„სასოფლო სამეურნეო მიწებზე მოთხოვნა მომატებულია, კარანტინის პერიოდში ბინებში ჩაკეტვამ, მომხმარებლის მხრიდან დამოკიდებულება და კრიტერიუმები გადააფასა.
ძალიან დაფასდა აივნები, ტერასები, ვისაც საშუალება აქვს, ქალაქიდან გასვლა და კერძო სახლების ფლობა უფრო სასურველი გახდა.
მომხმარებლებს, რომლებსაც მანამდე სააგარაკო სახლების დაქირავების აუცილებლობა არ ჰქონიათ, რადგან ბავშვები არ ჰყავდათ და შესაბამისად ბავშვების გაყვანის საჭიროებაც არ ჰქონიათ, მათაც დაიწყეს ქალაქიდან გასვლაზე ფიქრი, რადგან საზღვრების ჩაკეტვის გამო, ქვეყნიდან ვერ გადიან და აგარაკების დაქირავების სურვილი გაუჩნდათ.
ასევე, ვისაც საშუალება აქვს მუდმივ საცხოვრებლად ბინებისნაცვლად კერძო სახლებს ირჩევენ“ - აღნიშნავს მარიამ ასათიანი.
კომერსანტი უძრავი ქონების სააგენტოს kibe.ge- ს დირექტორს ნელი გოგუაძეს გაესაუბრა, რომელმაც აღნიშნა, რომ სასოფლო - სამეურნეო მიწების გაყიდვა განსაკუთრებით კახეთის რეგიონში არის გაზრდილი.
სასოფლო-სამეურნეო მიწებზე, შესამჩნევ ზრდას myhome.ge-ს მონაცემებიც ადასტურებს. Myhome-ის პროექტის ხელმძღვანელი მადონა კაჭკაჭაშვილი განმარტავს, რომ ინტერესი აპრილი-მაისის თვეში გაიზარდა .
„სასოფლო სამეურნეო მიწებზე, შესამჩნევად გაიზარდა ინტერესი თავად კორონავირუსისეული ფონის განმავლობაში, აპრილიმაისის თვეში. ზაფხულში, ეს მაჩვენებელი ძველ ნიშნულს დაუბრუნდა. ასევე, გაიზარდა მოთხოვნა კერძო სახლების და აგარაკების ქირავნობაზე, განსაკუთრებით თბილისის შემოგარენში, როგორიცაა წყნეთი, კოჯორი, წავკისი და სხვა.“ – აღნიშნავს მადონა კაჭკაჭაშილი
რაც ეხება ბინების, საოფისე ფართების გაყიდვა - გაქირავების ტენდენციებს მიუხედავად მოლოდინისა, ფასის და გაყიდვების დრამატული კლება არ აღინიშნება.
ნელი გოგუაძის შეფასებით, მოთხოვნა ყველა მიმართულებით მომატებულია, თუმცა ბინის გაქირავების ფასმა დაიკლო.
„როგორც ბინებზე, ასევე საოფისე ფართებზე მოთხოვნები არის მომატებული, რაც შეეხება გაქირავების ფასს აქ კლება გვაქვს, დიდ ფართებზე, შემცირებულია ფასები.
ეხლა კარკასებზე იყო მოთხოვნა და წინა პერიოდთან შედარებით, საშუალოდ 1 კვადრატული მეტრის ფასი 20 დოლარით არის შემცირებული, თუმცა დიდი ცვლილებები არ შეინიშნება, ბინებზე მოთხოვნა არის, და ამიტომ ტენდენცია კლებისკენ აღარ წავა, სერიოზული რყევები არ გვაქვს, ძველი ბინებიდან ბოლო პერიოდში რამდენიმე გაიყიდა, ახალ აშენებულ ბინებში კი ძირითადად კარკასებზე არის მოთხოვნა“ - აღნიშნავს ნელი გოგუაძე
მარიამ ასათიანიც აღნიშნავს, რომ მიუხედავად მოლოდინისა, რომ ბინის ფასი დაახლოებით 40 პროცენტით დაეცემოდა ასე არ მოხდა და ფასებში დრამატული ცვლილება არ შეინიშნება, თუმცა აღნიშნავს, რომ მყიდველს ფასის კლების მოლოდინი ჰქონდა, ხოლო გამყიდველი ფასს არ აკლებს და ამან ბინების გაყიდვის შეფერხება გამოიწვია.
„მიუხედავად დიდი მოლოდინისა, ფასში დრამატული ცვლილება არ არის, როდესაც მარტის შუა რიცხვებში პანდემია დაიწყო, იყო მოლოდინი, რომ სადღაც 40% -მდე დაიკლებდა ფასები, გარკვეული პერიოდის მერე საბანკო სექტორის წარმომადგენლებმა გადახედეს ტენდენციას და მათი ვარაუდით მოსალოდნელი იყო 20-25% 0იანი ვარდნა, თუმცა ჩვენი კომპანიის გადმოსახედიდან ჩვენ ვერ ვიტყვი, რომ ეს პროცენტი ბაზარზე შეინიშნება, ამ ეტაპზე გარკვეული ცდომილებაა მყიდველის მოლოდინსა და გამყიდველის იმედსა და პროგნოზებს შორის.
მყიდველი ფასების კლებას ელოდება და ცდილობს, რომ კარგი წინადადებები იპოვოს, გამყიდველი კი სიტუაციის გამოსწორებას ელოდება და სადამდეც ეყოფა რესურსი ცდილობს, რომ უძრავი ქონების ფასი ჯერჯერობით არ დაწიოს ან კლება მაქსიმალურად გადაავადოს, აქედან გამომდინარე თუ კორონამდელი პერიოდს შევადარებთ დაახლოებით 30-35 % ით შემცირებულია ბაზარი, მაგრამ კორონას პერიოდში ტრანზაქციები თითქმის გაჩერებული იყო და ეს სადღაც 80% მდე აღდგენილია.“ - აღნიშნავს მარიამ ასათიანი
მისივე განცხადებით კარანტინის დასრულებიდან პირველივე თვეს , ბაზარი აღდგა 70-75 % ამ ეტაპზე მყიდველების მიერ ბაზრის აქტიური კვლევა მიმდინარეობს, თუმცა მოლოდინის რეჟიმის გამო ტრანზაქციები იმდენად წარმატებით ვერ სრულდება.
„ვფიქრობთ, რომ ეს ტენდენცია კიდევ 1-2 თვე გაგრძელდება და შემდეგ უფრო კარგად დავინახავთ, რამდენად გადავიდა ეს კრიზისი, ფასები შენარჩუნდა თუ მხოლოდ 10-15% ით დაიკლო.
მყიდველიც ამ ფაქტს შეეგუება და ყიდვა გაყიდვის პროცესი ჩვეულებრივ გაგრძელდება, ან რეალურად ფასები დაიწევს, იქიდან გამომდინარე, რომ გამყიდველი დიდ ხანს ვერ შეძლებს ფასების და უძრავი ქონების გაყიდვის შეჩერებას, ვფიქრობ რომ ორ თვეში მთავარი დარტყმა გადავლილი იქნება, მაგრამ ბუნებრივია ბაზარს სრულიად რომ აღდგეს, გარკვეული დრო, შეილძება ერთ წელიც დასჭირდეს“ - მარიამ ასათიანი
Myhome - ის პროექტის ხელმძღვანელი მადონა კაჭკაჭაშვილი მათი კომპანიის არსებულ მონაცემებზე დაყრდნობით განმარტავს, რომ 2020 წლის დასაწყისთან შედარებით, სარეალიზაციო ქონების მიწოდების კუთხით მნიშვნელოვანი ზრდა შეინიშნება, ასევე გაზრდილია მომხმარებლის ინტერესი კონკრეტულ უძრავ ქონებებზე.
„იანვარ-თებერალში არსებული შეთავაზებების რაოდენობა დაახლოებით 30%-ით შემცირდა თუმცა, ზაფხულის თვეებში დაუბრუნდა წლის დასაწყისის მაჩვენებლებს დადაახლოებით 20%-ით მეტ ნიშნულსაც მიაღწია. ასევე, კორონავირუსის შემდგომ პერიოდში, გაზრდილია მომხმარებლის ინტერესი, ვიზიტორების რაოდენობა და განხორციელებული ძიებები/ზარები კონკრეტულ უძრავ ქონებებზე. ივნისი-ივლისში 2020 წლის იანვარ-თებერვალთან შედარებით, 15%-ით, ხოლო გასული ანალოგიურ პერიოდთან შედარებით 13%-ით არის გაზრდილი აღნიშნული მაჩვენებელი. რა თქმა უნდა, ეს მონაცემი არ ნიშნავს ტრანზაქციების ოდენობის ანალოგიურ ზრდასაც, თუმცა, კარგი მანიშნებელია ინტერესისა და ძიების პროცესის გამოცოცხლების კუთხით“.— აღნიშნავენ Myhome.ge-ში.
Myhome.ge-ს მონაცემებით კორონავირუსულმა ფონმა ასევე გარკვეული ზეგავლენა ფასების დინამიკაზეც მოახდინა, მაგალითისთვის თბილისში 2020 წლის იანვრის მონაცემებთან შედარებით სარეალიზაციო ქონების საშუალო კვადრატული ფასი დაახლოებით 3-5% ით არის შემცირებული, ხოლო ბათუმში იგივე მაჩვენებელი 5-7% შეადგენს.
რაც შეეხება ქირას, ფასის კლება მხოლოდ თბილისში, 5-8%ის ოდენობით ფიქსირდება.
თაკო კვაჭანტირაძე
უძრავი ქონება
