ზაფხულში კორონავირუსის პანდემიის შესუსტების ნაცვლად ინფექცია არ ნებდება და უფრო ძლიერდება , ამის შესახებ ჯანდაცვის მსოფლიო ორგანიზაციამ მას შემდეგ განაცხადა , რაც გასულ კვირას დაავადებულთა რაოდენობა დღე-ღამეში რეკორდულად 183 000 - ით გაიზარდა. ჯამში პანდემიით დაღუპულთა რაოდენობამ 473 000-ს, დაავადებულთა რაოდენობამ კი 9 მლნ-ს გადააჭარბა.
ამ ეტაპზე ვირუსის გავრცელების ძირითადმა ეპიცენტრმა ევროპიდან შტატებში გადაინაცვლა, ასევე ყველაზე მძიმე სიტუაციაა ინდოეთში და ბრაზილიაში,სადაც დღე-ღამეში საშუალოდ 45-50 000 ადამიანი ინფიცირდება. აშშ-ში ვირუსის გავრცელების ეპიცენტრმა ნიუ-იორკიდან კალიფორნიაში გადაინაცვლა, სადაც დღე-ღამეში ინფიცირებულთა რაოდენობა საშუალოდ 4000-ით იზრდება.
მთლიანობაში ინფიცირების შემთხვევების ზრდა 23 შტატში ფიქსირდება, 10 შტატში ვითარება უცვლელია, 17-ში კი ვირუსი უკან იხევს. შეზღუდვების მოხსნის შემდეგ დონალდ ტრამპი სრულფასოვანი წინასაარჩევნო კამპანიის დაწყებას, მოსახლეობა კი მაქსიმალურ გახსნას ცდილობს, თუმცა ეპიდემიოლოგების აზრით, შეზღუდვების მოხსნა საშიშია, რადგან ეპიდემია ჯერ არ დასრულებულა.
შეზღუდვების მოხსნის შემდეგ ინფექციის გავრცელების მექანიზმი ძირითადად ერთნაირია.ვირუსით ჯერ ახალგაზრდები ინფიცირდებიან, დაავადება ან უსიპმტომოდ ან მსუბუქ ფორმაში მიმდინარეობს, მათგან ინფექცია ასაკოვან ადამიანებზე გადადის, რაც სწრაფი სამედიცინო ჩარევის გარეშე ლეტალური შედეგის მომტანია.
ბრაზილიაში კოროვირუსით დაავადებულთა რაოდენობამ მილიონს გადააჭარბა, რაც იმაზე მიუთითებს, რომ აგვისტოში სავარაუდოდ ეპიდემიით ყველაზე დაზარალებული სწორედ ეს ქვეყანა გახდება.
გერმანიაში კორონავირუსის მძლავრი აფეთქება, ჩრდილოეთ რეინ-ვესტფალიაში, ერთ-ერთ ხორცგადამამუშავებელ ქარხანაში მოხდა , სადაც 1331 დაავადებული გამოვლინდა. საწარმო დაიხურა და თანამშრომლები კარანტინში გადაიყვანეს.ეს ეპიზოდი იმაზე მიუთითებს, რომ მოდუნების დრო ჯერ ევროპაშიც არ დამდგარა.
ჩინეთმა ეპიდემიის შეჩერება თითქოს მოახერხა, თუმცა, პეკინის ერთ-ერთ საბითუმო ბაზარში 11-21 ივნისს ინფიცირების 236 შემთხვევა დაფიქსირდა. ხელისუფლებამ, ამ აფეთქების ლოკალიზება შეძლო, თუმცა ეს შემთხვევაც სიტუაციის არასტაბილურობაზე მეტყველებს.
სულ რაღაც 2 კვირის წინ ახალმა ზელანდიამ ეპიდემიის დასრულების შესახებ განაცხადა, მაგრამ სიხარული ხანმოკლე აღმოჩნდა და დაავადება ქვეყანაში ორი ბრიტანელის საშუალებით დაბრუნდა, რის შედეგადაც ინფიცირებულთა რაოდენობამ ათეულებს მიაღწია.
მეორე ტალღის შესახებ სამხრეთ კორეამაც განაცხადა, თუმცა, კორეული ციფრები სხვა ქვეყნებთან შედარებით საგრძნობლად დაბალია.ბოლო სამი დღის მანძილზე ინფიცირებულთა რაოდენობამ 150-ს მიაღწია, რაც მასობრივი ტესტირების პირობებში მშვენიერი მაჩვენებელია, თუმცა, კორეელები დამშვიდებას ჯერ არ ჩქარობენ. შედარებისთვის, ბრიტანეთში ოპტიმიზმის მიზეზი კორონავირუსგან დღე-ღამეში მხოლოდ 15 ადამიანის გარდაცვალება გახდა, რაც მარტის დასაწყისიდან ყველაზე დაბალი მაჩვენებელია. ამავე დროს დაინფიცირების დღიური მაჩვენებელი ბრიტანეთში საშუალოდ 900-ია.
სამხრეთ კორეაში ეპიდემიის პიკმა, როდესაც დღეში 800 ადამიანი ავადდებოდა, ჯერ კიდევ მარტში ჩაირა.
ალბათ უკვე ყველა შეეგუა იმას, რომ ზაფხულში შვებულებების სეზონი შეგვიძლია დავივიწყოთ, თუმცა, ამავე დროს იზრდება იმის გაცნობიერებაც, რომ მკვეთრი გაუმჯობესება არც შემოდგომა-ზამთრის სეზონზეა მოსალოდნელი.
წყარო:Haqqin.az
მოამზადა თენგიზ აბლოთიამ
კორონა ვირუსი პანდემია მსოფლიო ჯანდაცვისა ორგანიზაცია ჯანმო 
