კორონავირუსისა და მის გამო დაწესებული შეზღუდვების მიუხედავად, საკონდიტრო კომპანიებმა აღდგომის პერიოდისთვის პასკების წარმოება აქტიურად დაიწყეს და მომხმარებელს რამდენიმე სახეობის პასკას სთავაზობენ.
საგანგებო რეჟიმისა და ლარის კურსის გაუფასურების მიუხედავად, კომპანიებს პასკის ფასი არ გაუზრდიათ.
საკონდიტრო საწარმო „შტოში“ წელსაც აქტიურად ჩაერთო სააღდგომო პროცესში. როგორც კომპანიის დამფუძნებელი კახაბერ მახარობლიშვილი „კომერსანტთან“ განმარტავს, პასკებზე მოთხოვნა შარშანდელის მსგავასაც წელსაც გაზდილია, თუმცა, ზოგადად საკონდიტროში რეალიზაცია მკვეთრად შემცირდა.
„რა რაოდენობითაც იყიდებოდა შარშან, ის რაოდენობა იყიდება წელს. პროდუქცია არც მოგვიმატებია და არც დაგვიკლია. პასკებზე მოთხოვნა მაინც არის. შეიძლება ხალხს ეკრძალება თავშეყრის ადგილებში გასვლა და თუნდაც, საფლავებზე მისვლა, მაგრამ სახლისთვის ყიდულობენ პასკებს. ამ ეტაპზე ვყიდით ერთი სახეობის პასკას, თუმცა, სხვადასხვა შიგთავსით და ისინი ყველასთვის ხელმისაწვდომია.მოგეხსენებათ, კორონავირუსთან ერთად დიდ პრობლემას წარმოადგენს ლარის კურსიც, რომელიც მკვეთარად გაუფსურებულია, თუმცა, ამ პირობებშიც კი ვახერხებთ და ვინარჩუნებთ პროდუქტის ფასს.რაც შეეხება ზოგადად საკონდიტროს, ვაჭრობა შემცირებულია, რეალიზაცია ოთხჯერ ნაკლებია, ვიდრე გასულ წელს იყო.“-ამბობს კახაბერ მახარობლიშვილი.
კომპანია „იფქლი“ მომხმარებლებს რამდენიმე ზომის პასკას სთავაზობს. კომპანიის პიარ მენეჯერი მარიამ გოგიშვილი განმარტავს, რომ მომხმარებელი “იფქლის” ნაწარმს ხელმისაწვდომ ფასად იყიდის. მისივე ინფორმაციით, კომპანიას კორონავირუსისა და ლარის გაუფასურების მიუხედავად ნაწარმის ფასი არ გაუზრდია.
„პასკების რეალიზაცია წელს იმდენად უმნიშვნელოდ არის შემცირებული წინა წელთან შედარებით, რომ აღსანიშნადაც არ ღირს. წელსაც თითქმის იმ რაოდენობას ვაცხობთ, რაც შარშან აღდგომის დროს იყო.
ჩვენ გვაქვს კლასიკური, ქიშმიშიანი პასკები, 4 ზომის და ერთი საფირმო პასკა შოკოლადის მინანქრით. რა თქმა უნდა, გავითვალისწინეთ არსებული მდგომარეობა და ცალკეული ინგრედიენტების გაძვირების მიუხედავად არც ერთი სახეობის პასკაზე წელს ფასი არ გაგვიზრდია. პასკის ფასი ყველასთვის ხელმისაწვდომია, მინი-170გ-1.50 ლარი, პატარა-270გ-2.20 ლარი, საშუალო-450გ-3.70 ლარი, დიდი-650გ-5.00 ლარი, დიდი ყუთით-650გ-6.00 ლარი, საფირმო-700გ-10.00 ლარი. (ფასები მოცემულია იფქლის მაღაზიების მიხედვით. სხვა ქსელებში შესაძლოა სხვა ფასები ჰქონდეს პროდუქტს).“-ამბობს მარიამ გოგიშვილი.
ნათია ლომიძე