„ქარხნის დასრულების დასკვნითი სამუშაოები მიმდინარეობს და კორონავირუსის მიუხედავად ქარხანას მალე გავხსნით,“-ამის შესახებ „კომერსანტს“  „კოკა-კოლა ბოთლერს ჯორჯია“ პრეზიდენტმა თემურ ჭყონიამ განუცხადა.

Coca-Cola-ს ახალი ქარხანა სრულად 2020 წლის გაზაფხულზე გაიხსნება.

„ახლა ბოლო ეტაპია და ქარხანას აუცილებლად გავხსნით. არ მაშინებს კორონავირუსი და მისგან გამოწვეული პანიკა, ვფიქრობ მდგომარეობა მალე დასტაბილურდება,“- ამბობს თემურ ჭყონია.

შეგახსენებთ, რომ მცხეთის მუნიციპალიტეტის სოფელ ნატახტარში “კოკა-კოლას” ქარხანა შენდება. პროექტი ორი ფაზისგან შედგება. საწარმოში, სხვა ნაგებობებთან ერთად, კომპანიის ახალი სათაო ოფისიც (2 000 მ²) განთავსდება.

პროექტის პირველი ეტაპი შედგება 18 000 მ2 საწარმოო და სასაწყობე შენობისგან, 760 მ2 საოფისე ფართისგან, ლაბორატორიის და სხვა ტექნიკური ფართებისგან.მეორე ფაზა მოიცავს 15 000 მ2 ტერიტორიის კეთილმოწყობას, გამწვანებისა და პარკირების ჩათვლით, ასევე მოეწყობა ახალი სათაო ოფისი, 2 000 მ2-ის ოდენობით.ქარხანაში მუზეუმიც იქნება წარმოდგენილი და ჯამში პროექტში დაახლოებით 22 მილიონი ევროს ინვესტიცია ხორციელდება. პროდუქციის 70%-ი უკვე ახალ ქარხანაში იწარმოება, 30%-დიდუბეში.