ექიმები კორონავირუსის გავრცელების კუთხით საგანგაშო მდგომარეობასა და ეპიდემიოლოგიური ვითარების დამძიმებაზე საუბრობენ - ვირუსი “დელტას” შტამის სწრაფად გავრცელების გამო ეპიდმდგომარეობა ყოველდღიურად იცვლება. ეპიდემიოლოგები საზოგადოებას არსებული რეგულაციების მკაცრად დაცვისკენ მოუწოდებენ და ურჩევენ, ჩაერთონ მასობრივი ვაქცინაციის პროცესში.
საქართველოში კორონავირუსით - 1 264 ადამიანი დიანფიცირდა და გარდაიცვალა კიდევ 26 ინფიცირებული პირი. ამასთან, გამოჯანმრთელდა 1 665 პაციენტი. ინფორმაცია stopcov.ge-ზე განახლდა. ბოლო 24 საათში ჩატარებული კვლევა ტესტით - 19375, მათ შორის ანტიგენის სწრაფი ტესტით - 9807, PCR ტესტით - 9568. სულ აცრილია - 404339, დღიურად აცრილია - 1572.
კორონაპანდემიის დაწყებიდან დღემდე საქართველოში COVID-19-ით დაინფიცირდა - 404 023, გარდაიცვალა 5 714 ადამიანი, ხოლო ვირუსი დაამარცხა 374 753 პირმა.
ჯანდაცვის მინისტრის მოადგილის, თამარ გაბუნიას განცხადებით, ქვეყანაში კორონავირუსით ინფიცირებულთა 40-50%-ს „დელტა“ შტამი აქვს.
როგორც გაბუნია განმარტავს, მსგავსი ტენდენცია მსოფლიო მასშტაბითაა და ევროპის ქვეყნებში დელტა შტამი ფაქტობრივად, სხვა ყველა შტამს ანაცვლებს.
„თუ აქამდე ვსაუბრობდით, რომ დელტა შტამი დაახლოებით, 20%-ში ცირკულირებდა, ახლა ეს უკვე იზრდება და სავარაუდოდ, 40-50%-იც კი შესაძლოა იყოს დელტა შტამის გავრცელების მაჩვენებელი. ევროპის ქვეყნებში თითქმის უახლოვდება იმ მდგომარეობას, რომ დელტა შტამი ყველა სხვა შტამს ანაცვლებს, ასე რომ, ტენდენციები ჩვენთანაც მსგავსია“, - განაცხადა გაბუნიამ.
მისივე თქმით, თუ მეცნიერული ანალიზი გვაინტერესებს, ლეტალობის მაჩვენებელი 1,4% გვაქვს, რაც სხვა ქვეყნებთან შედარებით ბევრად უფრო დაბალია და არც გაზრდილა. როგორც მან აღნიშნა, კორონავირუსის შედეგად გაზრდილი ლეტალობის მაჩვენებელი უშუალოდ „დელტას“ შტამის ცირკულირებას არ უკავშირდება.
„აბსოლუტურ ციფრებში 26 ადამიანის გარდაცვალება ყველანაირად ძალიან საყურადღებოა, მაგრამ სტატისტიკური ანალიზის კუთხით რაიმე განსაკუთრებულ ცვლილებას ამ მხრივ ვერ აღვწერთ.
“მეორე არის ის, რამდენად არის კლინიკური მართვის შესაძლებლობა შექმნილი და რაზე მუშაობს კლინიკური ჯგუფი. დღეს კლინიკურ ჯგუფს და კლინიცისტებს შემთხვევების მართვის გამოცდილება ბევრად უკეთესი აქვთ, ვიდრე ეს გვქონდა „მესამე ტალღის“ დროს. ასევე არის ყველა მედიკამენტი ხელმისაწვდომი, რაც შესაძლებელია გამოყენებული იყოს. ინვაზიური, არაინვაზიური აპარატები კლინიკებს აქვთ ყველგან. ასე რომ კლინიკური მართვის შესაძლებლობები მაქსიმალურად არის შექმნილი.
“რას უკავშირდება ყოველდღე ამდენი ადამიანის გარდაცვალება, იქნება ეს 20 თუ 26 შემთხვევა, ეს უკვე ინდივიდუალური შემთხვევების ანალიზს საჭიროებს და ამ მიმართულებითაც მუშაობს კლინიკური ჯგუფი. თუმცა, რომ გითხრათ რაღაცნაირად „დელტას“ შტამმა გამოიწვია მაინც და მაინც გაზრდილი ლეტალობა, რა თქმა უნდა, ამას ვერ დავადასტურებ“, — განაცხადა გაბუნიამ.
ექიმ მაკა ბულეიშვილის შეფასებით, გაზრდილმა მიმართვიანობამ კლინიკებში შესაძლოა, ჯანდაცვის სისტემის კოლაფსი გამოიწვიოს.
"დაინფიცირებულთა რიცხვის ასეთი მასიური მატება თუ იქნა შემდეგ დღეებში, როგორც ვხედავთ, დღეში 2000 შემთხვევას გადავცდით, და ეს რაოდენობა კიდევ გაიზრდება, რა თქმა უნდა, ჩვენ შეიძლება დაგვიდგეს ისეთივე მდგომარეობა, როგორიც გვქონდა ოქტომბერ-ნოემბრის თვეში.
“იმატა კლინიკებში მიმართვიანობამ ბავშვებში, მოზრდილებში და, შეიძლება, ჯანდაცვის სისტემას სერიოზული პრობლემები შეექმნეს, თუკი არ დავიცავთ რეკომენდაციებს და არ ჩავერთვებით ვაქცინაციის პროცესში,"-აცხადებს ექიმი.
იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე აცხადებს, რომ უფროსების ვაქცინაციით ისინი ვირუსისგან ბავშვებსაც იცავენ.
"სავარაუდოდ, ქვეყანა იმყოფება კორონავირუსის მეოთხე ტალღის დასაწყისში. დელტა ვარიანტის ერთ-ერთი დამახასიათებელი გახლავთ ის, რომ ის არამარტო უფრო სწრაფად ვრცელდება, არამედ უფრო მეტად განაპირობებს ჰოსპიტალიზაციას.
როდესაც ჩვენ ვაქცინაციის მნიშვნელობაზე ვსაუბრობთ, ეს არ არის მხოლოდ უფროსების, მოზრდილების ვაქცინაცია, მათი ვაქცინაციის უკან მათი შვილებისა და შვილიშვილების დაცვა დგას,"- აცხადებს ექიმი.
„რეზონანსი“