კორონავირუსის გამო რამდენიმე დღეა მუშაობა შეაჩერეს სილამაზის სალონებმაც. როგორც სექტორის წარმომადგენლები ამბობენ, კორონავირუსის გამო მათი სალონები 100%-იან ზარალზე გავიდნენ, რადგან შემოსავალი ყოველდღიურ სამუშაოზეა დამოკიდებული.
„კომერსანტი“ სილამაზის
სალონების ქსელს „ნატალის“ დაუკავშირდა. როგორც მისმა დამფუძნებელმა ნატალი თოლორაიამ
საუბრისას აღნიშნა, მისმა სალონებმა მუშაობა 10-12 დღის წინ შეაჩერეს. ობიექტის მფლობელი სალონის ზარალთან ერთად თანამშრომლების ანაზღაურებაზეც, საუბრობს, რომელიც გამომუშავებით ჰქონდათ და პრობლემის მოგვარების გზებს ეძებს.
„ჩვენს სივრცეებში დეზინფექციას მაქსიმალურად ვატარებდით, თუმცა შექმნილი მდგომარეობიდან გამომდინარე, მიმაჩნია, რომ სწორი გადაწყვეტილებაა ის, რომ მსგავსი ტიპის ობიექტები დროებით დაიხურა. ერთადერთი,რაც მაღელვებს ჩემი თანამშრომლები არიან. ყველა ფილიალში ერთად 100 თანამშრომელი მყავს, როგორც სალონის, ასევე მათი შემოსავალი ყოველდღიურ მუშაობაზეა დამოკიდებული, ახლა კი ისე დავრჩით. მგონია, რომ იზოლაცია საჭირო გადაწყვეტილებაა, ვირუსის პრევენციის მიზნით ეს აუცილებელიცაა, რათა უფრო სწრაფად დავამარცხოთ კორონავირუსი. ვიაზრებ არსებული მდგომარეობის სიმძაფრეს და ყველანაირად ვეცდები, როგორც კი ამის საშუალება მომეცემა მდგომარეობა გავაუმჯობესო. მანამ კი შევეცდები ჩვენს ერთგულ კლიენტებს უფასო ონლაინ გაკვეთილები შევთავაზოთ თუ როგორ მოუარონ თავს სახლის პირობებში, რადგან ჩვენთვის ჩვენი კლიენტები ძალიან მნიშვნელოვანია. “-ამბობს ნატალი თოლორაია.
ვიდრე საქართველოს მთავრობა საგანგებო მდგომარეობას გამოაცხადებდა, მუშაობა რამდენიმე დღით ადრე შეწყვიტა ერთ-ერთმა ცნობილმა სტილისტმა დავით გრატიაშვილმაც. მიუხედავად იმისა, რომ ის მომხმარებლების დეფიციტს არ განიცდიდა, კორონავირუსის გავრცელების თავიდან აცილების მიზნით მომსახურებაზე უარის თქმა მოუწია.
„გამომდინარე იქედან, რომ არ ვიცით სადამდე გაგრძელდება არსებული ვითარება, მანამდე იქნება სალონი დახურული. რაც შეეხება ზარალს, საკმაოდ დიდია, ვიტყოდი 100%,-იც კი, რადგან სალონში 5 სტილისტია, გვყავს ლაზერის სპეციალისტიც, მასაჟი, სოლარიუმი, წარბის კორექცია, ვაკეთებთ მანიკურს და პედიკურს, ამ ყველაფრით სალონის მოგების წილი თვეში 8-10 000 ლარამდე მერყეობდა. ამ ყველაფრის გათვალისწინებით, დიდი ზარალი მიადგება სალონს, თითოეული დასაქმებული ახლა შემოსავლის გარეშე ვართ.“-ამბობს დავით გრატიაშვილი.
100%-იან ზარალზე საუბრობენ სალონ KN BeautyHouse-შიც. სილამაზის სალონმა და მასში შემავალმა სასწავლო აკადემიამ უკვე რამდენიმე დღეა მუშაობა კორონავირუსის გამო შეაჩერა. სილამაზის ცენტრის წამომადგენლის თქმით, ფინანსური პრობლემა შეექმნათ თანამშრომლებს, რომლებიც სალონიდან მიღებულ შემოსავალზე იყვნენ დამოკიდებულები.
შეგახსენებთ, რომ კორონავირუსის პრევენციის მიზნით, საქართველოს პრემიერ-მინისტრმა გიორგი გახარიამ ყველა დაწესებულებას, გარდა სააფთიაქო ქსელის, სასურსათო მაღაზიების, ბენზინგასამათი სადგურებისა და საავადმყოფოებისა, დროებით მუშაობის შეწყვეტისკენ მოუწოდა. 21 მარტს კი ქვეყანაში მთავრობის გადაწყვეტილებით, 1 თვით საგანგებო მდგომარეობა გამოცხადდა.
ნათია ლომიძე