კორონავირუსთან დაკავშირებით შექმნილ უწყებათაშორისი საბჭოს სხდომაზე პრემიერ-მინისტრმა გიორგი გახარიამ საქართველოში რესტორნებისა და კაფე-ბარების დახურვის საკითხი დააყენა.დაკეტილი დაწესებულებები,გაუქმებული ჯავშნები, 90%-ით შემცირებული სტუმრები -კორონავირუსმა ქვეყანაში რესტორნებსა და განთავსების სხვა ობიექტებზე გავლენა უკვე მოახდინა.
„კომერსანტი“ შეეცადა გაერკვია რა ვითარებაა ქართულ რესტორნებში, ითვალისწინებენ თუ არა კვების ობიექტები მთავრობის რეკომენდაციებს და ეკონომიკური ეფექტის წინაშე შეიძლება დადგნენ?
„წისქვილი ჯგუფის“ ივენთ მენეჯერის სოფო გორდაძის თქმით, 3 დღის წინ ფილიალების დიდი ნაწილი დროებით დაიხურა, რამდენიმე ფილიალი კი საგანგებო რეჟიმში მუშაობს, თუმცა დღეს მთავრობის მიერ გაკეთებული განცხადების შემდეგ, რესტორნების ქსელი შესაბამის გადაწყვეტილებას მიიღებს.
„ის სივრცე, რომელიც მუშაობს, გახსნილია მხოლოდ დღის განმავლობაში, ღამე წყვეტს მუშაობას. თუმცა დღეს გაკეთებული განცხადების შემდეგ, აუცილებლად გავითვალისწინებთ მათ რჩევას. რაც შეეხება ზარალს, რომელიც კომპანიას ამ პერიოდში მიადგა, ზუსტი ციფრი არ ვიცით, თუმცა ბოლო რამდენიმე კვირაა 90%-ით შემცირდა სტუმრების რაოდენობა. ეს ყველაფერი ჩვენს ეკონომიკურ მდგომარეობაზე რა თქმა უნდა უარყოფითად აისახა. მთავრობა სამოქმედო გეგმას გვთავაზობს მცირე ბიზნესს და მგონია, რომ ეს გეგმა დაგვეხმარება რეაბილიტაციის პროცესში.“-ამბობს სოფო გორდაძე.
მიუხედავად იმისა,რომ სტუმრების რაოდენობა 90%-ით რესტორან „ქართულ სახლსაც“, შეუცირდა, ისინი მუშაობას მაინც განაგრძობენ. თუმცა, როგორც „კომერსანტს“ რესტორნის წარმომადგენელმა გიორგი მაისურაძემ განუცხადა, ხვალიდან დაწესებულება საგანგებო რეჟიმზე გადავა.
„ამ ეტაპზე ვმუშაობთ, თუმცა, დიდი ალბათობით ხვალიდან დროებით შევაჩერებთ სამუშაო პროცესს. რა თქმა უნდა იმ რეკომენდაციებს, რომელსაც შესაბამისი ორგანოები გასცემენ დავემორჩილებით. მიმდინარე მოვლენების გამო შემცირდა სტუმრების რაოდენობა, რაც ჩვენს სამუშაო პროცესზეც აისახა. მიწოდების სერვისს რაც შეეხება, შეკვეთებს, ისევ ვიღებთ და ისევ იგივე დატვირთვით ვმუშაობთ როგორც ადრე.. თანამშრომლებს აუნაზღაურდებათ ის ხელფასი, რასაც იღებდნენ, თუმცა, საბონუსე სისტემა დამოკიდებულია ყოველდღიურ მუშაობაზე აქ რა თქმა უნდა შეზღუდვა გვექნება. რაც შეეხება ჩვენს ეკონომიკურ მდგომარეობას, ჩავარდნა გვექნება და ვიმედოვნებთ, მალე დასტაბილურდება მდგომარეობა.“-ამბობს გიორგი მაისურაძე.
„დაპაუზებული“ დაწესებულებებისა და საწარმოებისთვის, პრემიერ-მინისტრმა ეკონომიკის სტიმულირების ღონისძიებების კონკრეტული გეგმა წარადგინა, თუმცა „რესტორატორთა ასოციაციის“ ხელმძღვანელ კოტე გაბრიჩიძეს, საქმოქმედო გეგმა რეალურად არ მიაჩნია.
„სამოქმედო გეგმაზე საუბრობენ, თუმცა მგონია, რომ ვინ როგორ უნდა მოიქცეს ამ სიტუაციაში არც აქვთ და არც იციან. უცხოეთში სახელმწიფო უმუშევრად დარჩენილებს კომპენსაციას უხდის, ჩვენთან რა იქნება არ ვიცით. რაც შეეხება რესტორნებისა და კაფე-ბარების დროებით დახურვას, ყველაზე ცუდი რაც ამ შეზღუდვას მოჰყვება უმუშევრად დარჩენილი ადამიანებია,2 კვირას ამბობენ, მაგრამ რეალურად არავინ ვიცით როდემდე გაგრძელდება არსებული მდგომარეობა“-ამბობს კოტე გაბრიჩიძე.
საქართველოს მთავრობის მიერ შემუშავებული გეგმა, ეხება ეკონომიკის მხარდაჭერის ღონისძიებებს, რომელიც კორონავირუსის გავრცელებით გამოწვეული ნეგატიური გავლენების შესარბილებლადაა შემუშავებული.
ნათია ლომიძე