კორონავირუსის გამო რესტორანი „Galleria Italiana“ დაიხურა. ამის შესახებ ინფორმაციას რესტორნის ადმინისტრაცია სოციალურ ქსელში ავრცელებს. რესტორანში განმარტავენ, რომ ობიექტი კორონავირუსის გავრცელების საფრთხიდან გამომდინარე დაიხურა.
„ქვეყანაში არსებული სიტუაციიდან გამომდინარე, „Galleria Italiana“-ს ადმინისტრაციამ მიიღო გადაწყვეტილება და ობიექტი დროებით წყვეტს მუშაობას. ჩატარდება სადეზინფექციო, სანიტარული სამუშაოები. მუშაობა შეჩერდება გონივრული ვადით, სიტუაციის დასტაბილურებამდე. იმედი გვაქვს, მალე შევძლებთ ვირუსთან გამკლავებას და სიტუაცია მალე დალაგდება. ყველას მოგიწოდებთ, რომ დაიცვათ ჯანდაცვის სამინისტროს მიერ გავრცელებული რეკომენდაციები და უსაფრთხოების ნორმები. გისურვებთ ჯანმრთელობას.“, - აცხადებენ „Galleria Italiana“ - ში.
კორონავირუსმა სარესტორნო ბიზნესთან ერთად პრობლემები სასტუმროებსაც შეუქმნა. თბილისში სასტუმროების დიდი ნაწილი დროებით დაიხურა, ნაწილი კი განახევრებული პერსონალით აგრძელებს მუშაობას. სასტუმროების და რესტორნების ფედერაციის დამფუძნებელი შალვა ალავერდაშვილი მთავრობას სექტორისთვის შეღავათების ამოქმედებას სთხოვს. კერძოდ, ის სასტუმროები, რომლებიც იჯარას იხდიან, კარგი იქნება, თუ საბანკო ვალდებულებები ორი თვით გადაუვადდებათ.
შემცირებული ჯავშნების გამო, „აჭარა ჯგუფმა“ დასაქმებულთა 50% ანაზღაურებად შვებულებაში გაუშვა. ბოლო 10 დღეში სასტუმროებში ჯავშნების 90% გაუქმდა.
შეგახსენებთ, რომ საქართველოში კორონავირუსით ინფიცირებულთა რიცხვი 24-მდე გაიზარდა. კარანტინის რეჟიმში ამ დროისთვის 295 ადამიანი იმყოფება, სტაციონარში მეთვალყურეობის ქვეშ კი 49 პაციენტი რჩება.
საქართველოში კორონავირუსით ინფიცირების პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.
ბაჩო ადამია