სრული ფინანსური ზარალი და სამოქმედო გეგმის გარეშე დარჩენილი სექტორი, მას შემდეგ რაც კორონავირუსის გამო ქვეყანა საგანგებო მდგომარეობის რეჟიმზე გადავიდა, დროებით მუშაობა შეწყვიტეს ესთეტიკის ცენტრებმაც, რომლებიც ზარალის ოდენობაზე საუბრობენ.
სამედიცინო ცენტრებში სხვადასხვა გამაჯანსაღებელ და თავის მოვლის პროცედურაზე ჩაწერის მსურველები საგანგებო მდგომარეობის დროსაც არ შემცირებულან, თუმცა,დაწესებულებებმა სოციალური პასუხისმგებლობის გააზრებისა და ქვეყანაში შექმნილი მდგომარეობის გააზრების შემდეგ დროებით მუშაობა შეწყვიტეს. ყოველ დღეს კი რომელიც მათი ცენტრებისთვის 100%-იანი ზარალია, სამოქმედო გეგმის გარეშე ხვდებიან, რადგან თვლიან, რომ ჯერ ამაზე ფიქრი ნაადრევია და მოვლენების დასტაბილურებას ელოდებიან.
ესთეტიკისა და მედიცინის ცენტრის „გია გვარამიას კლინიკის“ ხელმძღვანელისა და მთავარი ექიმის გია გვარამიას თქმით, სამედიცინო ცენტრი 100%-იან ზარალზეა. მისი თქმით, ჯერჯერობით არ არსებობს სამოქმედო გეგმაც.
„საქართველოს მასშტაბით 12 ფილიალი მაქვს და ყველა დახურულია. მხოლოდ ისეთ პაციენტებს ვიღებ, ვისაც მკურნალობა დაწყებული აქვს და ოპერაციის შემდგომ ვიზიტებს საჭიროებენ , რათა მათ მდგომარეობას საფთხე არ შეექმნას. ჩვენი კლინიკა კი მანამდე იქნება დახურული, ვიდრე საქართველოში საგანგებო მდგომარეობაა გამოცხადებული. კლინიკისთვის ამ პერიოდში არსებული ზარალი არის 100%-იანი, თუმცა ამ ეტაპზე ჯობს ყველამ ჩვენი პასუხისმგებლობა გავიზაროთ და დავრჩეთ სახლში.
რაც შეეხება სამოქმედო გეგმას, ჯერ არაფერი არ გვაქვს შემუშავებული, ველოდებით მოვლენების დასტაბილურებას. მთავრია ყველაფერი კარგად დასრულდეს და ამუშავდება ყველაფერი, მთავარია მოსახლეობა იყოს ჯანმრთელად და ამ ვითარებას გაუმკლავდეს.“-ამბობს გია გვარამია.
მიუხედავად იმისა, რომ მოსახლეობისგან იყო მოთხოვნა სხვადასხა პროცედურაზე ჩაწერის, დროებით მუშაობა შეწყვიტა ესთეთიკური მედიცინის ცენტრმა „სქინ კოდმაც“, რომლის 35 თამანშრომელი დღეს უხელფასოდაა დარჩენილი. შესაბამისაად, კომპანია 100%-იან ზარალზეა.
„ჩვენი შემოსავალი პაციენტებზეა დამოკიდებული. გამომდინარე იქედან რომ დღეს დახურულები ვართ, ყველა თანამშრომელი შემოსავლის გარეშე დავრჩით. ჩვენც არ ველოდით იმას, რომ მოთხოვნა იქნებოდა პაციენტების მხრიდან, გვირეკავდნენ და სხვადასხვა პროცედურებზე ჩაწერას გვთხოვდნენ, თუმცა თითოეული ჩვენგანის სოციალური პასუხისმგებლობაა, რომ დავრჩეთ სახლში და ვებრძოლოთ ვირუსის გავრცელების გზებს.“-ამბობს „სქინ კოდის“ წარმომადგენელი.
სამუშაო პროცესი დროებით შეჩერებული აქვს ესთეტიკურ ცენტრ „ნეფერტიტს“. მათთმა წარმომადგენელმა „კომერსანტს“ განუცხადა,რომ ქვეყანაში გამოცხადებული საგანგებო რეჟიმის გამო, ცენტრის დახურვამ მათი კომპანია სრულ ზარალზე გაიყვანა, თუმც, სოციალურ პასუხისმგებლობას იაზრებენ და მუშაობას საგანგებო მდგომარეობის დასრულებამდე აჩერებენ. მიუხედავად იმისა, რომ დროებით დახურვის გამო კომპანია სრულ ზარალზეა სამოქმედო გეგმა არ აქვთ, რადგან ელოდებიან, თუ როგორ განვითარდება მოვლენები ქვეყანაში.
შეგახსენებთ,ქვეყანაში საგანგებო მდგომარეობა 21 მარტს გამოცხადდა და 21 აპრილამდე გაგრძელდება.
ნათია ლომიძე