დაწესებულება,რომელიც  24 საათიან რეჟიმში მუშაობდა კორონავირუსის გამო მუშაობას დროებით ფუნქციონირებას წყვეტს. საქართველოს მასშტაბით ყველა კაზინო, სლოტ-კლუბი და ტოტალიზატორი მიმდინარე წლის 1 აპრილამდე დაიხურა.

საქართველოში კორონავირუსის გავრცელების საპრევენციო ღონისძიებების  ფარგლებში, უწყებათაშორისი საკოორდინაციო საბჭომ პრემიერ-მინისტრ გიორგი  გახარიას ხელმძღვანელობით კაზინოებს, სლოტკლუბებს და ტოტალიზატორებს  რეკომენდაცია მისცა მუშაობა  დროებით შეაჩერონ.

„კომერსანტი“ დაინტერესდა, როგორ აფასებენ მთავრობის ამ გადაწყვეტილებას სამორინეები და როგორ აპირებენ დროებით დახურულ რეჟიმში მყოფი ბიზნესუბიექტები სამომავლოდ ოპერირების გაგრძელებას? 

როგორც კაზინო “ზანადუში“  აცხადებენ, დაწესებულების დახურვა ეკონომიკური პრობლემებს გამოიწვევს, თუმცა, ამის აუცილებლობას ხედავენ. „დიდი იმედი გვაქვს რომ, თითოეული კომპანია თუ ინდივიდი  ზედმიწევნით შეასრულებს ყველანაირ რეკომენდაციას, რაც ხელს შეუწყობს  კორონავირუსის საწინააღმდეგო  ღონისძიებებს. ჩვენთან ყოველდღიურად ხდებოდა შენობის სპეციალური ხსნარებით დეზინფექცია,  სტუმრებისთვისა და  თანამშრომლებისთვის ხელმისაწვდომ ადგილებში იყო  განთავსებული სადეზინფექციო ხსნარი,  ასევე დაწესებულებაში ყოველი შემოსვლისას ხდებოდა მათთვის ტემპერატურის გაზომვა. რაც შეეხება  დისტანციურად მუშაობას, ჩვენ ადრევე შევუწყვეთ ხელი თანამშრომლებს ემუშავათ სახლიდან, თუკი მათი საქმიანობის სპეციფიკა აძლევდათ  დისტანციურად მუშაობის საშუალებას.“-აცხადებენ „ზანადუში“.

რაც შეეხება კაზინოს დახურვას, როგორც „ზანადუში“ განმარტავენ ყველა ორგანიზაციისთვის, თითოეულ დღეს  ფინანსური თვალსაზრისით  დიდი მნიშვნელობა აქვს.

„მიუხედავად იმისა, რომ ეს პერიოდი ჩვენზე ფინანსურ გავლენას მოახდენს, მნიშვნელოვანია ყველამ გაითავისოს თავისი  როლი კორონავირუსის საწინააღმდეგო პრევენციულ ღონისძიებებში.  ჩვენთვის უმთავრესია თანამშრომლების და სტუმრების  ჯანმრთელობა და უსაფრთხოება, სამორინეს დროებითი დახურვით კი ვიზიარებთ ჩვენს სოციალურ პასუხისმგებლობას და ვეხმარებით სახელმწიფოს ვირუსის შეჩერებაში.”-აცხადებენ სამორინეში.მათი ინფორმაციით, აღნიშნული გადაწყვეტილებით სათამაშო  ბიზნესს მილიონობით ლარის ზიანი შეიძლება მიადგეს.

“კომერსანტი“ დაინტერესდა აქვთ თუ არა დათვლილი რა ოდენობის ზარალი მიადგება კაზინოს იქამდე, სანამ ქვეყანა საგანგებო მდგომარეობის რეჟიმში ცხოვრობს და  აქვს თუ არა რაიმე სამოქმედო გეგმა შემუშავებული ამ ზიანის თავიდან ასაცილებლად, „ზანადაუში“ განმარტავენ, რომ ამ ეტაპზე ზარალის კონკრეტულ ოდენობაზე საუბარი ძალიან რთულია.

„ვიმედოვნებთ, რომ ძალიან მალე კორონავირუსი აღარ იარსებებს ჩვენს  ქვეყანაში. თითოეული ადამიანის ჯანმრთელობა და უსაფრთხოება  შეუფასებელია.   ეს ფორსმაჟორული სიტუაციაა და ძალიან რთულია სრული მზადყოფნით  შეხვდე მსოფლიოში განვითარებულ მოვლენებს. დიდი იმედი გვაქვს,  რომ მალე აღდგება ფრენები საქართველოს მიმართულებით, რაც  სამორინეებისთვის და ზოგადად, ბიზნეს სექტორისთვის  ძალიან  მნიშვნელოვანია.”-აღნიშნავენ კაზინოში. მათი ინფორმაციით, ფორსმაჟორული სიტუაციის მიუხედავად,კომპანიას  კადრები არ შეუმცირებია, დასვენების პერიოდი კი მათ სრულყოფილად აუნაზღაურდეაბთ. 

 შეგახსნებთ, რომ კაზინოების დახურვის გადაწყვეტილება საქართველოს პრემიერ-მინისტრმა გიორგი გახარიამ 16 მარტს, მიიღო. ქვეყანაში საგანგებო მდგომარეობა კი 21 მარტს 1 თვით გამოცხადდა. 

ნათია ლომიძე