კორონავირუსმა ქვეყანაში რესტორნებსა და სხვა განთავსების ობიექტებს პრობელემები უკვე შეუქმნა. უცხოელმა სტუმრებმა მარტის ჯავშნები გააუქმეს, ადგილობრივი ბიზნესი კი მდგომარეობის დასტაბილურებას ელოდება.„კომერსანტი“ შეეცადა გაერკვია რა ვითარებაა ქართულ რესტორნებში და ითვალისწინებს თუ არა მოსახლეობა ჯანდაცვის ორგანიზაციების რჩევას თავი შეიკავონ ხალხმრავალი ადგილებში სტუმრობისგან.
რესტორან „ქეთო და კოტეს“ წარმომადგენელი ამბობს, რომ ტურისტულად არააქტიურ პერიოდს ვირუსიც დაემატა და ბოლო დროს მათთან ადგილობრივების რაოდენობა შემცირდა. ის უცხოელი სტუმრები კი, რომლებიც უკვე ქვეყანაში არიან ჩამოსულები კვების ობიექტებში რეგულარულად დადიან.
ადგილობრივების სიმცირეზე საუბრობს რესტორან „ბარბარესთან“ მენეჯერი ანდრი მაღლაკელიძე. მისი თქმით, თუ ვითარება სამომავლოდ არ დასტაბილურდება, ეს ბიზნესზე აუცილებლად უარყოფითად აისახება.
„ამ პერიოდში ყოველთვის სტუმრების ნაკლებობაა, ტურისტული სეზონი არ არის, ამიტომ სიმცირეა. თუმცა, ის ტურისტები, რომლებიც ქვეყანაში არიან მაინც გვსტუმრობენ. ადგილობრივები კი თავს იკავებენ ხალხმრავალი ადგილებისგან. ვერ ვიტყვი რა როგორ იქბება სამომავლოდ მაგრამ თუ კიდევ შეწყდა ფრენები სხვადახვა ქვეყნებიდან, რა თქმა უნდა ეს უარყოფით გავლენას მოახდენს ბიზნესზე. სამუშაო პროცესს რა თქმა უნდა მაინც ჩვეულებრივად გავაგრძელებთ.“-ამბობს ანრი მაღლაკელიძე.
„საზღვარგარეთიდან არსებული ჯავშნების ნაწილი რაც იყო ტურისტულ კომპანიებთან გაუქმდა. ეს ჩვენი პრობლემა არ არის მხოლოდ ტურისტებს და ქვეყანასაც ექმნებათ ამით პრობლემა“-ამის შესახებ „კომერსანტს“ წისქვილი ჯგუფის ივენთ მენეჯერმა სოფო გორდაძემ განუცხადა.
„რაც შეეხება ადგილობრივების ნაკადს, საგრძნობლად არ შემცირებულა. უფრო უარეს სიტუაციას ველოდით ვიდრე ამ წუთას გვაქვს. თუმცა თუ სამომავლოდ მდგომარეობა არ დასტაბილურდა, ვფიქრობ პრობლემებს გამოიწვევს. შარშან საქართველოს ჰქონდა მეზობელი ქვეყნის მხრიდან საზღვრის ჩაკეტვის პრაქტიკა და ტურისტების გარკვეული ნაწილი ნამდვილად დააკლდა ქვეყანას. დღეს კი ერთ კონკრეტულ ქვეყანას არ უკავშირდება საზღვრის ჩაკეტვა რაც უფრო მასშტაბურ პრობლემაზე მიუთითებს. იმედია სიტუაცია მალე შეიცვლება უკეთესობისკენ.“-ამბობს სოფო გორდაძე.
შეგახსენებთ, რომ 2020 წლის 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
დღეს კორონავირუსს მსოფლიოს რამდენიმე ქვეყანაში ებრძვიან. საქართველოში ვირუსის 3 შემთხვევაა დადასტურებული.
ნათია ლომიძე