თბილისის ინფექციური საავადმყოფოს ბოქსირებული განყოფილების ხელმძღვანელი მარინა ენდელაძე აცხადებს, რომ ზოგადად, ვირუსებს ახასიათებთ მუტაცია და ეს ახასიათებს კორონავირუსსაც.

„მუტირებული შემთხვევები იყო სხვაც, მაგრამ ეს შემთხვევები ვერ ახდენდა გავლენას, იმდენად მცირე იყო ეს მუტაცია; განსაკუთრებული გავლენა, კლინიკური და ასევე ეპიდემიოლოგიური, არ მოუხდენია“, – აცხადებს მარინა ენდელაძე.

რაც შეეხება ახალ შტამს, ენდელაძის თქმით, ეს მნიშვნელოვანი მუტაციაა, რამაც ვირუსს შესძინა აქტიურად გადადების უნარი.

„კლინიკური მაჩვენებლებით, ის არ არის ისეთი, რომ განსაკუთრებული სიმძიმით გამოირჩეოდეს ან რამე სხვა განსაკუთრებული გამოხატულება ჰქონდეს. გადამდებობის უფრო მომატება არ არის სასურველი, ვინაიდან „კოვიდ-19“-ის გავრცელება იყო აქტიური და ახალი შტამი მეტად გავრცელებადია. ამისთვის, უფრო მეტი სიფრთხილეა საჭირო. სხვა არაფერი არ არსებობს, გარდა იმისა, რაც არის არსებული შეზღუდვები, დისტანცია, ჰიგიენა, პირბადე – ეს უნდა იყოს აუცილებელი ატრიბუტი. ვფიქრობ, ამას თუ შევძლებთ, მაინც ნაკლები შემთხვევა იქნება“, – განაცხადა ენდელაძემ.

მარინა ენდელაძის თქმით, შეზღუდვები აუცილებელია, რადგან ადამიანები სრულყოფილად მაინც არ ვიცავთ წესებს.

„თუკი შეზღუდვები შემცირდება, მაგრამ ჩვენ დავიცავთ რეგულაციებს, ვფიქრობ, ძალიან არ უნდა გაიზარდოს რაოდენობა. ეს აუცილებლად არის დამოკიდებული მოსახლეობაზე“, – განაცხადა მარინა ენდელაძემ.

1tv.ge