ჯანდაცვის საერთაშორისო ორგანიზაციაში ვერ აზუსტებენ, არის თუ კორონავირუსის ახალი სახეობა - ომიკრონ-შტამი - კოვიდის სხვა სახეობებზე გადამდები, და იწვევს თუ არა ის დაავადების უფრო მძიმე ფორმას, თუმცა დადასტურებით ამტკიცებენ, რომ ის კოვიდგადატანილებისთვის ხელმეორე დაინფიცირების კუთხით სხვა შტამებთან შედარებით მეტ რისკს შეიცავს.

„წინასწარი მონაცემები გვიჩვენებენ, რომ განმეორებითი დაინფიცირების ალბათობა ომიკრონ-შტამის შემთხვევაში დელტაზე მეტია“, - ნათქვამია ჯანმოს სპეციალურ განცხადებაში.

ამავე დროს, ორგანიზაციაში ხაზი გაუსვეს, რომ ჯერ არაა საკმარისი ინფორმაცია, რომელიც ადასტურებს, რომ ზოგადად ომიკრონი დელტაზე საშიშია.

„ჯერ გაურკვეველია, არის თუ არა ომიკრონი უფრო გადამდები ადამიასგან ადამიანზე, რადგანაც ამ ეტაპზე ახალი შტამით დაავადება მასობრივი არაა, შესაბამისად, მისი გადადების უნარიც, და მიმდინარეობის სიმძიმე ღია საკითხებად რჩება“, - მიიჩნევენ ჯანმოში.

ორგანიზაციაში აღნიშნავენ, რომ სამხრეთ აფრიკაში, სადაც ომიკრონი პირველად დაფიქსირდა, ამ შტამით დაავადებულთა რაოდენობა გაიზარდა, თუმცა, ჯერ დასადგენია იყო თუ არა ეს მისი განსხვავებული თვისებების დამსახურება, თუ ზრდას ხელი სხვა ფაქტორებმაც შეუწყვეს.

ასევე გაურკვეველი რჩება რამდენად მძიმეა დაავადების მიმდინარეობა დელტასთან და სხვა შტამებთან შედარებით.

„სამხრეთ აფრიკაში ჰოსპიტალიზების შემთხვევების ზრდა დაფიქსირდა, თუმცა, შესაძლოა, ეს დაკავშირებული იყოს არა კოვიდის ახალ სახეობასთან, არამედ ზოგადად დაინფიცირების ზრდასთან - გასათვალისწინებელია ისიც, რომ ჰოსპიტალიზაცია სხვა ქვეყნებშიც, ომიკრონის გარეშეც, იზრდება“, - ნათქვამია ჯანმოს განცხადებაში.

ასევე დაუდგენელია, რამდენად განსხვავდება ახალი ვირუსით დაინფიცირების სიმპტომები კორონავირუსის სხვა სახეობებისგან.

„ომიკრონის სიმძიმის ხარისხის დადგენას რამდენიმე კვირა დასჭირდება. ასევე დროა საჭირო იმის გასარკვევად, აქვს თუ არა მას დელტასგან და სხვა სახეობებისგან განსხვავებული სიმპტომები“, - ნათქვამია ჯანდაცვის საერთაშორისო ორგანიზაციის განცხადებაში.

გარდა ამისა, ჯანმო დღეს მთავარ საკითხს იკვლევს - რამდენად ეფექტურია ახალი შტამის წინააღმდეგ უკვე მოქმედი ვაქცინები? ერთიანი აზრი ამ საკითხში ჯერ არ არსებობს, თუმცა, ამ ეტაპზე ვირუსოლოგები მიიჩნევენ, რომ, სავარაუდოდ, ომიკრონს ვაქცინების გვერდის ავლის თვისებები გააჩნია, მაგრამ ყველა შემთხვევაში, აცრა მძიმე დაავადების და სიკვდილიანობის რისკს ამ შემთხვევაშიც ამცირებს.

ჯანმოში ხაზი გაუსვეს, რომ ვაქცინაციას ჰოსპიტალიზაციის და სიკვდილიანობის შემცირების კუთხით გადამწყვეტი მნიშვნელობა ენიჭება, და ახალი შტამის გამოჩენა ამას არ ცვლის.

24 ნოემბერს ბრიტანელმა მეცნიერებმა გაავრცელეს ინფორმაცია ახალი შტამის თაობაზე, რომელიც შესაძლოა, მუტაციების დიდი რაოდენობის გამო, დელტაზე საშიში აღმოჩნდეს. მათი ვარაუდით, ის პირველად ბოტსვანაში, შემდეგ სამხრეთ აფრიკაში და ჰონკონგში დაფიქსირდა.

მოგვიანებით, სამხრეთ აფრიკის ჯანდაცვის მინისტრმა ჯო ფოალამ კორონავირუსის ახალი შტამის გამოჩენა ოფიციალურად დაადასტურა. შემდეგ ახალი შტამი ბელგიაში, ისრაელში, ავსტრალიაში, გერმანიაში, ბრიტანეთში, ნიდერლანდებში, და სხვა ქვეყნებშიც დაფიქსირდა.

შტამს დაარქვეს „ომიკრონი“ - ეს ბერძნული ანბანის მე-15 ასოა.

rbc