ზუგდიდში კორონავირუსის სამი ახალი შემთხვევა გამოვლინდა. „კოვიდ-19“-ზე დადებითი პასუხი ინფიცირებული კაცის დედისა და ორი მცირეწლოვანი შვილის ტესტებზე მიიღეს.
კაცს, რომელსაც ზუგდიდში კორონავირუსი დაუდასტურდა, სომხეთში მოგზაურობის ისტორია აქვს. ის 17 აპრილიდან პირველ მაისამდე თავის სახლში თვითიზოლაციაში იმყოფებოდა. ამის შემდეგ კი შიდა გადაზიდვები ფოთსა და თბილისში განახორციელა. ამის შესახებ ზუგდიდის საზოგადოებრივი ჯანდაცვის ცენტრის დირექტორმა ნანა ოდიშარიამ განაცხადა.
მისი ინფორმაციით, პაციენტის ოჯახის წევრები კარანტინში მოათავსეს. მიმდინარეობს ეპიდ-კვლევა სხვა კონტაქტების გამოსავლენადაც. კოვიდინფიცირებული კაცი რუხის საავადმყოფოში მკურნალობს.
ფოთში კი, მიზნობრივი კვლევების ფარგლებში, კორონავირუსზე საგანგებო სიტუაციების კოორდინირებისა და გადაუდებელი დახმარების ცენტრის თანამშრომლების კვლევა დასრულდა.
საგანგებო სიტუაციების კოორდინირებისა და გადაუდებელი დახმარების ცენტრის ხელმძღვანელმა, კესო გელენიძემ განაცხადა, რომ სულ 58 ნიმუში აიღეს და ყველა პასუხი უარყოფითია.
რაც შეეხება აჭარას, ბათუმის ცხელების ცენტრებში დღეს შესული პაციენტებიდან კორონავირუსი არც ერთს არ დაუდასტურდა.
ბოლნისიდან ლუგარის ლაბორატორიაში კორონავირუსზე 150 ადამიანის ნიმუშია გადაგზავნილი.
მათგან 112, სოფელ გეტადან აიღეს, 30 - მოსაზღვრე სოფელ ფოცხვერიანიდან, ხოლო რვა ქალაქ ბოლნისიდან.
ამ დროისთვის ბოლნისში კორონავირუსის 145 დადასტურებული შემთხვევა ფიქსირდება, მათგან 51 გამოჯანმრთელდა, სამი კი, გარდაიცვალა.
ამ დროისთვის საქართველოში სულ 683 შემთხვევაა დადასტურებული. მათ შორის, გამოჯანმრთელებულია - 419.
Imedinews
კორონავირუსი
