„კონკურენტი კომპანიები ცდილობენ საერთო ენა გამონახონ ერთმანეთთან და მომხმარებლის წინააღმდეგ იმუშაონ“,— ამის შესახებ ეკონომიკის დოქტორმა, პროფესორმა, თსუ–ს ანალიზისა და პროგნოზირების ცენტრის დირექტორმა ვახტანგ ჭარაიამ, გიორგი აბაშიშვილის საავტორო გადაცემაში „ბიზნეს ინსაიდერი“ განაცხადა.
„ქვეყანაში ძალიან ბევრ რამეს აფუჭებს კონკურენციის ნაკლებობა, აქ არ ვგულისხმობ რომ არ არსებობენ კონკურენტი კომპანიები, არამედ ეს კომპანიები ცდილობენ საერთო ენა გამონახონ ერთმანეთში და კონკურენციაში კი არ შევიდნენ, არამედ მომხმარებლებთან წინააღმდეგ იმუშაონ და გარკვეულ გარიგებაში იყვნენ ერთმანეთთან. ამას ვხედავთ ფარმაცევტულ, ნავთობიმპორტიორების, კომუნიკაციების და ყველა მსხვილ ბაზრებზე. ჩემი გადმოსახედიდან ოლიგოპოლიური ნიშნებია, რომელსაც დარეგულირება სჭირდება.
ყველა არსებული კომპანია ცდილობს საერთო ენა გამონახოს და როდესაც უცხოეთიდან მსხვილი ახალი მოთამაშე შემოდის ბაზარზე, ძირითადად ამ თამაშის წესებს ვერ ერგება და გადის ბაზრიდან.
რაც შეეხება წარმოებას, ზოგადად მზა პროდუქტის შექმნა ყველა ქვეყნისთვის საუკეთესო გამოსავალია, ის ქვეყნებიც კი ვინც ფინანსურ სექტორზე გადავიდნენ და წარმოება გაწიეს ქვეყნის ფარგლებს გარეთ, დღეს უკვე ცდილობენ უკან დააბრუნონ, რადგან ქვეყანა ითხოვს ამას“, — ამბობს ვახტანგ ჭარაია.
მისი თქმით, ქვეყანას კონკურენტული უპირატესობის მოსაპოვებლად მართალია მრავალფეროვანი არჩევანი არ აქვს, მაგრამ თანამედროვე ტექნოლოგიები არის ის სფერო რომელიც დღეს ჩვენთვის ყველაზე მეტად ასათვისებელია.
„საინვესტიციო პოლიტიკაში ერთ-ერთი მთავარი პოზიციონირება საინფორმაციო ტექნოლოგიები თუ იქნება ეს ყველაზე კარგია, თან გვაქვს ამის რესურსი და დიდი პერსპექტივა. IT ტექნოლოგიების სფერო სადაც განვითარებულია იქ ძვირი ღირს ამ სექტორში მუშაობა, მაგრამ საქართველოს აქვს შესაძლებლობა თუნდაც 500, 1000, 1500 ლარად აკეთონ ის საქმე რაც სხვაგან ბევრად ძვირი ღირს. ამ ნიშის ათვისება ძალიან კარგი იქნება“, — ამბობს ჭარაია.