„კომუნიკაციის გარეშე და ასე დაჩქარებული წესით მსგავსი მნიშვნელობის კანონპროექტის განხილვა - უწესობაა“, - ასე აფასებს პარლამენტის დამოუკიდებელი დეპუტატი კახა ოქრიაშვილი ჯანდაცვის სამინისტროს მიერ წარდგენილ კანონპროექტს.
ჯანდაცვის სამინისტრომ მედიკამენტების რეგისტრაციის ვადის შესახებ კანონპროექტი მოამზადა. დოკუმენტის მიხედვით, საუბარია უცხოეთში რეგისტრირებული მედიკამენტების აღიარების პროცესზე, რომელსაც დღეს 7 დღე ესაჭიროება, თუმცა იმ შემთხვევაში თუ პარლამენტი მედიკამენტების რეგულირების შესახებ კანონპროექტს დაამტკიცებს, ახალი წამლის რეგისტრაციის ვადა 30 დღემდე გაიზრდება. გარდა ამისა, სსიპ სამედიცინო და ფარმაცევტული საქმიანობის რეგულირების სააგენტოს უფლებამოსილებები იზრდება, ხოლო სამედიცინო გადაცდომებში დავების და სანქციების განხილვის პროცესში სასამართლო ზედამხედველობის მოდელი ნაწილობრივ შეიცვლება და ამ პროცესში სამინისტროს ფუნქციები გაიზრდება.
„ფარმაცევტულ ბაზარზეც შეაქვთ ცვლილებები უცხოეთში რეგისტრირებული მედიკამენტების აღიარების პროცესზე, რომელსაც დღეს 7 დღე ესაჭიროება, რეგულირების შესახებ კანონპროექტს დაამტკიცებს შემდეგ, ახალი წამლის რეგისტრაციის ვადა 30 დღემდე გაიზრდება. ფაქტია, რომ ბიზნესი უფრო სწრაფად მუშაობს ვიდრე სახელმწიფო სტრუქტურა, ამიტომ რა ჯობია ბიზნესი შენელდეს თუ სახელმწიფო სტრუქტურამ აუწყოს ფეხი? მგონი მეორე. თუმცა, ხანდახან არის შემთხვევები როდესაც 7 დღე მართლაც ცოტაა, მაგრამ ამაზე ორივე მხარე უნდა შეთანხმდეს და კომუნიკაცია უნდა იყოს.
მოვუწოდე ორივე მხარეს, რომ ამ კანონპროექტის მიღება დაჩქარებული წესით არ ყოფილიყო. გარდა ამისა, კომუნიკაცია ჯანდაცვის სამინისტროს არცერთ ასოციაციასთან, კლინიკასთან, ფარმაცევტულ კომპანიასთან არ ჰქონია. ეს კანონები იწერება იმისთვის, რომ ამ ხალხმა შეასრულოს და თუ ისინი წინასწარ არ ჩააყენეს საქმის კურსში, ძალიან ცუდია. კანონი არც ძალიან მკაცრი უნდა იყოს, რომ მისი დაცვა ვერავინ შეძლოს და არც ლიბერალური. გუშინ გვიან ღამით გამოგვიგზავნეს დოკუმენტი და გაცნობა ვერც მოვასწარით, აქამდე საერთოდ არაფერი ვიცოდით. ძალიან არასწორი მიდგომაა, როდესაც საუბრის გარეშე ერთპიროვნულად ხდება მსგავსი საკითხების გადაწყვეტა“, - განაცხადა კახა ოქრიაშვილმა.
აღსანიშნავია, რომ ჯანდაცვის კომიტეტისა და დარგობრივი ეკონომიკისა და ეკონომიკური პოლიტიკის კომიტეტების გაერთიანებულ სხდომაზე, რომელზეც ჯანდაცვის მინისტრის მოადგილე, თამარ გაბუნია დაჩქარებული წესით ჯანდაცვის სფეროს რეგულირების კანონპროექტს განიხილავდა, საკითხის კენჭისყრა გადაიდო. დეპუტატების მთავარი უკმაყოფილება კანონპროექტის პარლამენტში განხილვამდე სფეროს წარმომადგენლებთან კონსულტაციების არარსებობამ გამოიწვია. მათი თქმით, კანონპროექტზე კენჭისყრის გამართვა კონსულტაციების გამართვის შემდეგ უფრო ლოგიკური იქნებოდა.
ნინო თამაზაშვილი