რადიო ”კომერსანტის” გადაცემა კომერსანტის დილაში კომუნა მზესუმზირას დამფუძნებელმა რატი რამიშვილმა ისაუბრა.
მისი განცხადებით, როდესაც საქართველოში კორონავირუსის შემთხვევა დაფიქსირდა, მზესუმზირას მფლობელებმა თავიანთი საქმიანობა რეგულაციების დაწესებამდე შეაჩერეს, რადგან ზუსტად არავინ იცოდა თუ რამდენად საშიში იყო ეს ვირუსი.
რატი რამიშვილმა აღნიშნა, რომ როდესაც მთავრობამ ღია სივრცეებს მუშაობის შესაძლებლობა მისცა, კომუნა მზესუმზირამ რეკომენდაციების სრული დაცვით ღია სივრცეში 1000 კაციანი ივენთი მოაწყო, თუმცა მიუხედავად იმისა, რომ 4000 კაციან სივრცეში მხოლოდ 1000 ადამიანი ჰყავდათ, მაინც დაჯარიმდნენ.
გარდა ამისა, კომუნა მზესუმზირას საახალწლოდ დაგეგმილი ივენთიც ჩაეშალა, რის გამოც ბევრ ფინანსური ვალდებულება დაეკისრათ.
ამ ყველაფერს კრედიტით და სხვა ფინანსური ვალდებულებებით შევხვდით. რა თქმა უნდა, ასეთ ხანგრძლივ პანდემიას არ ველოდით, შესაბამისად ამდენი ხანი რომ გავჩერდით, ძალიან დავზარალდით.
რაღაც ღონისძიებები ისე დავგეგმეთ, რომ მინიმალური ვალდებულებები დაგვეკმაყოფილებინა, ზაფხულში რამდენიმე ივენთი გვქონდა დაგეგმილი, პირველივე ივენთის ჩატარებისთანავე შრომის ინსპექციამ, თვითნ ბექა ფერაძემ დაგვაჯარიმა. - აღნიშნა რატი რამიშვილმა
ამ ეტაპზე, მზესუმზირას დონაციის იმედი აქვს და საზოგადოებისგან მხარდაჭერას ელოდება. როგორც რატი რამიშვილმა აღნიშნა,ადამიანები მხარს უჭერენ და ამ ეტაპისთვის გარკვეული თანხის მოგროვებაც შეძლეს.
ონლაინ რეჟიმში არაფერი გამოდის, ჩვენ ისეთ სფეროს წარმოვადგენთ, რასაც დისტანციურად ვერ გაყიდი. მზესუმზირა არის სოციალური პროექტი.
გარდა იმისა, რომ შესაძლოა მზესუმზირამ არსებობა ვერ გააგრძელოს, აქ დასაქმებულ ადამიანებიც გარკვეულ პრობლემებში და სირთულეებში ჩავარდნენ და სანამ სრულიად გავკოტრდებოდით დახმარება საზოგადოებისგან ვითხოვეთ.
ჩვენ ადამიანებისგან უბრალოდ დახმარების მიღება არ გვინდოდა, დღეს ძალიან ბევრ ადამიანს უჭირს და რთულია ვინმეს დახმარება სთხოვო.
ამიტომ გადავწყვიტეთ, რომ მათთვისაც ამ ძალიან დიდი დახმარების სანაცვლოდ, რაიმე სიმბოლური შეგვეთავაზებინა და მათ სიმბოლურად ჩვენი პინები, პოსტერები და სხვადასხვა საჩუქრები გადავეცით.
ასევე წინასწარ ვყიდით მომავალი ივენთის ბილეთებს, რომელიც არ ვიცით როდის ჩატარდება.
დონაციისთვის სხვადასვხა აქტივობები გვაქვს მოფიქრებული, პოსტებს ვწერთ სოციალურ ქსელში და ვცდილობთ რომ ადამიანებს სხვადასხვა გზით თავი შევახსენოთ. - აღნიშნა რატი რამიშვილმა.
თაკო კვაჭანტირაძე