„პანდემიის პირობებში ჯავშნების კუთხით საკმაო ცვლილებებია, ძირითადად ბოლო წუთის ჯავშნები გვაქვს, რადგან კომპანიებს უჭირთ მომავლის პროგნოზირება და ვიზიტის ადრე დაგეგმვა,“ - ამის შესახებ „კომერსანტს“ სასტუმრო შერატონ გრანდ მეტეხი პალასის საზოგადოებასთან ურთიერთობის სამსახურში ესაუბრნენ.
როგორია დედაქალაქის სასტუმროების მუშაობა ფრენების ეტაპობრივი აღდგენის შემდეგ და იღებს თუ არა საქმიან ტურისტებს სასტუმრო, ამის შესახებ შერატონში განმარტავენ, რომ სასტუმრო ამჟამად დიდ ჯგუფებს ვერ უმასპინძლდება და პანდემიის გავლენა შემოსავლებზეც აისახა, თუმცა სასტუმრო გახსნას გარკვეული სიახლეებით მაინც შეეცადა.
„ბუნებრივია, როგორც სტუმარმასპინძლობის ინდუსტრიისთვის, ასევე ჩვენი სასტუმროსთვისაც 2020 საკმაოდ რთული წელი იყო, რა თქმა უნდა ეს შემოსავლებზეც აისახა.
რეგულაციების გათვალისწინებით ვერ ვუმასპინძლდებით ისეთ დიდ ჯგუფებს, როგორც პანდემიამდე პერიოდში. ახლა ჩვენთვის მთავარი სამიზნე აუდიტორიაა მცირე და საშუალო ჯგუფები. იმედი გვაქვს წლის ბოლოს სიტუაცია უკეთესობისკენ შეიცვლება და სასტუმრო ჩვეული დატვირთულობით განაახლებს მუშაობას.
რაც შეეხება სიახლეებს, განვაახლეთ რესტორნის მენიუები, ასევე გაიხსნა სპა და სატრენაჟორო დარბაზი, ამ ეტაპზე ჩვენთვის პრიორიტეტულია მომხმარებელთა უსაფრთხოების მაქსიმალურად დაცვა,“ - განმარტავენ შერატონში.