2021 წლის თვითმმართველობის არჩევნებამდე  ერთ თვეზე ნაკლები რჩება, პოლიტიკური პარტიების წინასაარჩევნო კამპანიები დასკვნით ფაზაში შედის,  ასევე გააქტიურებულია ფინანსური შემოწირულობებიც. „კომერსანტმა“ შეაჯამა თუ რა ოდენობის შემოწირულობა მიიღო ამა თუ იმ პარტიამ სხვადასხვა კომპანიებისგან 9 სექტემბრის მდგომარეობით და რომელია ბიზნესებიდან ყველაზე მსხვილი შემომწირველი.

„ქართული ოცნება — დემოკრატიული საქართველო“

აუდიტის სამსახურის მონაცემების მიხედვით, კომპანიების მიერ შემოწირულობების მიხედვით პირველ ადგილზე „ქართული ოცნება - დემოკრატიული საქართველოა“. მან 2021 წლის მანძილზე მხოლოდ კომპანიებისგან  312 500 ლარი მიიღო. პარტიას წინასაარჩევნოდ 40–მა კომპანიამ შესწირა თანხა. 

ქართული ოცნების ყველაზე მსხვილ შემომწირველებს შორის არიან , შპს „ჯონ თაუერსი“, რომელმაც პარტიას16 აგვისტოს 60 000 ლარი შესწირა. შემდეგ მოდის კომპანია „იმერეთი“, რომელმაც მმართველ პარტიას 24 აგვისტოს 50 000 ლარი შესწირა. შპს „აისმა“  ოცნებას 30 000 ლარი, ხოლო შპს „იბოლამ“ 20 000 ლარი შესწირეს.

პარტია ქართული ოცნების სასარგებლოდ 15 000-ლარიანი შემოწირულობა მიმდინარე წელს  4-მა  კომპანიამ განახორციელა: შპს „ევროპა“, „მშენებელი 2012“,  „მშენ-2008“  და  „მშენებელი“. დანარჩენი კომპანიების მმართველი პარტიის სასარგებლოდ  შემოწირულობა 5000  ლარზე ნაკლებია. 

ერთიანი ნაციონალური მოძრაობა 

კომპანიების შემოწირულობების მიხედვით მეორე ადგილზე პარტია „ერთიანი ნაციონალური მოძრაობაა“. მიმდინარე წელს ნაციონალურ მოძრაობას  თანხა ხუთმა  კომპანიამ შესწირა და შემოწირულობის სახით პარტიას  175  000 ლარი ჩაერიცხა. ნაციონალური მოძრაობის ყველაზე  მსხვილი შემომწირველი შპს „ჯი-ემ-პია“, რომელმაც პარტიის  სასარგებლოდ 31 აგვისტოს  120 000 ლარის შემოწირულობა განახორციელა, ნაციონალური მოძრაობის შემდეგი  მსხვილი შემომწირველი „ემ-ეს ჯგუფია“, მან 9 მარტს პარტია ნაციონალური მოძრაობის  სასარგებლოდ 30 000 ლარის შემოწირულობა  განახორციელა.  შპს „საქართველომ“ ნაციონალურ მოძრაობას  პირველ თებერვალს  18 851 ლარი  შესწირა, გარდა ამისა  შპს  „საქართველოს“  პარტიის  სასარგებლოდ მეორედ  15 აგვისტოს  1 200 ლარის  შემოწირულობა აქვს  განხორციელებული, ასევე  შემომწირველებს  შორის  არის  შპს „პსპ ფარმა“, რომელმაც  ნაციონალურ მოძრაობას  მიმდინარე  წლის 31 აგვისტოს  5000 ლარი  შესწირა.

ლელო საქართველოსთვის 

რაც შეეხება პარტია „ლელო საქართველოსთვის“, ჯერჯერობით მას  მხოლოდ ორი  შემომწირველი კომპანია ჰყავს. ჯამში კომპანიების მხრიდან შემოწირულობამ 54 666 ლარი შეადგინა.  ესენია შპს „მეგაკო“, რომელმაც  პარტია  ლელოს სასარგებლოდ  50 000 ლარი შემოწირულობა 4 მარტს  გაიღო და შპს „ალბატროს პრეზიდენტი“, რომელმაც  ლელოს  30 აგვისტოს  4 666 ლარი შესწირა. 

პარტია საქართველოსთვის 

კომპანიების მხრიდან შემოწირულობების მიხედვით მეოთხე ადგილზე, ახლად  შექმნილი პარტია „საქართველოსთვისაა“. მიმდინარე წელს გიორგი გახარიას პარტიას 5 შემომწირველი კომპანია უფიქსირდება, რომელთა მიერ პარტიის სასარგებლოდ განხორციელებულმა  შემოწირულობებმა ჯამში  31 000 ლარი შეადგინა, ყველაზე მაღალი შემოწირულება 20 000 ლარია, პარტიას შპს „ლიდერ-ბილდერი 777“-მა მიმდინარე წლის 20 ივლისს ჩაურიცხა, შემდეგია შპს „ბექარიონ 7“-ის მიერ განხორციელებული 10 000-ლარიანი შემოწირულობა, გარდა ამისა, პარტიას საქართველოსთვის  600-600 ლარი ორჯერ  კომპანია „მბც“-მ და 600 ლარი შპს „მეგრულმა ჩაიმ“ ჩაურიცხეს. 

რაც შეეხება „ევროპულ საქართველოს“, მიმდინარე წელს მას კომპანიების მხრიდან შემოწირულობა არ უფიქსირდება, აღნიშნული პარტიის შემომწირველები მხოლოდ ფიზიკური პირები არიან.