კომპანია „უმალსა“ და საავტომობილო გზების დეპარტამენტს შორის არსებული პრობლემა მას შემდეგ მოგვარდა რაც,დავაში საქართველოს პრემიერ მინისტრი ჩაერთო და ”უმალს“ საწარმომდე მისასვლელი გზის 2020 წელს დასრულებას დაჰპირდა.
როგორც ცნობილია, კომპანია გასულ წელს „კომერსანტთან“ საუბრისას საავტომობილო გზების დეპარტამენტს ბიზნესისთვის ხელის შეშლაში ადანაშაულებდა. კერძოდ, ხელმძღვანელების ინფორმაციით, საგზაო დეპარტამენტმა ცენტრალური მაგისტრალიდან ქარხნამდე მისასვლელი გზა დაკეტა, რის გამოც კომპანიას საკმაოდ ბევრ პროექტზე და ინვესტორების მოზიდვაზე ხელი ეშლებოდა.
დღეს „უმალის“ გენერალური დირექტორი, გენო ნასყიდაშვილი აცხადებს, რომ ცუდი ამინდის პირობებში ქარხანამდე მისვლა ფაქტობრივად შეუძლებელია. სწორედ ეს მიზეზი გახდა საკმაოდ ბევრი საინვესტიციო პროექტის გადადების საფუძველი. „საბედნიეროდ, პრობლემა გადაიჭრა და 2020 წელს გზა გვექნება. გზა რეალურად ვერ კეთდება მორკალური მონაკვეთის გამო, რომელიც არის ქარხანასთან ახლოს და უკავშირდება ცენტრალურ მაგისტრალს, სადაც მოძრაობის უსაფრთხოების ვარიანტი უნდა დამტკიცდეს. ეს არის რეალური მიზეზი რომელიც მოგვარდება ორივე მხარის სასარგებლოდ.“-ამბობს გენო ნასყიდაშვილი.
რაც შეეხება პროდუქციას და ბაზარზე მის კონკურენტუნარიანობას, გენო ნასყიდაშვილის თქმით, საწარმო უმაღლესი ხარისხის პროდუქციას ქმნის, რომელიც ბაზარზე დიდი პოპულარობით სარგებლობს.
„შარშან ჩვენს პროდუქტს გოლდენ ბრენდის სახელწოდება მიენიჭა და დარწმუნებულები ვართ, რომ წელსაც იგივე შედეგი გვექნება. ასორტიმენტი ყოველთვის მზარდი გვაქვს. 2020 წელს ახალი პროდუქტიც შეგვემატა, ქაშაყისგან დამზადებული სალათი. მსგავს პროდუქტს ყოველთვის ვამატებთ და ვთავაზობთ მომხმარებელს.“-ამბობს გენო ნასყიდაშვილი.
„უმალის“ ხელმძღვანელი აცხადებს, რომ სახელმწიფო უწყებასა და კომპანია „უმალს“ შორის არსებული დავის გამო გადაიდო ბრენდული მაღაზიის გახსნაც, რომელის გახსნასაც კომპანია 2019 წლის ბოლოს,თბილისში ერთ-ერთ ცენტრალურ უბანში გეგმავდა. მისი განცხადებით, პროექტი მას შემდეგ განხორციელდება, როდესაც ქარხნამდე მისასვლელი გზის მშენებლობა დასრულდება.
კომპანია „უმალი“ ბაზარზე 2017 წლიდან ოპერირებს. ის სასოფლო-სამეურნეო პროდუქციის გადამამუშავებელი და შემნახველი საწარმოების თანადაფინანსების პროგრამის ბენეფიციარია. საწარმოში ჯამურად 1,500,000 აშშ დოლარი ინვესტიცია განხორციელდა, აქედან, 249,081 აშშ დოლარი გრანტია, ხოლო 311,352 აშშ დოლარი შეღავათიანი აგროკრედიტი.
თევზის გადამამუშავებელი კომპანია და ქარხანა ქარელის რაიონის სოფელ ურბნისში მდებარეობს. აღნიშნული საწარმო „ერთიანი აგროპორექტის“ ფარგლებში შეიქმნა.კომპანიას მეურნეობა 1 ჰექტარზე აქვს გაშენებული, ხოლო საწარმო ჯამში 2 000 კვადრატულ მეტრზეა განთავსებული.
ნათია ლომიძე