ცხოველებისა და ფრინველის საკვების მწარმოებელი ქართული კომპანია ,,ნურტიმაქსი“ აფრიკის ბაზარზე ფართოვდება. განასა და უგანდაში წარმატებული ექსპორტის შემდეგ, კომპანიამ  გეზი ნიგერიისკენ აიღო. ამასთან, ,,ნუტრიმაქსი“ ერთ-ერთი მოთხოვნადი პროდუქტია რეგიონის ბაზრებზეც.

ამ ეტაპზე კომპანიის მენეჯმენტი  დიდ ინტერესს იჩენს განვითარებადი ქვეყნების ბაზრების მიმართ, თუმცა პარალელურად აქტიური მუშაობა მიდის ევროპის ბაზრებზე ნიშის დასამკვიდრებლად. როგორც ,,ნუტრიმაქსის“ ტექნიკური ჯგუფის მენეჯერი რეზო ლაფაჩი ,,კომერსანტთან“ ამბობს, ჯერჯერობით ბიუროკრატიული ბარიერის გამო ევროპის ბაზარზე პირდაპირი ექსპორტი გარკვეულ სიძნელეებთან არის დაკავშირებული.

,,ჩვენ ვამკვიდრებთ ინოვაციებს, ვქმნით პროდუქტს, რომელიც ფერმერს უტოვებს კარგ მოსავალს და განვითარების შესაძლებლობას აძლევს. აზერბაიჯანსა და სომხეთში კარგად ვმუშაობთ,  აფრიკის ბაზარზე ექსპორტი პირველად 2019 წელს განვახორციელეთ,  განასა და უგანდას ბაზრების შემდეგ კი ჩვენი პროდუქტი  უკვე მალე ნიგერიაშიც გაიყიდება. ეს არის  300 მილიონიანი ბაზარი და იქ შესვლა დიდი გამოწვევაა ჩვენთვის. ვცდილობთ, მოთხოვნადი იყოს ჩვენი პროდუქტი და ამავე დროს იქაური ბაზრის განვითარებასაც შევუწყოთ ხელი. ამასთან, პრიორიტეტად რჩება ასევე ევროპა, სადაც ჯერჯერობით ვერ შევდივართ - სინქრონიზაციის პროცესში ვართ ევროპის კანონმდებლობასთან, სტანდარტი იხვეწება და მალე სრული შესაძლებლობა გვექნება, რომ ეს მიმართულებაც მოვიცვათ. თუმცა ნიდერლანდებში გვყავს ოფიციალური პარტნიორი, რომელიც გვეხმარება რეგიონული ბაზრების ათვისებაში“, - ამბობს რეზო ლაფაჩი ,,კომერსანტთან“.

რაც შეეხება საწარმოო პროცესზე პანდემიის გავლენას, როგორც რევაზ ლაფაჩი ამბობს, ამან კონკრეტულად ამ ბიზნესზე დადებითად იმოქმედა, რადგან ცხოველის საკვების მიმართ მოთხოვნა გაიზარდა.

„მიუხედავად იმისა, რომ პანდემია ზოგადად ცუდად მოქმედებდა ბიზნესზე, სტრესული გარემო იყო და რამდენიმე დიდი წარმოება გაჩერდა კიდეც, მთლიანობაში ცხოველთა კვების ბაზარი განვითარდა. ჩვენ შემთხვევაში, 2021 წელს 35%-იანი ზრდა დავაფიქსირეთ პანდემიამდელ 2019 წელთან შედარებით. ჩვენი მოქალაქეების არცთუ მცირე ნაწილი გავიდა რეგიონებში. პანდემიისას ვიღაცამ ქათამი გაიჩინა, ვიღაცამ ბოცვერი, ძროხა და ასე თანდათან კომბინირებულ საკვებზე მოთხოვნა გაგვეზარდა“, - ამბობს მეწარმე.

მისივე ინფორმაციით, ,,ნუტრიმაქსის“ წარმოებული პროდუქციის 60% ადგილობრივ ბაზარზე იყიდება. დანარჩენი 40% ექსპორტზე გადის.

ცნობისთვის, „ნუტრიმაქსი“ დაარსდა 2009 წელს და ის პირველი კომპანიაა საქართველოში, რომელიც ცხოველთა და ფრინველთა საკვებს ინდუსტრიულად აწარმოებს.

კომპანიის მისიაა მაღალხარისხიანი პროდუქციის, თანამედროვე ტექნოლოგიებისა და კვალიფიციური კონსულტაციების მიწოდების საშუალებით, განავითაროს ფერმერული მეურნეობები საქართველოში. კომპანია დაარსების დღიდან ჰოლანდიური მსხვილი ჰოლდინგის წევრის — Trouw Nutrition Hifeed-ის ოფიციალური პარტნიორია, რომელსაც ცხოველთა საკვების, აუცილებელი პრემიქსებისა და მინერალების წარმოებაში მსოფლიოში ლიდერის პოზიცია უკავია. 

მარი ჩიტაია