რუსეთის ბაზარზე ქართულ ღვინოზე მოთხოვნა და ფასიც მოიმატებს. მას შემდეგ, რაც ევროპის უმეტესმა ქვეყანამ რუსეთს სანქციები დაუწესა და ეკონომიკური კავშირები შეაჩერა, ქვეყანაში დეფიციტის სერიოზული რისკია. როგორც კომპანია ,,მარნისკარის“ დირექტორი ვაჟა ციგროშვილი ,,კომერსანტთან“ ამბობს, ჯამში ეს არის  750 მილიონი ბოთლი ღვინო ევროპიდან, რასაც რუსეთი ვერ მიიღებს. შესაბამისად, ქართული ღვინოზე მოთხოვნა გაიზრდება. ციგროშვილის ვარაუდით, მინიმუმ, გაორმაგდება, თუკი პოლიტიკური ვითარება ამ პროცესს ხელს არ შეუშლის.

როგორც მეწარმე ამბობს, ომის მიუხედავად, რუსეთში ექსპორტი არ შეუჩერებია, მაგრამ გარკვეული პრობლემა არის, ძირითადად გადარიცხვებთან დაკავშირებით, რაც შეიძლება მალე გამოსწორდეს.

,,გადაზიდვებს ვახდენთ სახმელეთო გზით, ლარსის მეშვეობით. წყვეტა ძირითადად ამინდის გამო შეიძლება იყოს, სხვა მხრივ მიწოდებაში დაბრკოლება არ არის. თუმცა გართულდა ყველაფერი, პრობლემაა გადარიცხვებთან დაკავშირებითაც, მაგრამ ეს დროებითია და სიტუაცია თანდათან ლაგდება. ჩვენს ბაზარზე რუსეთს 60% უჭირავს. მაქსიმალურად შევეცადეთ, ეს წილი შეგვენარჩუნებინა, მაგრამ ამავდროულად სხვა ბაზრებზეც გაგვაქვს პროდუქტი. ჯერჯერობით რუსული ბაზარი ჩვენი კომპანიისთვის დომინანტია. რაც შეეხება ფასს, ჯერჯერობით  არასტაბილურია, ვინაიდან ყველა კომპანია ცდილობს ისარგებლოს ამ მდგომარეობით, გარკვეული დასახელების ღვინო ძვირდება, მაგრამ ზოგი პირიქითაც - ფასი მცირდება. სამწუხაროდ, საქართველოს მხრიდან ადგილი აქვს პროდუქტის შეთავაზებას ნაკლებ ფასში, რადგან ცდილობენ, მეტი გაიტანონ.  ეს ტენდენციაც გამოიკვეთა. ადგილობრივ ბაზარზეც მცირე ცვლილებაა, მაგრამ ბაზარზე გავლენა ჯერჯერობით არ იგრძნობა“, - ამბობს ციგროშვილი.

როგორც ღვინის ექსპორტიორი აღნიშნავს, თუკი პოლიტიკურად არ დაიძაბა სიტუაცია და საქართველო სანქციებთან დაკავშირებით პოზიციას არ შეცვლის, ექსპორტი მნიშვნელოვნად გაიზრდება, მინიმუმ, გაორმაგდება.

,,როგორც ცნობილია ევროპის ქვეყნებიდან პროდუქტის მიწოდება შეწყდა, 750 მილიონ ბოთლზეა ლაპარაკი, ეს დანაკლისი უნდა შეივსოს. აქედან გამომდინარე, მეტი შესაძლებლობაა, რომ რუსეთის ბაზარზე ქართული ღვინის რეალიზაცია გაიზარდოს, თუ პოლიტიკურად არ შეაფერხებენ ამ სი, სულ მცირე,  გაორმაგდება. ფასებიც მეტნაკლებად დაკორექტირდება, უფრო მაინც ზრდის მიმართულებით“, - დასძენს ციგროშვილი.

ცნობისთვის,  ღვინის მწარმოებელი კომპანია „მარნისკარი“ დაარსდა 2011 წელს. კომპანია ეწევა ღვინისა და სხვა ალკოჰოლური სასმელების ექსპორტს მსოფლიოს ისეთ ქვეყნებში, როგორიცაა რუსეთი, ბელორუსია, აშშ, კანადა, ესტონეთი, თურქეთი, უკრაინა, ყაზახეთი და ა. შ.

კომპანიის წლიური წარმადობა 3 მილიონი ბოთლია. ხოლო  ბრუნვა  15 მილიონ ლარს შეადგენს.

შეგახსენებთ, რომ ექსპერტი 2022 წელს რუსეთში ადგილობრივი წარმოების ღვინის 15–20%–ით გაძვირებას ელოდებიან.

,,საქსტატის“ მონაცემით, 2021 წელს რუსეთის ბაზარზე 62 115 759 მლნ ბოთლი ღვინო გავიდა (131 მლნ აშშ დოლარი), რაც მთლიანი ექსპორტის 58%-ს შეადგენს.

მარი ჩიტაია