წყალტუბო უნდა გახდეს ახალი, სარეკრეაციო, გამაჯანსაღებელი კლასტერი სპა-ქალაქი, რომელმაც უნდა გადაწყვიტოს ისეთი ამოცანები, როგორიც არის ქუთაისთან ინტეგრაცია - ამის შესახებ წყალტუბოს გენგეგმის კონცეფციის საკონკურსო ხედვის პრეზენტაციის შემდეგ კომპანია „გეოგრაფიკის“ ხელმძღვანელმა გიორგი გოცაძემ განაცხადა. ინფორმაციას რეგიონული განვითარებისა და ინფრასტრუქტურის სამინისტრო ავრცელებს.
გიორგი გოცაძემ აღნიშნა, რომ წყალტუბოს განვითარებისთვის საჭიროა სპეციალური და განსაკუთრებული ეკოლოგიური სტატუსი, მობილობის გეგმა, არსებული რესურსების და კულტურული მემკვიდრეობის და მოთხოვნების სწორი ბალანსირება და რაც მთავარია სახელმწიფო ქონების იმგვარად დეველოპმენტი, რომ ყველა არსებული ფასეულობების და მოცემულობების შენარჩუნებით ქალაქის რესურსების გაცოცხლება შეძლოს.
დღეს წყალტუბოში კურორტის გენგეგმის კონცეფციის საკონკურსო წინადადებების საჯარო პრეზენტაცია გაიმართა.
საკონკურსო კონცეფციები საზოგადოებას გააცნეს წყალტუბოს განვითარებისათვის ქალაქთმშენებლობითი დოკუმენტაციის შემუშავებაზე გამოცხადებული კონკურსის მონაწილე კომპანიების წარმომადგენლებმა.
ინფრასტრუქტურის სამინისტროს მიერ სექტემბერში გამოცხადებულ კონკურსში წინადადებები სამმა კომპანიამ - შპს „ბაუ დიზაინმა“, შპს „დისტანციური ზონდირებისა და გეოინფორმაციული სისტემების საკონსულტაციო ცენტრი გეორგაფიკმა“ და შპს „არტსტუდიო-პროექტმა“ წარადგინა.