მიწის ნაკვეთზე, რომელსაც თქვენ ფოტოზე ხედავთ წესით სიმინდის ყანები, კომბოსტოს პლანტაციები, ან სულაც კარტოფილის ნათესები უნდა იყოს. ყოველ შემთხვევაში 15 683 კვ. მ. მიწა მარნეულის მუნიციპალიტეტში, სასოფლო-სამეურნეო დანიშნულების მიზნით უნდა გამოიყენებოდეს. თუმცა, სავარაუდო კორუფციული გარიგებით,  დღეს აქ ტირ პარკი - „მწვანე“ ფუნქციონირებს. ექსკლუზიურად „კომერსანტს“ სანდო წყარო უყვება, რომ ადგილობრივმა და ცენტრალურმა მთავრობამ კონკრეტულ სუბიექტებს მწვანე შუქი აუნთეს და ბიზნესსაქმიანობის უხეში კანონდარღვევით დაწყების უფლება მისცეს.

„კომერსანტმა“ გაარკვია, რომ სასოფოლო- სამეურნეო მიწის ნაკვეთის მიზნობრივი დანიშნულების ცვლილების გარეშე, არა სასოფოლო- სამეურნეო დანიშნულებით გამოყენება აკრძალულია. ეს უმნიშვნელოვანესი საკითხი საქართველოს კანონმდებლობით რეგულირდება, თუმცა როგორც ჩანს კანონი შპს „მწვანესთვის“ დაბრკოლება არ ყოფილა. ამავე კანონის შესაბამისად მიწათსარგებლობის კანონიერების მონიტორინგს საქართველოს გარემოს დაცვისა და სოფლის მეურნეობის სამინისტროს მმართველობის სფეროში შემავალი საჯარო  სამართლის იურიდიული პირი - „მიწის მდგრადი მართვისა და მიწათსარგებლობის მონიტორინგის ეროვნული სააგენტო“ ახორციელებს. სახელმწიფო უწყებაში „კომერსანტისგან“ გაიგეს, რომ მარნეულში, სახნავ მიწაზე დაგებულია ბეტონის საფარი და რომ იქ საერთაშორისო გადამზიდავი სატვირთო ავტომანქანების ავტოსადგომი ფუნქციონირებს. როგორც ჩანს ოციციალური დოკუმენტი, რომლის მიხედვითაც სააგენტოს ფუნქციები და უფლებამოსილებები განისაზღვრა ფიქციურ დოკუმენტად დარჩა, რომელიც არ სრულდება. უწყებაში მედიაჰოლდინგს განუცხადეს, რომ სამინისტრომ საკითხის მოკვლევა დაიწყო დამატებით დეტალებს უახლოეს დღეებში განგვიცხადებდნენ.

უხეშ კანონდარღვევის შესახებ ინფორმაცია არა აქვს საკითხზე კიდევ ერთ პასუხისმგებელ უწყებას. სწორედ ეკონომიკის სამინისტროს, სახმელეთო ტრანსპორტის სააგენტომ გასცა ლიცენზია ავტოსადგომის ფუნქციონირებისთვის. ამჯერადაც შპს მწვანეს, კიდევ ერთი მწვანე შუქი აუნთეს და კომპანიამ ყოველგვარი პრობლემების გარეშე სახნავ მიწაზე გადამზიდავი ავტომანქანების ავტოსადგომის ლიცებზია მოიპოვა.

ბიზნეს საქმიანობის წარმატებულ გზაზე, შპს „მწვანეს“ წითელი შუქი მხოლოდ საჯარო რეესტრის ეროვნულმა სააგენტომ აუნთო. კომპანიის დამფუძნებლებმა მიწის კატეგორიის შეცვლა სცადეს, რათა მათ ბიზნეს საქმიანობა კანონდარღვევების გარეშე გაეგრძელებინათ, თუმცა სახელმწიფო უწყებისგან უარი მიიღეს. საჯარო რეესტრის ეროვნული სააგენტოს გადაწყვეტილებაში ნათქვამია, რომ მოთხოვნა  მიწის ნაკვეთის მიზნობრივი დანიშნულების ცვლილების შესახებ არ არის დასაბუთებული.

ერთადერთ უკანონობად შპს „მწვანეს“ დამფუძნებელს და კომპანიის 20 პროცენტი წილის მფლობელს მადატ გუსეინოვს სწორედ საჯარო რეესტრის გადაწყვეტილება მიაჩნია. იგი კომპანიის ბიზნესსაქმიანობაში პრობლემას ვერ ხედავს და ფიქრობს, რომ შპს „მწვანეს“ სახნავ მიწას მიზნობრივად გამოიყენებს. მისი თქმით, შემოსავლების სამსახური მათ საქმიანობას აკონტროლებს და უწყებას ყველანაირი ინფორმაცია აქვს. კომპანიის დირექტორისთვის უფრო მნიშვნელოვანი საკითხი იყო თუ რატომ ამზადებდა მედიაჰოლდინგი აღნიშნულ თემაზე სტატიას, მაშინ როდესაც ქვეყანაში რთული პერიოდია.

„კანონში სად წერია, რომ სასოფლო-სამეურნეო დანიშნულების მიწის ნაკვეთზე ბიზნესის კეთება არ შეიძლება? მიმაჩნია, რომ სახნავ-სათეს მიწას დანიშნულებისამებრ გამოვიყენებთ. მიაჩნია, რომ უკანონობა ისაა, რომ მიწის სტატუსი არ შეუცვალა იმან, ვინც ხელი შეუშალა ჩვენს საქმეს. საჯარო რეესტრს იმიტომ მივმართეთ, რომ შენობის აშენება გვინდოდა, უარის მიღების შემდეგ მსუბუქი კონსტრუქცია ავაშენეთ“, - განაცხადა მადატ გუსეინოვმა.

სანამ სახელმწიფო უწყებები საკითხს იკვლევენ, შპს „მწვანეს“ ოთხი მესაკუთრე: მადატ გუსეინოვი, ვუგარ ნოვრუზოვი, მამედ ქერიმოვი და სადიგ კურბანოვი,  სავარაუდოდ, უკვე დიდი ხანია სახელმწიფო უწყებებთან კორუფციული გარიგებით, ბიზნეს საქმიანობიდან სარგებელს ნახულობენ. შემოსავლების სამსახურის ვებ-გვერდზე შეგიძლიათ ნახოთ, რომ „წითელი ხიდის“ საბაჟო გამშვებ პუნქტთან არსებულ ავტოსადგომების რიცხვში შპს „მწვანეც“ ფიგურირებს, სადაც 112 სატვირთო ავტომანქანის განთავსებაა შესაძლებელი. ვინ მიიღო და იღებს სარგებელს სავარაუდო კორუფციული გარიგებით, ჰქონდა თუ არა ადგილობრივი და ცენტრალური ხელისუფლების მხრიდან გულგრილობას ადგილი და გადადგამს თუ არა ხელისუფლება ქმედით ნაბიჯს აშკარა კანონდარღვევის ფაქტის გამოსავლენად, „კომერსანტი“ თემაზე მუშაობას აგრძელებს და დამატებით დეტალებს უახლოესს მომავალში მოგაწვდით.

ბაჩო ადამია