მედიაჰოლდინგი „კომერსანტი“ მიმართავს ფეხბურთის ფედერაციის პრეზიდენტ ლევან კობიაშვილს, რომ გუშინ ეროვნული სტადიონის მიმდებარე ტერიტორიაზე დაჯარიმებული ყველა გულშემატკივრის ჯარიმის თანხა ფეხბურთის ფედერაციამ გადაიხადოს.
ჩვენ მიზანმიმართულად გამოვიყენეთ სტადიონზე გუშინ გადაღებული თქვენი ფოტო, სადაც სავარაუდოდ საქართველოს ეროვნული ჰიმნის შესრულების დროს გულზე ხელი გაქვთ დადებული. საყოველთაოდ ცნობილია, რომ ეს ჟესტი საკუთარი ქვეყნის მიმართ პატივისცემას გამოხატავს. საკუთარი ქვეყნის მიმართ პატივისცემა, პირველ რიგში, საკუთარი ქვეყნის მოქალაქეების პატივისცემას ნიშნავს, სწორედ ამიტომ, მოგმართავთ, გუშინ ეროვნული სტადიონის მიმდებარე ტერიტორიაზე უსამართლოდ დაჯარიმებული გულშემატკივრების საჯარიმო თანხა, სწორედ ფეხბურთის ფედერაციამ უნდა გადაიხადოს, რომელმაც ვერ გამონახა გზები ან მთავრობის წევრების მსგავსად დასწრებოდნენ ისტორიულ მატჩს სტადიონზე ან 2000 ლარიანი ჯარიმის გარეშე დაბრუნებულიყვნენ სახლებში.
შეგახსენებთ, რომ გუშინ სოციალურ ქსელში გავრცელდა ინფორმაცია და კადრები, თუ როგორ აჯარიმებს საპატრულო პოლიციის წარმომადგენელი ეროვნული სტადიონის მიმდებარე ტერიტორიაზე მისულ გულშემატკივრებს საგანგებო წესების დარღვევისთვის.