უკვე წლებია პოლიტიკოსები, ექსპერტები, საბანკო სექტორისა და ბიზნესის წამომადგენლები აქტიურად საუბრობენ ქვეყანაში საფონდო ბირჟის განვითარების აუცილებლობაზე. თუმცა, დღესდღეობით საფონდო ბირჟა ქვეყანაში მხოლოდ ფორმალურად არსებობს, გარიგებები, ფაქტობრივად, არ ხდება
როგორც ცნობილია, ბოლო ხუთი წლის განმავლობაში სახელმწიფო და კორპორაციული ფასიანი ქაღალდების ბაზარი დაახლოებით 14-ჯერ გაიზრდა, მაგრამ ის მაინც მცირეა. საფონდო ბირჟაზე ძირითადი აქტივობა კორპორატიულ ობლიგაციებზე მოდის და წლებია ახალი კომპანია არ დამატებია. 2019 წლის 18 დეკემბრის მდგომარეობით, ბირჟაზე 23.6 მილიონი ლარის და 28.56 მილიონი დოლარის მოცულობის გარიგებებია დაფიქსირებული.
“კომერსანტი“ დაინტერესდა როგორია მმართველი გუნდში ეკონომიკური კომიტეტის წარმომადგენლების აზრი, აღნიშნულ საკითხთან დაკავშირებით.
მაჟორიტარი დეპუტატი ირაკლი მეზურნიშვილი საფონდო ბირჟის განვითარების ხელისშემშლელ ფაქტორებზე საუბრობს და აცხადებს რომ იმ ბაზარს, რომელიც ჩვენთან განვითარების სტადიაშია, ქვეყნის კომერციულმა მსხვილმა ბანკებმა არ შეუწყეს ხელი, არამედ პირიქით.
„ქვეყნის ეკონომიკისთვის მნიშვნელოვანია, რომ არსებობდეს საფონდო ბირჟა. კაპიტალის ბაზრის განვითარება ერთ-ერთი მნიშვნელოვანი მიმართულება და სერიოზული გამოწვევაა. დღეს რომ აქტიურ ფაზაში არ არის ეს ბაზარი, მხოლოდ იმიტომ, რომ კომერციულმა ბანკებმა თავისი წვლილი შეიტანეს საქმეში.”-აცხადებს მეზურნიშვილი.
რაც შეეხება ინიციატივას, რომლის მიხედვითაც საფონდო ბირჟა ქუთაისის პარლამენტში უნდა განთავსდეს, ირაკლი მეზურნიშვილი პასუხობს:
“შენობაში რაიმეს განთავსება ქუთაისის ინტერესში უნდა შედიოდეს. დღეს არ არის გადაწყვეტილი რა მიმართულებით გააგრძლებს შენობა ფუნქციონირებას”
საქართველოში საფონდო ბირჟის აუცილებლობაზე საუბრობს მაჟორიტარი დეპუტატი პაატა კვიჟინაძეც. ის მამუკა ხაზარაძის ინიციატივას მხარს უჭერს და აცხადებს, რომ მთავარი მხოლოდ შენობის ფუნქციონირება კი არ არის, არამედ მნიშვნელოვანია თუ საქართველოში ფასიანი ქაღალდების ბაზარი როგორ განვითარდება.
„ქვეყანაში საფონდო ბირჟა აუცილებლად უნდა არსებობდეს. ბირჟის შექმნა, რომელსაც ასეთი მასშტაბური შენობა დასჭირდება ძალიან ფართო მასშტაბებთან მიახლოვებულიც კი არ არის. მთავარია უმაღლესი დონის სტრუქტურა შევქმნათ. ქვეყნის ეკონომიკის განვითარებისთვის ბაზრის არსებობა მნიშვნელოვანია, მნიშვნელოვანია შენობის დატვირთვაც, მაგრამ არა ისე, როგორც ამ ბაზრის განვითარება.“-აცხადებს პაატა კვიჟინაძე.
ნათია ლომიძე