2019 წლის დეკემბერში, გასული წლის ანალოგიურ პერიოდთან შედარებით კომერციულ ბანკებში მომხმარებლების მიერ დაფიქსირებული პრეტენზიების რაოდენობა დაახლოებით 105%-ით გაიზარდა. თუკი 2018 წლის დეკემბრის მდგომარეობით, პრეტენზიების რაოდენობა 817-ს შეადგენდა, 2019 წლის მონაცემებით რაოდენობამ 1677 შეადგინა.
2019 წლის 12 თვის პრეტენზიების სამეულში შედის:
1. მიმდინარე ანგარიში - 833 განაცხადი;
2. სამომხმარებლო სესხი - 86 განაცხადი;
3. ინტერნეტბანკი - 33 განაცხადი.
2019 წლის დეკემბერში ყველაზე მეტი - 833 პრეტენზია დაფიქსირდა მიმდინარე ანგარიშთან დაკავშირებით, რაც გასული წლის ანალოგიურ პერიოდთან შედარებით 561 შემთხვევითაა გაზრდილი (2018 წლის დეკემბერი-459 პრეტენზია).
ერთ წელში მნიშვნელოვნადაა გაზრდილი ინტერნეტბანკთან დაკავშირებული პრეტენზიები, რომელიც 2019 წლის დეკემბერში 33-ს შეადგენდა, წინა წლის ანალოგიურ პერიოდში კი მხოლოდ 4-ს.
ეროვნული ბანკის ინფორმაციით, პრეტენზიის ხასიათის მიხედვით, 2019 წლის დეკემბერში ყველაზე მეტი, 1353 პრეტენზია ტრანზაქციებთან დაკავშირებით ფიქსირდებოდა (2018 წლის დეკემბერში-450). შემდეგ მოდის ადმინისტრაცია/მომსახურებასთან დაკავშირებული პრეტენზიები, რომელიც 2019 წლის დეკემბერში გასული წლის ანალოგიურ პერიოდთან შედარებით 11-ით გაიზარდა და 124 ერთეული შეადგინა.
იმ პრეტენზიებიდან კი, რომლის განხილვაც კომერციულმა ბანკებმა 2019 წლის იანვარ-აპრილში დაასრულეს, საფუძვლიანად 180 მიიჩნიეს, ხოლო უსაფუძვლოდ 1038.
კომერციულ ბანკებში დაფიქსირებული პრეტენზიების რაოდენობა ბოლო წლებია ზრდის ტენდენციით ხასიათდება, რისი ერთ-ერთი მიზეზი, შესაძლოა, მომხმარებელთა მხრიდან გააქტიურება იყოს. 2019 წელს პრეტენზიების რაოდენობა 14529-ს შეადგენდა, 2018 წელს 6358 იყო, 2017 წელს კი 3665 პრეტენზია, 2016 წელს პრეტენზიების რაოდენობა 2857-ს შეადგენდა, ხოლო 2015 წელს 2697-ს.
„საზოგადოება და ბანკების“ ხელმძღვანელი გიორგი კეპულაძე „კომერსანტთან“ აღნიშნავს, რომ ბანკების მიმართ პრეტენზიების ზრდა შეიძლება უკავშირდებოდეს იმას, რომ რაც შეიძლება ბევრმა ადამიანმა იცის, თუ სად და როგორ შეიძლება გამოხატოს ეს უკმაყოფილება და პრეტენზია ბანკის მომსახურებასთან დაკავშირებით.
„პრეტენზიების ზრდა შეიძლება იმის ბრალი იყოს, რომ ბანკების კომუნიკაცია მომხმარებელთან გაზრდილია. დღეს მომხმარებლები აქტიურად აპელირებენ საკუთარ უფლებებზე, რაც ძალიან კარგია. ამიტომ ვფიქრობ, რომ ზრდა ამ კომუნიკაციის ზრდასთანაც არის დაკავშირებული. ასევე მნიშვნელოვანია, რომ ყველა საჩივარზე მომხმარებელს ადეკვატური პასუხი გაეცეს და არ დარჩეს განცდა რომ მათი უფლებები კომერციულ ბანკების მხრიდან ირღვევა. მნიშვნელოვანი პრობლემები მომხმარებელთა უფლებების დარღვევის კუთხით საბედნიეროდ არ ფიქსირდება, არის ცალკეული შემთხვევები, რომელზეც სწორი კომუნიკაციით შესაძლებელია, რომ მომხმარებელთა უფლებები უფრო მეტად იყოს დაცული.
დაფიქსირებული პრეტენზიების კუთხით პირველ ადგილზეა მიმდინარე ანგარიში, შემდეგ სამომხმარებლო სესხები და ინტერნეტბანკინგი, რაც ნიშნავს იმას, რომ რა პროდუქტითაც მეტი ადამიანი სარგებლობს, თავისთავად იმ პროდუქტთან დაკავშირებითაა უფრო მეტი პრეტენზია. საგულისხმოა ინტერნეტბანკთან დაკავშირებული პრეტენზიების ზრდაც, რადგან უფრო და უფრო მეტი ადამიანი სარგებლობს ამ პროდუქტით“, - აღნიშნავს გიორგი კეპულაძე.
ნინო თამაზაშვილი